中國見頂 (Patreon)

#利世民 直播｜ 外強中乾的 #中國．Peak China．#中等收入陷阱 ．#迷失廿年

2023.05.16 星期二 《經濟學人》最近主題文章，題為 Peak China，話中國已經見頂。中國政府宣傳機器，好似非常不滿；《環球時報》話忽視中國經濟增長，後果自負。 咁好喇，中國咁厲害，美國參議院最近通過決議，要將中國從發展中國家嘅名單度移除。但一向話自己「遲早追過美國」嘅中國政府，忽然又話中國係一個發展中國家，話呢頂帽戴唔落。當然，明眼人一睇就知，美國唔想畀中國借發展中國家呢個定位去享有貿易上不平等嘅待遇，中國就繼續想著數攞到盡。 另外，疫情後經濟復甦並冇預期中順利。通縮反映消費疲弱，資本市場仍然有好多不明朗因素。而且，對中國嘅出口需求，亦未見起色。最近又數據顯示，中國一線城市 42 年來首次出現人口下降。以上究竟係周期性問題，定係結構性問題？唔好忘記，過去十年，中國經歷兩次大規模嘅泡沫爆破，第一次係 2015 年嘅 A 股股災，之後就係房地產市場。任何國家經歷過類似嘅泡沫爆破，結果都會係漫長嘅調整期，有人叫「去槓桿化」，有人叫 balance-sheet recession ；情況就好似日本嘅迷失廿年。 2020 年李克強公開透露，中國仍然有超過6億人，月入低於 1000元人民幣。但自從習近平宣布中國全面小康，中國政府停止公開統計數據。之前介紹過一本書叫做《看不見嘅中國》（Invisible China），書中突出咗中國經濟另一面，即農村經濟。農村勞動力缺乏教育，面對好多公共衛生問題；更重要係呢個正正係「#中等收入陷阱」嘅根源。