十月會員專訊 (Patreon)

首先，多謝你嘅支持。之前應該多謝過，依家再多謝一次。個個月都多謝。

唔怕同大家講，YouTube 廣告其實幾好搵。我計過，有 4 萬幾個 subscribers ，每個月就大概有 4000 美元嘅廣告收入。所以有一排我寧願做 YouTube Live 都懶寫文。

不過，YouTube 並非我好鍾意嘅平台。有啲朋友問我：「利世民你平時睇邊個 KOL 㗎？」唔怕話畀大家知，我主要睇嘅有啲講象棋，有啲講數學，有啲講物理、哲學，好少睇社會時事嘢。

順帶一提，其實就算新聞我都好少睇，主要都係靠大家響 Whatsapp / Telegram Group 嘅分享。

會員 WhatsApp Group

會員 Telegram Group

所以，如果未入，就歡迎大家加入，順便 feed 啲題材畀我；鍾意入邊個，隨便你，兩個都入晒都得。

YouTube  頻道私有化

早兩個月我已經有個念頭，就係漸漸唔再公開發表咁多嘢。唔係話怕得罪人，而係我發現追求觀眾、讀者人數，會令人變得為演算法而分享，內容躁底兼庸俗。另外，亦都係因為有啲九唔搭八嘅網絡暴民，令人感覺掃興。所以，到最後我決定，提早將 YouTube 頻道「私有化」。

每個月 1.99 美元，就隔絕噪音，又唔駛播廣告，耳根清靜，我又舒服咗好多，值得。

但係每次改變都會帶來新嘅問題。有啲 Substack / Patreon / Unsubject 嘅會員話：「我睇唔到 YouTube 啲片喎？係唔係又要課金呀？」

雖然我知有啲朋友唔介意 1.99 美元，但咁樣唔係幾好喇。畢竟，應承咗大家，一個會籍，世界各大平台通行。不過，YouTube 嘅會員制度又無得贈送，所以我諗咗個折衷嘅方法，就係每條片都另外 upload 一條 unlisted 嘅專畀 Substack / Patreon / Unsubject 嘅會員。

之前，我每條片一出，都會有多一篇文 ＋ Podcast 版，再加埋呢條 unlisted 嘅片。但可能太多嘢，又有啲讀者錯過咗。

所以，登登登登，我又整咗個 Substack / Patreon / Unsubject 會員專享嘅 YouTube Playlist

會員專享 YouTube Playlist

大家 Bookmark 咗佢，又或者用各種方法去記住喇。

經濟學實驗：價格歧視

早兩日我寫咗篇講「價格歧視」嘅實用經濟學，唔知大家睇咗未。又唔怕同大家講，寫呢篇文嘅初衷，其實係想好迂迴咁話畀聰明嘅讀者 / 觀眾知，點解 YouTube 收 1.99 同 4.99 ，Patreon / Substack 就收 15 。

係，其實我真心覺得，YouTube 上面太多人，真係嘅 optimality 會低好多。Patreon 同 Substack 雖然個 crowd 有重複，但真係唔一樣的。

過多兩、三個月再同大家報告一下我呢個「價格歧視」嘅經濟學實驗。

最後，祝大家中秋節快樂；離散世界各地嘅香港人，千里共嬋娟。