F1經典神器「風繼續吹 diffuser」（上）｜一日一 F1｜第三季（12/30） (Patreon)

神器同潮流一樣，都係來回又折返。時裝潮流係咁，F1 神器都係。

最新神器就係二〇二二年回歸、自上世紀八〇年代被禁嘅 ground effect 戰車。咁上一件令人特別記得嘅神器呢❓

可能就係自二〇一〇年初再次成為潮流，用廢氣提升 diffuser 效能嘅 off-throttle exhaust-blown diffuser。工程師透過聰明嘅引擎管理系統，令引擎喺油門* 無論開定閂嘅時候、都喺死氣喉繼續吹風去 diffuser，從而於彎路製造更大下壓力（downforce），令車手可以掟彎更快。

*丹註：雖然 throttle 或者「油門」泛指成個控制引擎 power 嘅系統，但嚴格嚟講，throttle 係一個增加或減少引擎入風量嘅「風門」。

馬照跑，風照吹，風繼續吹 diffuser。二〇一〇年 F1，點解無端端要咁做❓

常理：踩油門 pedal、引擎「風門」開、廢氣多（動量高 high momentum ）。不過，當代 F1 車嘅廢氣唔廢。廢氣多，等於有更大嘅有用下壓力。同理，當你「縮油」、「放油門」、throttle 閂或者「風門」閂嗰陣，當代 F1 車所製造嘅下壓就會減少。

當年 F1 工程師玩嘅就係：如果我「縮油」、但 throttle「風門」照開、唔閂，咁是咪可以追加翻失去嘅下壓力呢？

但係......但係......車手「縮油」或者「放油門」嗰陣，「風門」應該無可能照開、唔閂㗎噃❓

其實呢，係得嘅。如果你 cut 咗引擎嘅油（fuel）、cut 埋點火（spark），個引擎其實就變成一個大氣泵。咁踩「油門」嗰陣，引擎就由入氣口吸入大量生風，經「風門」吸入 chamber 壓縮，再從「死氣喉」排出。不過，今次就無燃燒入面嘅氧氣。

F1 車隊早喺二〇一〇年已經咁玩，現任 F1 CTO Pat Symonds（圖上）二〇一一年七月跟《F1 Racing》講話：「從電視直播聲、畫嚟講，初頭係唔明顯嘅。不過，喺場邊就可以聽到當 engine braking 嗰陣，引擎會有怪聲、有一種好似被勒住（almost strangled）咁嘅聲。」

然後，「風繼續吹 diffuser」喺二〇一一年繼續進化 —— 變成「熱吹」（待續）。

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。