歐美對俄經濟戰成效 (Patreon)

記得 2018 年中美矛盾表面化，已經有人問究竟係唔係要爆發第三次世界大戰。當然，我主觀願進係想世界和平，但歷史始終有佢自己嘅軌跡，要發生嘅事始終會發生。

冷戰嘅經驗話畀我哋知，所謂嘅第三次世界大戰，其實可能一早已經無聲無息咁開始。要知道，唔同嘅時代，有唔同嘅戰爭模式。假如話第一、二次世界大戰，係工業化嘅戰爭，第三次世界大戰，又點會無金融經濟資訊戰嘅元素？

今日先同大家回顧 2022 年歐美各國對俄嘅經濟戰，溫故知新：

01，任何關於戰爭嘅分析，都應該從目的以及結果出發；正如 Carl von Clausewitz 話齋，戰爭只不過係政治嘅延續。而政治亦不外乎兩件事：一，如何分配利益；二，如何維持統治。

02，話我長氣都要再講，俄羅斯入侵烏克蘭嘅原因得一個，唔係咩烏克蘭加入北約，而係普京政權唔可以畀烏克蘭漸變成一個好似西方社會嘅國家。其實過去咁多年，烏克蘭同香港人一樣，都係希望爭脫一個傳統極權，攞返自己嘅話事權。普京以及克里姆林宮就不斷強調，烏克蘭自古以來都係大俄羅斯不可分割嘅一部份。

03，烏克蘭嘅抗爭，亦唔係 2022 年先開始。世界各地出現嘅新民族主義，俄羅斯同中國稱之為顏色革命，歐美就話係民粹主義，其實都係同一個新時代嘅現象；背後無乜陰謀，但陰謀論就大把。

04，2022 年嘅呢場仗，歐美雖然無直接參與，但經濟戰其實非常實在。我將呢場經濟戰分成三個階段：（一）歐美對俄羅斯制裁；（二）俄羅斯對歐洲作出反制；（三）新常態嘅出現。

05，經濟戰第一階段，係歐美對俄羅斯制裁。俄羅斯外匯儲備被凍結，盧布購買力大跌，以致俄羅斯國內通脹急升。呢一轉制裁，目的係要令俄羅斯民眾同權貴向克里姆林宮施壓。但結果係，一個利益同權力嘅結構並唔係咁容易由外到內咁瓦解。可以話，歐美對俄羅斯嘅制裁，並無收到預期嘅效果。

06，經濟戰第二階段，係俄羅斯對歐洲嘅反制，尤其係第二季開始減少能源嘅供應。歐美通脹急升，的確令到部份嘅反戰情緒浮上面。不過，歐美並無因此而改變對俄嘅立場。與此同時，俄羅斯以外匯管制阻止資金流失；走得嘅權貴財閥已經走咗，走唔甩嘅亦唔係唔歸隊。

07，結果就係第三階段嘅「新常態」。首先就係歐洲終於要面對俄羅斯嘅問題，就連德國都承認太過依賴俄羅斯；呢條界線係第二次世界大戰以來，最涇渭分明嘅一次。另一邊廂，俄羅斯亦將赤裸裸咁將本身個種地下經濟秩序展現出來。2022 年下半可以話係歐洲同中東嘅走私集團最好生意嘅一年。

08，但我始終相信，俄烏之戰已經步入尾聲。究竟呢場仗最終會點結束？結束之後對世界局勢又會有乜影響？連串問題留返今個星期四 Live 嘅時候再討論。

星期四（2023 年 2 月 23 日）香港時間晚上 2100 ，再同大家開 Live 討論呢場戰爭會點樣完結，以及對世界局勢嘅長遠影響。

今集內容 Youtube 版（會員專享）

https://youtu.be/MwnOIXl9z-o