「山士」F1十年樹人｜一日一 F1｜第三季（9/30） (Patreon)

十年。二〇二四年 F1，有兩個車手開始佢哋嘅 F1 第十年。

荷蘭人 Max Verstappen 係一個。另一個就係佢當年嘅 Toro Rosso 隊友 —— 辛斯仔（Carlos Sainz）。

雖然第十年鬥 F1，但其實佢係叫 Carlos Sainz 定 Carlos Sainz Jr 呢？粵語叫「辛斯仔」定「山士個仔」？定可以直接叫翻佢「山士」呢？十年，是咪時候正名呢❓

從粵文（粵語白話文）或者粵語嚟講，老豆同阿仔好少同名，但其他語言好似西葡語系就一啲都唔出奇。例如：巴西足球員尼馬同老豆係同名㗎，所以叫「Neymar da Silva Santos Júnior」。Júnior 嘅意思就係尼馬「個仔」、尼馬「仔」。

至於辛斯仔呢？佢入 F1 前，其實一直都係用「Carlos Sainz Jr」、「Carlitos」或者「Carlos Sainz 個仔」呢個名去鬥車。佢喺 F1 新人嗰季曾經講過（二〇一五年），鬥吓、鬥吓，連喺西班牙嘅人都覺得佢有得鬥 F1，係因為佢係「the son of」。咁點算呢❓

呢個關於阿仔同老豆之間嘅身份認知互動，其實幾有趣。即係究竟我係老豆個仔？定係我就係我？無老豆、就無我，但老豆有我之後、都唔再只係以前嘅人夫。我既係我老豆，我亦唔係我老豆。我要學識自立，又要飲水思源。

結果，辛斯仔話：「但係 F1 從來都無 Carlos Sainz 喎，所以我唔需要 Jr. 呢個字。我想 demonstrate 俾人睇，我可以喺 F1 自立。我鍾意我個姓、我愛我老豆同佢嘅成就，但我需要搣走『son of』呢個標籤。」二〇一五年九月《F1 Racing》雜誌咁樣報導。

粵語評述有個位，係我都唔多為意。就係有啲暱稱，其實係經唔起時間洗禮，好似 Kobe Bryant 唔會永遠係「高比仔」，Lewis Hamilton 唔係永遠嘅「咸仔」。所以，辛斯仔無可能一直都係「辛斯仔」。咁，就得意喇。

因為我今年真係有諗過，辛斯仔呢個名無可能叫一世。咁啱二〇二四年，將會係 Carlos Sainz 喺 F1 嘅十年樹人。既然唔再係「仔」，咁不作他選，就叫呢個名。

為咗向粵文/粵語汽車同體育傳媒例如《車主》雜誌、《奪標》雜誌同埋電視節目《體育世界》嘅前輩致敬，二〇二四起我會改口、直接叫返 F1 車手 Carlos Sainz 做「山士」。希望大家 OK 同接受。

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。