惡人谷執政聯盟操作實例 (Patreon)

辦公室政治系列之二 ｜ 日常政治學

今日本來仲有好多其他題目想寫，例如寫封公開信覆下陳茂波篇網誌，又或者講吓點解以色列 Shekel 咁強勢，甚至繼續寫埋之前未講完嘅貨幣系列。

但好神奇嘅係，我直覺最想寫仍然係政治，尤其係辦公室政治。

呢度嘅讀者，我相信屬於比較高質嘅一群，所以都應該意會到，呢個時候寫 #第二把交椅，同埋解釋點樣組織 #辦公室執政聯盟 ，既係實用小知識，用來分析世界時事，一樣得。

入正題。上次講第二把交椅，有讀者話我，講咗「你是我手下，我在你手上」，但無好具體講到，例如權力第二號人物，點樣定上位者嘅生死，點奪權，同大佬嘅關係點等等。

今日我唔直接去答以上嘅問題，而係用例子去說明究竟點樣建立我所講嘅執政聯盟。

以下經歷，真人真事，童叟無欺。👇🏻

01，打工嘅日子，我曾經都叫做有百幾兩百人跟我；我甚至唔記得晒自己條 team 入面每個人嘅樣同名。我亦都出咗名，去到邊度，都一定會換人。諗返轉頭，呢個正正係我「奪權」模式，但亦都係我點解做極都做唔到集團最高層嘅原因。

02，講落去之前，幫大家回顧下之前所寫嘅。所謂政治，不論係宮廷、辦公室、抑或真係國家、國際政治，都不外乎三個問題：（一）如何奪權？（二）如何避免被奪權？（三）如何運用權力去分配利益，以建立執政聯盟，避免被奪權。

03，政治，可以話係咁簡單。但點解我去到邊都炒人，可以係我嘅奪權模式？因為任何機構裡面，都必然有冗員。就算我自己一個人做嘢，尚且有偷懶嘅時候，你同我講成班人無人偷懶？所以，我所到之處，一定搵到可以炒人而唔影響運作嘅方法。

04，由於我空降嘅結果，輕則減人手，重則成個部門唔見咗。所以有啲人就好驚我，亦有啲人好憎我；但重點係，我嘅價值，運用權力嘅方法，就係為節省集團嘅開支，所以我嘅執政聯盟入面最重要嘅持份者，就係大老闆。

05，可能有人話，有大老闆照，就梗係打橫行喇。咁你就睇少咗問題嘅複雜之處。你可以諗下，如果大老闆想點都得，佢自己出手喇，慳埋我個份糧添。有啲人以為佢係愛面子，我可以話畀大家知，佢真係唔在乎。咁點解佢唔自己出手？你估佢無？大家要留意我以上所講，減人手只係故事嘅一半，另一半係「不影響運作」。

06，究竟我點可以做到減人手又不影響運作？當時，我去到每個部門，都會好仔細咁去了解部門嘅運作，尤其係觀察有邊個同事特別做得嘢。然後，我會問佢：「你有無把握 take over 埋邊個邊個嘅 role 。」當然， offer 就一定包括升職加人工；如是者我去到邊度，兩、三個星期就可以建立我嘅執政聯盟。

07，「新官上任三把火」，「空降」然後「拉一派打一派」，其實肯定唔係我發明；亦可能有人會覺得咁做好殘忍。但相信我，呢個過程係必須嘅，如果唔係，作為空降嘅人，好快會被架空。

08，記住，做上司嘅，唔可以畀任何手下變得「不可取代」；掉返轉頭，每個做人手下嘅，就想自己變成 linchpin ，即係「你無咗我唔得」。

09，試過有次，我空降去一個地方，都未出手，就有條友自己走來搵我，offer 話可以做埋佢上司，即係個部門之前嘅第二把交椅。好，就咁決定。佢親手郁咗自己前上司，然後攬住晒所有嘢，其他人都掂唔到。一來我諗佢好驚，二來佢都等咗上位好耐。

10，其實，佢做部分第二位，有排都未威脅唔到我，而且佢亦都係幫得手嘅，理論上我同佢可以和平共處。但大家要記得剛才我所講；做上司嘅，唔可以畀手下有任何一個人變得「不可取代」。其他同事亦非常有政治智慧，知道問題所在，就係咁，夾手夾腳將呢位都好做得嘢嘅仁兄拖落馬。

11，故事嘅教訓係乜？一，做第二把交椅都要有自己馬房；只係攬住啲 project ，唔足以令自己係不能被替換。二，呢個人，連自己前上司都郁，又攬住晒啲工作，破壞咗佢哋自己之間嘅生態平衡；三，佢哋呢班人嘅生態平衡，就係一個都不能少。夾手夾腳將呢位好打得嘅師兄都除埋，我就只可以靠佢哋成班人。對我來講，一個都不能少，唔緊要，反正又唔會有任何一個人可以威脅得到我。呢個現象亦解釋咗，點解任何公司，任何企業，任何組織，都一，定，有，冗，員！

12，另外，當你有權決定請人嘅時候，好自然會有人向你推薦啲人選。直接咁諗，對方都係想幫朋友搵工。但我發覺，當一個部門入面，三五成群都係由同一個介紹返來，就算本來唔想有馬房文化，都漸漸會出現呢個情況。

13，有個同事，十幾年前我請佢嘅時候，佢只係一個好純品嘅小妹妹。十幾年後再遇到佢，已經係惡人谷入面生存能力非常之強嘅小婦人。佢其中之一個生存之道，就係識得幫上司揀蟀。更正確咁講，係幫佢建立自己嘅「二線執政聯盟」。佢嘅 title 只係助理，但遊走於部門收風放風，知道邊度個部門阿頭想要人，邊個想轉會，直頭係內部非正式 HR。如是者，十幾年間，佢唔只有自己班底，仲有個近乎地下組織咁嘅脈絡；結果我走咗，佢都未走。

14，有班底，有馬房，有人脈，唔一定係要人多勢眾，但最緊要係擺啱地方，有啱嘅人。我試過見另一條友，一入職就係最高管理層之一；佢一上任就好急咁請好多人；幾個月間，請咗幾十友。甚至有人聽佢講過，部份係請定返來等要祭旗時有 headcount 去奉獻。

15，結果，係呢條友之後都畀人祭埋旗。究竟佢錯在乜呢？佢錯在全部人都係擺自己門下，佢自己犯錯又好，自己門下有人犯錯又好，結果都係大規模種族清洗式。據聞佢畀人祭旗後，好似有 PTSD 咁，不但 unfriend 晒呢間公司啲人，LinkedIn 絕口不提自己曾經做過集團高層。

16，以上所講嘅辦公室政治，有人話係精神領袖嘅設計；但我好學術嘅角度分析，一來係因為呢個行業本身嘅特性，二來係呢間公司獨特嘅發展模式，先至令到辦公室政治咁嚴重。但少少制度經濟學咁講，從結果睇，可能呢個已經係最低交易成本嘅制度結構。

17，有權力，就有政治。但乜嘢係權力呢？好籠統咁講，能夠令事情發生嘅能力，就係權力。有啲人話唔想參與政治？得，做一個完全無權嘅人，就無政治。但就算係咁，你都一樣可以係權力爭逐嘅犧牲品。

18，傳媒業，又似乎特別多辦公室政治。一來，傳媒本身就有影響力；決定邊隻新聞點擺，擺邊，擺幾大，用乜嘢方向，全部都係酌情權。點樣確保唔會有人以權謀私？最簡單，就係令到部門同部門之間，人同人之間，不斷有競爭同互相制衡。

19，又例如，當年我哋有個好知名嘅制度叫「鋤報會」。據說好多年前，精神領袖（即係大老闆本人）自己都會坐落去，之後就派人去。我呢當然有去開；甚至都坐到好前。嗱，你坐邊個位，都反映咗你嘅話語權有幾大。呢啲就叫做儀式感；亦都係政治入面好常用嘅工具。

20，另外，由於精神領袖好多諗法，經常令公司出現啲新嘅部門，搞搞吓就千頭萬緒，人多口雜。每次開新嘢，多個山頭多隻鬼，因為爭奪資源，一定有器官排斥。

21，去到後期，我好厭惡返工玩嘢多過做嘢嘅日子，但我又好清楚，呢個係制度問題。有次都覺得真係夠皮，就同精神領袖講，想只係寫返專欄。雖然我覺得人嘅行為只係環境因素嘅結果，係制度決定行為，但似乎好多人唔係咁諗，覺得係個人問題（尤其係我嘅個人問你）。

22，由於我空降清場作孽太深，結果連報紙入面個欄，都係長期被壓去啲好奇怪嘅排版位置。當然我唔會唔知發生乜事，但食得咸魚抵得渴 。反而壹周刊，因為一直以來同無乜交過手，所以之後我開個欄，個位好正，好搶眼。

23，大家唔好誤會，我唔係話自己好識玩辦公室政治；絕對唔係。我亦唔係特別享受，否則當年都唔會辭職。但最低限度，我得到我想要嘅嘢，代價就係咁多年無乜朋友。有啲人可能覺得，結交好多朋友，就等於識玩辦公室政治，但我唔係咁諗；可能係我人緣差喇。返工可以交到朋友，我信係緣份；交唔到朋友，係好正常嘅事。

24，我對政治嘅認識，可以話完全係來自惡人谷入面親身體驗嘅辦公室政治。用以上嘅邏輯去分析神奇國度嘅政治，一樣得。過咗個二十大，我又借下用「過來人」嘅視角，同大家解釋下究竟發生乜事。預測結果就難啲，因為無足夠嘅資訊；但做事後孔明應該無問題。