豬隊友．廢柴上司．新部門 (Patreon)

辦公室政治系列之三 ｜ 日常政治學

剛過去嘅周末 HKPN 與 We the Hongkonger ，組織了在 DMV 地區第二次嘅香港人社區中心活動。今個月多咗個新環節，就係類似 panel discussion 嘅講座 ；令次嘅主題係辦公室政治。

十幾二十年前我打工嘅時候，辦公室政治真係日常生活嘅一部份。我甚至覺得，返工有七成時間係玩嘢，三成時間做嘢。據說，越係高層，辦公室政治佔你嘅時間心機越多。當你係老闆嘅時候，你唯一嘅工作，就係處理下屬嘅政治糾紛。

去之前，我都有諗過，究竟大多數朋友會有乜嘢問題呢？結果我發現，主要係關於豬隊友以及廢柴上司。

呢個系列剛剛寫咗兩篇，有興趣嘅朋友可以重溫返：

惡人谷執政聯盟操作實例 | 利世民 on Patreon

第二把交椅 | 利世民 on Patreon

01，一般情況下，豬隊友、廢柴上司唔會無緣無故成為問題，因為大家都習慣咗；所以，問題一定係有新成員嘅出現；一係就你公司請錯人，一係就你去錯公司。

02，以上所講嘅兩種情況，處理嘅方法分別好大。假如豬隊友係新請返來，而你係 incumbent ，我會建議你盡快同老闆出聲。至少我自己作為一個老闆，我係會好感激你。

03，記住一個恆久不變嘅定律：「每個可以做得落去嘅豬隊友，背後都必然定有個廢柴上司。」如果剛才嘅 scenario 你嘅上司唔聽你講，一係就你同時遇上豬隊友同廢柴上司呢個組合，一係就你超晒班，呢間公司容你唔下，一係就你對其他人嘅判斷好有問題。邏輯上，你嘅情況好惡劣。

04，假如係你去錯公司，第一個問題係：「最初點解你會揀呢條路？」咁多數嘅答案都係：「人工」；有豬隊友同廢柴上司，唔會改變你嘅初衷，所以，我建議係你可以當無事發生過。

05，【題外話】有啲人轉工，唔係為錢，而係為咗個 title。以前我都試過請人嘅時候，見工嘅人同我講，希望可以有個好聽啲嘅 title 。當時我諗：「嘩，畀個 title 佢係唔係可以出少啲糧先？」但最後我連 offer 都廢事畀。title inflation 不但可以反映一個城市有幾咁虛偽，亦可以反映一個人有幾咁唔理性；我係唔會同唔理性嘅人做同事。

06，假如你仍然覺得，自己無去錯公司，只係跟錯老闆。我建議係，你盡快建立多啲人脈關係，做個有用嘅人。職場就好似投胎；總有啲嘢係你唔完全鍾意，結果就係要靠你自己後天嘅智慧同努力，去慢慢改變現實。

07，有另一個情況會出現豬隊友同廢柴上司，就係當公司改組；又或者你、你嘅上司同你嘅隊友，都係新請返來。呢個情況，其實都幾常見。尤其係，每個企業或多或少都有既得利益者，唔希望改善現狀。

08，再者，新嘅組織結構、新嘅團隊，而且成員都係外來，結果好易出現器官排斥，存活率非常之低。但逆向思維咁去諗，有危就有機；通常一個已經好有規模嘅大企業，想上位都要由低做起，想行捷徑，通常就係呢種人人都唔敢搏嘅時候。

09，「嘩，會唔會出師未捷身先死㗎？」都話咗，呢種情況嘅存活率非常低，但好處係如果你都係新加入嘅，其實都無乜好輸。但最大問題係，明明係咁艱鉅嘅任務，豬隊友真係一個都嫌太多。呢個時候，你有兩個選擇，一係就好似剛才咁講，良禽擇木而棲，盡快搵個好碼頭上岸。

10，第二個，係兵行險著嘅方法。首先你問自己，有冇可能完成任務，如果有啲把握，把心一橫，越級去到最終要為呢件事嘅成敗問責嘅最高管理層，自薦兼提交計劃。

11，有啲機構，的確好講論資排輩，唔容許呢啲越級挑戰嘅行為，而且通常都係啲中層最著緊，呢種排隊等上位嘅文化。所以，呢種打大佬，就去到最最最高層次，搵個你點都威脅唔到嘅級數。無錯，咁做你好可能會輸，但太不了都係一份工，真係無乜好輸。

12，辦公室政治，唔可以取代能力；但有能力嘅人，一定要識得辦公室政治。唔好誤會，我唔係叫大家去阿諛奉承，又或者去中傷其他人。辦公室政治又好，政治又好，政治，就係透過分配利益，去達到目的。當你嘅目的係為咗做好件事，建議又真係合理可行嘅，你對自己嘅執行能力又有信心，政治只係必要嘅過程。

13，可能有人會話：「我唔想咁煩，只係想做好自己嘅工作，得唔得？」無憂無慮到公卿，就梗係好。所以，做上司嘅，其中一個好重要嘅工作，就係盡量避免不必要嘅政治。究竟點做，下次再講。