被 Youtube 吃掉了生命 (Patreon)

【是日隨筆】做咗兩個月 KOL 嘅反省

拍片，當然係想多啲人睇到。

Youtube 無疑係個好厲害嘅平台（話唔定 TikTok 仲勁，未試過，唔知）。假如想畀更多香港人知道自己嘅存在，一定要經營自己嘅頻道。

其實，好早就知道 Youtube 厲害；甚至未離開香港之前，都已經知道有班每日花幾個鐘頭睇 Youtube 。當時有幫湛國揚、大紀元、看中國等做節目；亦知道有人係因為睇 Youtube 而認識我。

我一直都好抗拒拍片，原因之一係自己睇唔慣自己上鏡，聲線又控制得唔好。雖然以前都有做電視，但我係從來都唔會睇返自己做嘅節目，因為真係好唔慣。

但最終都係屈服。

由九月起，實驗咗接近兩個月；首先係呢度嘅訂閱人數幾乎倍增。另外就係每條片都有最少一萬人花十分鐘時間。

有一萬人聽你講十分鐘嘅說話喎；我覺得好大責任。當然，我都知其實有更多影響力更大嘅 KOL ，佢哋每條片，每日閒閒地幾個鐘頭有五、六萬人睇。

但我唔係 KOL 嘛；但經營 Youtube 頻道，你話自己唔係，人哋都話你係。

甚至，有一刻我諗：「索性唔好寫文，就咁拍片就算。」如果係以結果為目標，想多人睇到，係應該拍片；然後呢度就只係貼片。

不過，我知道咁做嘅結果，係自己會好快乾塘。因為我寫作嘅過程，亦同時整理思考。對鏡頭，基本上唔可能同時思考；唔思考，又有乜嘢可以同讀者、觀眾分享？

大家見我寫嘅文章，可能已經係唔知第幾稿（但一樣有唔少錯別字）。有時甚至會有啲句子，會講講吓無咗下文（因為寫嘅時候唔知跳咗去邊）。平均我寫二千字，一邊寫，一邊執，通常都要兩個幾鐘。

至於拍片同 Podcast，最初我真係先一字一句都寫晒先；後來做多幾次之後，漸漸可以只有 point form 都講到。後來甚至試過掉返轉頭，將啲錄音用 voice-to-text 變返文字，試吓睇吓咁樣可唔可以快少少 。

結果，我都係發覺分開，寫作還寫作，拍片錄音還拍片錄音，兩件事要分開處理；那怕係同一個題目，表達嘅媒介唔同，就係唔可以用同一個流程去處理。

但我都係傾向，深入嘅題材，都係文字先，拍片錄音後。

Youtube 頻道點算呢？早兩日，嘗試咗用另一個方法拍片，揀幾條新聞，簡單短評。結果係有人鍾意；但亦有讀者覺得似蜻蜓點水，唔夠深入。

真正令我反省嘅問題係：「究竟我揀題目嘅標準係乜？係唔係純粹係因為我覺得好重要？但重要在邊度？」

舊年向各位推介 Neil Postman 寫嘅 Amusing Ourselves to Death ，當中其中一個印象最深刻嘅論點，就係作者響第五章 The Peek-a-Boo World 裡面講到，我哋每日吸收好多資訊，其實係三無：「無關要緊」（irrelevant）、「無能為力」（impotent）、「無厘頭」（incoherent）。

何謂「無關要緊」（irrelevant）？當一單新聞你睇完，然後⋯⋯然後就沒有然後，呢啲仲唔叫「無關要緊」？

「得個知字都好呀？知識就是力量嘛！」真係？你知，但又無諗過要去改變，咁仲唔係 irrelevant？

【導讀】娛樂至死 | 利世民 on Patreon

又或者，想改變但又唔知點去改變，仲唔係令人感到「無能為力」（impotent）？

更多嘅所謂資訊，其實根本上文唔接下理，咁仲唔係「無厘頭」（incoherent）？

遠嘅唔講，早幾日二十大閉幕胡錦濤唔知點解被夾出場，完全係一件「三無」嘅資訊；所以我唔會主動去評論，但講開，咪搭訕兩句囉。

Neil Postman 話，當媒體由文字演變到影像，資訊亦都漸漸變得更「娛樂化」；Amusing Ourselves to Death （中譯「娛樂至死」），核心訊息就係，影像化嘅資訊世界，宗教、政治、教育等，最終都會變成娛樂。

Youtube 成為主流媒體之後，Neil Postman 呢本書久不久都有人攞出來講；但講完之後，大家之繼續去日日開住 Youtube ， 心甘情願去被演算法洗腦。

我唔係要扮清高，話其他 KOL 荼毒眾生；畢竟如果我都日日拍片，每日消耗別人十萬分鐘嘅生命，呢個共孽我都一定有份。

早兩日我拍片嘅時候，講到 Tyler Cowen 寫嘅一篇評論，講到演算法決定咗我哋可以睇到啲乜，呢個時候我哋可以點，我嘅建議就係要更加主動去搵有用嘅資訊去睇。

但係點先為之有用嘅資訊呢？relevant 、actionable 、coherent 囉。

當中，我相信 actionable 都應該係最重要嘅一點；如果唔可以知行合一，知來又有乜用？actionable 嘅資訊，定義上必然係 relevant ；係咪 coherent 就睇個作者本身嘅思想係唔係清晰喇。

呢一點反省，對我嘅意義就係，每次拍片（甚至自己睇每篇文章、每本書），都應該問一個最基本嘅問題：「我知道嘅呢個新嘅資訊，點樣可以令自己成為一個更好嘅人？」

順帶一提，我都唔敢要求點樣去令個世界變得更好；因為我相信，令自己變得更好，已經係令到個世界更好嘅第一步。

今日對我自己嘅 actionable insight 就係：「每篇文，每條片，如果唔可以清楚講得出 actionable 嘅地方係乜嘢，就唔應該出街。如果我揀咗個題目，諗唔到有乜 actionable insight ，即係我對件事諗得未夠通透，夾硬去，只係浪費大家嘅時間。」

各位，你作為讀者、觀眾，其實一樣有可以「袋落袋」嘅結論：「讀每篇文、睇每條片之後，都試下問自己有乜嘢 actionable insight ；有時唔係條片又或者篇文直接畀到你答案，係當你思考嘅時候，畀自己嘅一個答案。」