四件你唔知嘅「山事」｜一日一 F1｜第三季（11/30） (Patreon)

佩雷斯外號「Checo」，艾朗素外號「El Nano」，其實「山士」Carlos Sainz 都有個外號叫「Chilli」——辣椒仔。

點解叫「辣椒」呢❓原來同酒精有關。話說，有年 Sainz 同朋友開 party。班 friend 最初係叫佢 Carlos 嘅。不過班友越飲越多，Sainz 個名就由 Carlos 變 Charlie、最後唔知點解變咗 Chilli。

二〇一五年嘅 Sainz 同《F1 Racing》雜誌強調，呢個名「同我係咪 spicy 無關，而係同朋友飲酒量有關（笑）。」

當年作為 F1 新仔嘅 Sainz，同年搬咗去倫敦，住正喺英超球隊車路士主場隔離：「我住喺醫院（Chelsea and Westminster Hospital）旁邊嘅 Fulham Road，聽落好似好型、不過我交嘅租其實平過喺 Milton Keynes。所以，我搬得好開心。」Sainz 住倫敦嗰陣唔會揸車，主要都係搭鐵（tube）同巴士。

二〇一五嗰年，「車仔」有艾斯比列古達同法比加斯好幾位西班牙球員。但係 Sainz 係皇家馬德里球迷，所以就算當時住喺行幾百米就去到史丹福橋球場嘅地方，佢都無話一定要入場「睇車」。

倫敦多嘢玩，又真係無必要去睇唔係愛隊嘅比賽嘅。況且 Sainz 個人就係：「當我無聊嗰陣，我就有啲 crazy idea。」佢嘅五十五號 F1 車手號碼，就係忽發奇想咁嚟。

「我最鍾意十九，不過 Felipe Massa 用咗。第二選擇係五號，不過亦比 Sebastian Vettel 用咗。然後我見到自己個名 Carlos 同 Sainz 中間有兩個『S』字，望落就同『55』一樣，所以就用五十五號。」創意。

五十五號仔嘅新人揸「細牛」（Toro Rosso），嗰年架車有料到，戰鬥力間中比「大牛」更好。Sainz 話架車快係好事，但係俾人要求佢贏歷卡度（Daniel Ricciardo）同基亞特（Daniil Kvyat）就唔過癮喇。

因為當時「大牛」嘅 budget 係「細牛」嘅四倍，「細牛贏大牛」呢件事根本唔應該發生，而 Sainz 當時亦唔希望呢個成為新趨勢。二〇一五年 Toro Rosso 隊友對賽紀錄，Sainz 季初頭七場五比一領先加一場雙雙 DNF，惟最後以七比十敗給 Verstappen（共加兩場雙雙 DNF）。

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。