【會員通訊】拖延症患者的自白 (Patreon)

話咁快又到 12 月，我呢個拖延症患者終於又出場。

本來諗住每個月寫一封咁嘅會員通訊，但結果變成每兩個月一封。唔緊要喇，有啲失驚無神咁咪仲有趣。

人哋通常就年底都有啲回顧，我都試吓。今年，好衰唔好又打仗，亦好多生離死別。當你以為 2021 好差（至少個市有啲功課交），2022 係完完全全地咁差。

講返自己，今年我開始咗拍片，開過一兩場 online event ；再做吓應該會更熟手，效率更高。

年初嘅 Web3 經濟學，其實我覺得自己嘅得著好大；準備個六場 presentation ，畀到自己新嘅睇法。本來，想將呢六堂嘅內容，變成本電子書，但又係拖延症發作⋯⋯

另外一個 overdue 嘅 project ，就係香港紀事本末 ；無任何合理籍口，又唔係想 abandon 呢個 project 。只係被其他每日嘅題目分咗心。

仲有揀咗好多書想做導讀，有啲睇咗未寫，有啲就未睇。

另外，今年我亦重新試吓做 podcast ，成效嘛嘛地；最主要都係我讀書嘅節奏唔夠動聽。但又有好多讀者表示，鍾意聽我將文章讀出聲。其實，讀出聲係好嘅，每篇文寫完最少讀一次，好處係幫自己搵到邊啲位寫得唔好。其實每篇文章寫完都應該可以大聲讀一次，讀唔出聲嘅文章，就一定唔係好嘅文章。近來我發覺自己讀稿順咗，好多時都係一次錄完。

最後，今年由第三季開始，試吓做 Youtuber ；其實一早都知越來越多人去咗 Youtube ，但我又係對自己對鏡頭讀一次內容覺得好唔自在。

但自從畀人冒認（成就解鎖） ，就頓悟到，出樣出聲有佢嘅意義，最少以目前嘅技術環境，唔係咁易畀人冒認。

依家每日我嘅工作 routine ，其先做每日 reseach，度有啲乜嘢 talking point ，然後錄 Youtube ，下晝再寫文。第二日，錄 Youtube 嘅時候，有時就講返之前一日寫過嘅。有時又掉返轉，先錄一個題目，然後再寫文。

所以，任何一個題目，可能都係講過好多次，但講過好多次之後，就越講越淺白。

我知自己嘅問題係，太多嘢想做，但只有自己一條友。

「點解唔試吓請人幫手？」有人問。

一來，我孤寒。二來，我覺得當自己都未搵到可以點樣有系統咁去做一件事之前，其實係唔易將手頭上嘅工作派畀人。

一係，我就接受市場嘅主流做法，但結果就係大家都做類似嘅內容，用類似嘅方法追眼球、點擊。咁我又覺得無謂。

所以，我最終都係選擇行小眾嘅方向。無錯，呢個方向表面上係唔理智嘅；如果從收入最大化嘅角度，梗係個期最多人講乜，就去搶 fo 。

但寫作嘅人，有一種虛榮感叫做 agenda setting 。一個人，如果能夠令一個詞語，一個概念，深入民心，呢個成就有時比起多人睇來得更振奮。

我嘅比喻係，做飲食嘅想搵錢，就梗係開快餐；但總有人嘅願望，係做私房菜，做米芝蓮。世界就係咁，大家做唔同嘅嘢，享受唔同嘅價值。

【Telegram Channel】幾時有新嘅文、片等？又或者想知我睇緊乜？大家可以加入 https://t.me/unsubject_tldr  ；完全不經演算法，全人手推播，保證無 Spam 💪🏻