值得瞓身買嘅資產 (Patreon)

繼續唔想寫啲硬橋硬馬嘅題目。

忽然醒起，之前 Facebook 上面有個讀者，問咗一條好有趣嘅問題：

如果有人用支槍指住你，要你把全部資產（屋呀田呀地呀車呀金條呀銀行存款呀股票呀，全部）轉去做另一樣野，黃金白銀虛幣樓田地股票基金債券其他貨幣Yen歐羅全部都得，去加州買個果園都得，去法國買個酒荘都得，去買晒Tesla 都得，買晒石油都得，但轉做美金同港紙就唔淮，你會轉做乜？

呢啲會令人思考嘅好問題，我鍾意；更鍾意係因為我諗咗個答案之後，然後就發現個答案唔係最終答案。

01，當時我第一個諗法，係覺得佢心目中諗緊係最壞打算個種情況。可能因為佢話，有人用支槍指住我；當然係比喻，但個感覺係佢始終係想講避險。

02，避險嘛，正常就應該分散，但佢又要我買晒落一樣嘢上面，咁就有趣。因為呢個真係可算係財富管理嘅底線思維。所以我好直覺咁答呢位讀者：「地。」

03，個一刻其實我諗起 Barton Biggs ；佢生前曾經對個世界灰到叫人做最壞打算。壞到點？壞到假設文明崩潰回到最基本嘅生存模式，去一個無乜人嘅地方，自己耕作生活。嗯，所以好直覺嘅諗法係：「地」。

04，但係下一個問題就出現：「都話文明崩潰，買地有乜意思？你話塊地係你嘅，但有班人走埋來話係佢嘅，佢有槍，你冇，你話塊地係邊個嘅？」

05，咁係唔係買軍火呢？小朋友，唔好中二病，唔好打太多喪屍遊戲。因為就算係 Lord of the Flies 咁嘅情節，只要有人，就會埋堆。人類之可以生存，因為人係社會嘅動物。如果大家錯過咗之前兩篇 日常政治學 系列，介紹返，入面有啲概念可能幫到大家去諗吓社會嘅基本生存技能。

惡人谷執政聯盟操作實例 | 利世民 on Patreon

第二把交椅 | 利世民 on Patreon

06，所以，如果真係講到去文明崩潰，回到蠻荒，都冇人理產權喇，你真正可以擁有嘅，可能只係身上面帶得走，又或者你腦入面識得嘅嘢。另一個大家必須明白嘅道理就係，當你想像到人類近乎原始生活嘅狀態，可以交易嘅嘢亦都唔多。換句話說，市場、產權呢啲概念，絕對係文明之下最重要嘅結果。

07，同埋，人類文明就算會倒退，都有個譜。歷史唔係未發生過；話說古羅馬、東漢末年，都試過文明大倒退。以前嘅歷史就話係野蠻人入侵，五胡亂華，但之後好多證據反映，氣候變化令以農業長期失收，以農立國嘅漢同羅馬，即係當時嘅兩大政治體制，都無法繼續統治，再加上瘟疫，結果就被中亞草原嘅遊牧民族取代。

08，唔係要嚇大家。相反，我係想講嘅係，人類對自然嘅了解同反應能力，照正來講比以前強好多。即係話，咩氣候變化、瘟疫，或者對我哋嘅生活有所影響，但應該唔會去到好似東漢、羅馬帝國咁。Fingers crossed 。

09，最多，咪好似 1929 囉。1929 有幾差？至少無話將工業革命百幾年嘅成績，一筆勾銷，係咪？我哋應該諗嘅係，目前世界最脆弱、最虛幻嘅制度係乜；通常呢樣嘢，都係事前大家想像唔到會咁樣崩潰，但原來真係可以發生嘅事。

10，「係唔係美元呀？」嗯，其實乜嘢係美元？「美國政府發行嘅貨幣囉，唔係咩？」咁講，一隻貨幣嘅價值，在於有人肯收。其實 1973 年應該係近代當中，美國國力最弱，連兌換黃金保證都要棄守嘅時候。如果話美元末日，當時就應該係最佳時機；所以，家陣美元時晨未到。

11，甚至乎大家可以見到，今年係人類近八十年來最接近世界大戰嘅時候，邊隻貨幣升得最勁？美元。

12，題外語：以色列嘅 Shekel 其實自從 2015 年起，已經相對強勢；今年仍然係美元以外，世界最強勢嘅貨幣。我見好多解釋話以色列科技勁呀，政府好嘢呀，但我就簡單啲：「以色列係最多俄佬避難嘅目的地。」話說，廿世紀初，歐洲嘅猶太人好多去咗蘇聯；戰後，以色列同蘇聯嘅關係非常密切。就算去到今日，以色列境內，最多人講嘅語言，一係希伯來語，二係阿拉伯語，三就已經係俄語。

13，所以，家陣用底線思維去諗財富，都好合理，因為好多人真係已經用腳投票。但讀者講明唔可以揸美元，唔通揸以色列 Shekel ？再唔係，瑞朗？嗯，貨幣投機，我覺得唔係我嘅價值觀，甚至好教科書咁講，錢唔應該當做資產。

14，股票？S&P 500 ETF ？實情我一直都揸住，懶得理，買咗都當自己唔記得，最好呢世都唔需要郁動個筆錢。但又咁講，我過去一年亦無加注。從底線思維去諗，點都唔會係股票。

15，黃金？Bitcoin？今年二月剛剛開戰，我都有寫，呢兩樣資產，並唔係避險資產。唔係馬後砲，有文為證：

究竟甚麼才算是避險資產？ | 利世民 on Patreon

16，地，但唔係屋地，係農地，唔係香港等改變用途嘅農地，係美國真係可以種大豆、玉米嘅農地。但係我都有同個位讀者講：「地嘅 duty of care 都好大，要有心理準備生活嘅模式有好大轉變。」

17，我唔知呢度有幾多人種過嘢，以我所知，唔識種嘢去種嘢，可以係連種子都蝕埋。唔怕同大家講，我連仙人掌都可以種得死，係盤栽嘅最大敵人，生物嘅尅星，所以我知道要打理一望無際嘅田地，係要好多技術。

18，從前種田，就係人力加土地；因為人力有限，所以如果係自耕農，你有好多地都無用。可以耕好多地嘅，就幾乎一定係要靠奴隸；奴隸嘅投入，價值低，回報低，所以佢哋可以得到嘅，就係僅僅足以維持生命嘅食糧。甚至有人發現，平均計，農業社會每個人每日所食用嘅食物，能量唔會多過遊牧民族。如是者，亦都補充解釋咗上面講到，點解東漢同羅馬帝國崩潰之後，遊牧民族反而可以人少少但擊敗人口眾多嘅農業社會，因為佢哋嘅優勢，就係人口少，但牲口多。

19，現代農業，已經高度機械化同科學化，係資本加土地，人力需求極少；種子同肥料，都係科技。至於土地，最緊要係有水，有運輸；而供水又或者節水，同埋運輸，又係資本。如是者，就係資本主義之下嘅農業。

20，講開又講，2008 年個一轉講 peak oil ，美國就一窩蜂去做生物能源，即係種玉米喇。但今次能源危機，你好少見人講。係喎，biofuel 都唔係碳中和，唔夠綠。同埋個個都講電車嘛。但係又話唔夠晶片，唔夠鋰電池，電車投產唔夠快，咁現有嘅車都要用油，點解 biofuel 唔可以短炒呢？當然，股價都已經反映咗喇，biofuel 股其實係有人冷敲嘅，但我就懶，都係乜都唔做，睇多兩本書好過。