阿共打（電話）來怎麼辦 (Patreon)

從前，逢星期六晚都會聽老人院時間；印象最深，就係玩電話。

估唔到，幾十年後嘅今日，竟然會有同樣嘅娛樂。

入正題。有位台灣嘅女生（咁樣叫會唔會地道啲？），去誠品書店買咗一本書叫「阿共打來怎麼辦」，好快，就有自稱係客戶服務嘅人打電話畀佢，話要做市場調查。

「當人傻㗎咩？」一聽就知唔係做市場調查喇。但呢位女生好嘢，玩返轉頭，仲拍埋片。

認真嘅問題有兩個：

（一）誠品嘅資訊外洩

（二）可以見到，神奇國度對台灣民眾嘅資訊戰，幾咁水銀瀉地，用幾咁多人力物力。

順帶一提，5 月 17 日新冷戰系列之台海安危，好多內容來自呢本書；所以內容都幾貼市㗎，到時再講多少少內容，同埋資訊戰。

今日呢篇隨筆想分享嘅係：「神奇國度嘅間諜。」如果大家有留意新聞，都應該有聽到有位「美籍．香港永久居民．藍朋友」梁成運，被判處無期徒刑，原因就係間諜罪。

但由於案情無公開，好多人就單從背景資料，去估佢係咪雙重間諜。我就由於唔鍾意隨便猜測，所以亦唔多講。但見到李家超回應傳媒嘅時候就話：「反映國家安全風險不能掉以輕心。」

喂 究竟呢個神奇國度，有幾咁杯弓蛇影，幾咁神經緊張？反而你睇台灣，當民眾遇到國產零零柒，拍條片，放上網，笑吓囉。

呢個就係兩個社會嘅最大分別。

講返我自己。過去三年，返咗去美國之後，好少接觸香港人，更唔會接觸任何中國人；唔係我好憎佢哋，亦唔係因為我驚佢哋係國產零零柒，而係我費事佢哋以為我係「鬼」。 費事喇，隨緣喇；有緣交到朋友，咪傾多兩句，亦唔會刻意去接觸其他人。

又唔怕同大家講，其實都真係有國產零零柒扮讀者接觸我；但三幾句就知道係乜嘢事。通常佢哋會好關心我有冇同呢度嘅香港朋友「搞啲乜嘢」。

「有乜好搞吖。」我唯有如實作答。

但因為到處都係呢啲國產零零柒，令到我哋香港人之間，好難再信任別人；就算去到外國，一樣係咁。

另外，睇 47 人案嘅案情，先知到原來國安警，係會去啲唔同嘅 Facebook Page 留言。 問題係，明明國安法係 2020 年 6 月先至生效，點解之前發生嘅事，已經有國安警留言嘅？

當然，我都知道未有國安法之前，就已經有專門招呼政治人物嘅警員，只係想像唔到佢哋會得閒到留言。

其實如果係想改變輿論民情，點解佢哋留言係咁⋯⋯粉紅出征嘅？有用咩？

我有幾個可能嘅解釋：（一）要說服別人，首先要說服自己；佢哋嘅紅，真係由內到外再到返內。（二）佢哋嘅 line-to-take ，就係咁僵化。因為怕偏離軌道，度 line-to-take 就唯有百搭又簡單，等前線幾時任何時候都可以跟到足。

鬧人，就最易。

所以，戰狼外交又係咁。搞搞吓，舉國上下嘅 line-to-take ，都變成「搵交來哎」嘅各種四字成語。有冇效唔緊要，最緊要係唔會錯；正是做咗當得咗。

我亦發現，每次貼同黎智英相關嘅內容，都會引來一班咁嘅「小粉紅出征」。開頭我以為，只係因為個題目切合演算法。後來我發現，留言嘅網軍網警，99.99% 都係得個兩、三個朋友嘅新帳戶 。

咁有組織嘅行動，要唔少人力物力。真係，有正經嘢又唔見呢個政府去做，無謂、無結果嘅事，就畀咁多心機。

呢個咪係點解個政府，越做越差囉。