Checo背城借一 孤身上路｜一日一 F1｜第三季（8/30） (Patreon)

你每個選擇，都係最好嘅選擇。有人咁講。我心諗：WTF❓

呢句嘢其實係指：你嗰刻嘅選擇、對嗰刻嘅你嚟講，就係最好嘅選擇。十五歲嘅年少 Checo，選擇一張單程機票，一個人就咁飛咗去德國。

墨西哥鄉里曾經咁樣問呢位 F1 車手：二〇〇五年得十五歲嘅你，一個人喺德國住有幾難❓

Checo話：「你可以諗返十五歲嘅自己，放棄曬所有嘢 —— 放低所有朋友、親人同個屋企，一個人搭一班機去追夢。墨西哥人呢～我哋一般都係大家庭，所以特別難。賽車唔難，難嘅係生活。」

係嘅，十五歲呢個年紀，其實有啲尷尬。係年青，但又唔年幼喎。香港前 F1 development driver 方駿宇都遇過咁嘅情況，十幾歲先一條友過英國中部開始鬥車。結果，唔多適應。

十五歲，一般已經讀緊中三或者中四，無溝女都應該有班同黨或者死黨。然後突然被「時光機」吸走，拋到一個無朋友、「無屋企」、冬天日照時間比墨西哥短三至四個鐘、天氣可以又濕又凍、早午餐通常都係凍冰冰、豬手同腸仔就係美食嘅陌生國度——德國，可能真係有啲 kick。

Checo 嘅贊助人 Carlos Slim Domit（前世界首富 Carlos Slim 個大仔）咁樣講：「如果有分別嘅話，Checo 同其他嘗試殺上 F1 嘅車手嘅最大分別就係佢嘅態度。

「唔只係 talent，係佢嘅 attitude —— 佢真係做到 never give up 嘅態度。」

態度決定命運？用二十四字講翻，就係經典金句？態度決定行動，行動決定習慣，習慣決定性格，性格決定命運？可能係。二〇〇五年第一次喺歐洲鬥車，Checo 就喺 Hockenheim 舉行嘅寶馬方程式比賽同 Nico Hulkenburg 一齊上台（前文）。

二〇〇七年，Checo 移居英國牛津鬥英國三級方程式，贏咗 National Class 冠軍。〇八年，Checo 繼續鬥英國三級方程，亦鬥埋 GP2 亞洲系列賽。〇九年升班 F1 support race GP2，一〇年獲得 GP2 總亞軍。

圖上：二〇一〇年五月 GP2 摩納哥站

二〇一〇年十月，法拉利宣佈簽 Checo 做佢哋嘅 F1 青訓車手，customer team Sauber F1 亦宣佈 Checo 二〇一一年升班 F1，取代外號「Quick Nick」嘅 Nick Heidfeld。

二〇一一年，Checo 登陸一級方程式，拍檔「二年生」小林可夢偉。從十五歲背城借一、飛到德國開始歐洲賽車生涯，到二十一歲飛到澳洲開始 F1 賽車生涯，再到二〇二四年嘅 Checo，將會三十四歲。時光飛逝。

呢個冬天再寫嘢嘅我開始懷疑：雖然呢刻可以力有不逮、雖然下次可以出力啲，但同自己比嘅話，每個 F1 車手喺嗰刻，應該都已經盡咗嗰刻嘅最大力。

Red Bull 好景唔會永恆，平治逆境亦唔會一世，唯有利 keep 到（笑）。以 Checo 自己嚟講，二〇二四年嘅關鍵係乜呢❓年底滿約前續約。

可以點？Checo 唯一可以做嘢，就係喺躁動與不安嘅...... F1 世界裡，適度依靠同路人、但又唔怕有時孤身走我路，keep 住 never give up 嘅態度，嘗試以一啲都唔平常嘅「平常心」應對內外腦交戰。收。放。

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。