人工智能教父杞人憂天？ (Patreon)

「⋯⋯就好似你有一萬個人，只要當中有一個人學咗啲嘢，所有人都會自動知道。」 人工智能嘅教父 Geoffrey Hinton

相信唔少人都留意到人稱人工智能教父 Geoffrey Hinton 嘅訪問，焦點亦集中負面嘅問題。但成個訪問我最鍾意，反而係 Hinton 以上嘅描述。

人工智能其實係將知識嘅功能放大嘅技術；究竟有乜唔好呀？點解佢會咁擔心？

佢擔心嘅其中一個原因，係佢怕技術會落係壞人手上。擔憂係合理嘅，不過，停止 Google 或者 OpenAI 嘅開發，都唔係辦法。因為總有其他人一定會繼續科技競賽。反而我認為，要令全世界都可以從呢個技術中受益，嘅唯一途徑就係將技術普及，確保所有人都可以平等地咁用得到相關嘅技術；換句話說，教育真係好重要。

但係，如果壞人掌握咗技術，會唔會大量製造假信息、垃圾資訊、或者假身份？我過去幾個月嘅實驗係，雖然人工智能生成嘅內容，起初好似好有趣，但好快就唔覺得咁新鮮，好快悶。我發覺觀眾亦好快就會察覺到，乜嘢係由 AI 生成嘅低質素內容，情況就好似啲人會慢慢唔睇「內容農場」一樣。（題外話，最近見到有間銀行，用 Midjourney 整張子華神嘅相就話 AI 乜乜，都唔知係唔係咁缺乏創意。）

事實上，假身份證嘅風險更加嚴重；之前我就係因為見到有假冒自己嘅 Facebook Page，先至決定要開始做 YouTube Live ，以建立一個大家都知道唔可能係假嘅網上身份（唔通 Live 都可以假？）；當然，假以時日，電腦最終都一定有能力生成幾可亂真嘅 live video，不過到時先算喇。

目前假身份最大嘅問題，應該係人工模擬嘅語音同 Facial ID。以上呢啲都係合理嘅憂慮，但呢啲資訊安全問題，有好多方法可以克服佢哋，例如：直頭唔用語音同人臉識別。其實我覺得語音認證嘅可信程度好低，可能只係因為銀行仍然好信電話銀行服務，過去幾年又有人發明咗用 voice signature 去做身份認證。但我個人係好唔鍾意呢兩項技術，因為用來做認證嘅兩件事都太外露，完全唔符合保密嘅最基本原則。

Hinton 提出嘅另一個擔憂，就係人工智能會取代人類。我嘅讀者應該知道，從來我都係話：「唔係技術取代人類，而係掌握技術嘅人，駕馭唔識技術嘅人。」

從人類文明最開始嘅時候，技術就一直係咁取代人類嘅工作。馬同牛，曾經係農場上嘅好幫手，之後機械取代埋佢哋。工業化同自動化，已經取代好多工廠工人。人工智能又將會取代一啲白領；最即時嘅，就係好多基層嘅文字同圖象工作者。

要記住，資本嘅本質，就係追求更快、更好、更有效率嘅方法；而資本主義就係連以上呢啲方法都可以私有，可以買賣。所以，近來 AI 嘅發展，就係資本主義嘅一次大躍進。

我已經好耐冇試過對未來咁樂觀。

我唔怕人工智能會落入壞人之手，相反，我相信人類終於要面對一個現實，就係我哋都要提升自己嘅鑑賞力，觀察力以及同理心。無錯，數據安全同私隱問題係越來越重要嘅事，但即使冇人工智能，數據洩漏都已經係好普遍嘅問題。

至於人工智能取代人類嘅問題，我覺得不如積極啲咁睇；反正有好多人唔鍾意做自己嘅工作，所以佢哋應該感恩，終於為有一個低成本方法，可以完成佢哋嘅任務。以前，你有錢可以叫其他人去做呢啲沉悶嘅工作，家陣邊個都唔駛受呢啲苦，大家都可以將工作交畀機器；機器又唔會覺得唔開心。呢個其實係機器嘅缺點，亦係最大嘅優點。

未來嘅世界，我相信會係咁樣：

1. 每個人都需要學習點樣同機器溝通。以前係寫code，而家用人類自己嘅語言就得。但語言都有分好壞；好嘅語言首要條件係思想清晰。當你嘅諗法越清晰、有系統，你同機器嘅溝通就越有效率。我發現，有啲人會 ChatGPT等工具嘅時候，比機器嘅問題問得唔好，結果 ChatGPT 唯有亂畀一啲答案，然後啲人就話機器無用，但其實係佢哋自己唔識去用。記住，垃圾入去，垃圾出嚟（Garbage in, Garbage out）。

2. 無錯，將會有職位會被機器替代；有啲人會諗，佢哋嘅工作係有執照或法例保障嘅，但我認為呢個諗法好危險。因為佢哋行業會有人，可能會搵方法利用 AI，令自己變得更高效，咁樣就可以一個人處理以前要好多人去做嘅工作。或者，唔同行業嘅人力替代率會有分別，但呢個推陳出新嘅現象一定會發生。我哋亦唔好期望政府會救你；佢唔會嘅。我哋要假設，機器將會取替幾乎所有重複、刻板同埋冇創意嘅工作。每個人都要提升自己觀察同分析事情嘅能力、同理心以及創造力。創造力，其實就係將啲好似無乜明顯關係嘅事，好似唔相干嘅諗法，搵到當中有意義嘅關係。

3. 最後，可能係我最唔主流嘅諗法。我認為每個人應該開始將自己每日嘅諗法記低；不論係粗糙定係雜亂無章，只要你有個念頭或感受，就搵個方法記低。相信可見將來，每個人都可以用合理成本去建立屬於自己嘅人工智能模型。但最終你可以點樣使用呢個模型呢？我相信呢個唔止係作家嘅工具，任何人都可以透過機器去作出更好嘅決定。

例如，假設你煮食，試新食譜，你可以記錄返你點解想試某啲食譜，記低你嘅烹飪方法同埋結果點樣。當有一定嘅數據，可能再加啲外部數據源，你就可以擁有一個個人化嘅食譜模型，不但止為你揀選啱晒你口味、預算，甚至乎可以設合嘅最新嘅潮流，創作出有你個人特色嘅食譜。所以，數據資料唔止係記錄，而係一個思考嘅源材料。

將自己嘅 long term member 記低，可以係好重要嘅資產，有啲人甚至稱之為第二腦（second brain）。

但而家你可以自由用任何方法去儲存任何嘢，不論文字、聲音、圖片甚至影片都得；隨住時間過去，呢個數據庫就會變成你嘅個人指南。我以上所講呢個發展，將會比想像中來得更快。

如果我可以補充一樣嘢，就係社交媒體上做記錄，唔係一個好主意；咁做可能方便，私隱問題都係其次，更大問題係最終啲資訊唔係由你控制，所以到時要攞返自己用可能會多啲功夫。Web3 嘅原則，係「去中心化」，即係每個人都有自己嘅地盤。我諗就咁記入電話入面，已經足夠，雖然我知道主要嘅儲存都係雲端，但至少你可以相對容易地咁將數據匯出。

最後，就算記唔攞去做個人化嘅人工智能模形，寫筆記本身都係一個好好嘅方法去反省同思考。例如大家見到嘅呢篇文，就係我嘅筆記。

而我又唔怕公諸同好；因為咁做只會令我嘅諗法，有更多機會透過同大家嘅互動，演化成更細緻嘅版本。我相信以上呢個諗法，亦都會漸漸成為主流。好多人仍然執著於版權，但我相信未來嘅世界，重點不在於版權，而係意念（Idea）；真正有價值嘅，唔係個意念，而係有能力去產生呢個意念嘅人，以及感染力。版權真係死嘅，靠賣版權搵食亦唔係長遠之計。

暫時寫住咁多先，開 Live 如果大家夾得啱時間，可以再講多啲。