星期六命案(3) (Patreon)
Content
師傅其實都有玩嗰啲股票群組,都有出席過好多聚會架。
若干年前,師傅仍在香港,係活躍於幾個群組,喺裡面做乜?嗰陣仲未係全職做術數,所以唔係講風水,而係喺啲股票群度交流下,吹下水,我諗好多人都係咁。
而且我嗰陣識命理,其實都幾受人歡迎,啲群友郁下就叫贈兩句,咁師傅我嗰陣都未係全職,咁都會係咁意贈兩句的。
群內乜人都有,可以說是來自五湖四海。
但一班人,傾得好投契,每一日,都有好多個留言,由開市前留意什麼股票,開市後邊隻當炒,收市賽後檢討,收工後吹水一番,其實大家的感情,有進冇退。
此時,來了一個新入谷的人,他是Marco[化名],好細個,識佢嗰陣,至少比我年青十四五年。
其實Marco入谷後,群內氣氛,冇乜大變化,只係佢為人較大氣焰,注碼都一樣大。
Marco有一日留言:早上輸了六十萬,下午追返六十萬,再倒贏九十萬。
大家一陣嘩然!
其實大家一早已知佢注碼不細,上落大。
因為我哋谷係以炒細價垃圾股即日鮮為主,當然再加上一些財技分析,所以有人愛坐,有人愛daytrade,但共通點係,大家都愛贏錢。[笑]
師傅自從大學畢業後不夠十年,已行完咗自己的偏財運,嗰陣乜都唔識,人哋俾冧把,亂咁買,又升,贏第一桶金,仲中過三次六合彩三奬。
不過已經係N十年前的事,過咗個偏財後,未正式統計,之後係輸返突。
一物一太極,人本身也有一個太極,大運就是其變化,變,就是指,你好運,不會跟你一世,衰運,也一樣,可能隨時會離你而去。
所以師傅知所進退,而家已經好少玩,無寶不落,也一定不會大注,更一定不會ALL IN,也一定識得止蝕。
Marco:你唔係呀?咁早沽?
我:係呀,我細胆嘛。
Marco:又話財技人。
我:冇計啦,冇財運,信命。
咁Marco炒開乜呢?手法既嘢,我就唔喺度公開了,但我大概知係點啦,師傅好多時喺某啲盤度,會見到佢[或好可能係佢/又或者係佢同一間行同手法的炒友同事],喺嗰隻股票度出現。
某天,我在群留言:隻9413[暱稱]係咪Marco玩緊呀?本來升得幾靚,但好似係佢出緊貨既手法,嘩唔敢玩呀。
B仔:似係喎,唔好掂佢啦。就算唔係佢,都可能係佢啲FRIEND呀。
我:好啦,咁我繼續工作啦,唔玩好地地呀,輸咗俾佢又冇得問佢攞返。
於是乎又睇返電郵,心神又再度返回工作。
有一日,群組搞手,搞活動去打邊爐,師傅一向踴躍參加。
二十五個人出嚟,唔知幾多個人帶酒,總之成張枱都係紅酒白酒香檳之類。
當大家飲飽食醉,眾人開始拎佢哋個盤出嚟,叫我贈兩句。
咁都冇問題的[註:贈兩句係一眾術數家最唔鍾意聽到既說話],我飲到咁,你都咁放心叫我睇,我就睇啦。
問到咁上下,Marco走過嚟問我,佢下年點[因為時逢年底]。
我一睇,嘩下,呢啲八字,係天生的天才型八字,學乜都好快上手,而且能很快洞悉遊戲技巧,眼明手快,你仲諗緊既時候,佢已經做完兼且袋埋錢。
我:唔怪得之你炒嘢咁叻啦。
Marco:X,咪講呢啲啦。我下年點?係咪好大鑊?
我:做乜咁問呢?你搵個人睇咩?
Marco:係,問咗四五個師傅,個個都話我PK。
我:係咪架?俾我睇下。[睇佢個命盤]咦,係喎,下年重印尅食傷,搞唔掂喎,注碼細啲啦,財運欠佳呀喂。
Marco:X!痴X綫![夾住一大堆粗口行開咗]
是旦啦,唔知係佢醉,定係我醉咗啦。
如是者,又過咗幾個月。
群組內仍然係小媽拆蟹,此起彼落,贏咗的人猛咁講,輸咗的人收埋唔出聲,氣氛依舊。
如是者又過咗幾個月,群友B仔有日PM我:喂,近排,唔係好見Marco喎,好似成兩個月冇出聲咁滯。
我:咦,你唔講唔覺,一講我就覺。佢搞乜呢?真係有兩個月嗎?群組每日過千個帖,你點知架?
B仔:我估之嘛。
於是乎,我PM群主牛雜[化名]:知唔知Marco咩事,近排咁靜。[心裡頭開始有點不安]
牛雜:拿你唔好話俾人知呀,佢輸咗幾百個,我都唔知佢去咗邊呀。
我:吓,點解呀?
牛雜:佢有次又係唔係咁順,朝早輸咗七十幾萬,咁食完個午餐,諗住好似平時咁,下午贏返佢。點知下午越輸越多,如是者,連續幾日都係咁,可能想行開下啩。
我:喂炒股咋喎,又咁嚴重咩?又唔係炒期。
牛雜:嚴重就唔係好嚴重,不過佢嗰個都係孖展戶口嚟的。
啊。。。
加埋我,有五個人話佢嗰年流年不利,佢都唔信,仲係玩咁大,於是乎,大破財收場。
*按:星期六命案,是指師傅會在某一些星期六,會分享一些命例個案的故事給大家,並不是一件星期六會發生的命案。記著,只是故事,請勿對號入座。