星期六命案（５） (Patreon)

大概八年前的一個秋天，老友社工阿黃打俾我，話有個朋友想批命，佢會自己直接搵我。

阿黃：師傅，我有個朋友，佢好慘的，想睇下佢個八字係咪冇運行，佢會打俾你。

我：朋友？定係client呀？

阿黃：咩都好啦，我都同佢傾過架喇，不過佢都想喺唔同範疇有咩可以幫到佢。

我：喂你社工嚟喎，你都幫唔到佢，你嚟搵我？

阿黃：我已幫咗佢好多，佢話想知道自己條命係點喎，係咪生成係咁。喂，記住收佢平啲。

我：喂，大佬，已經好平啦。。。。

又過了幾天，手機響起來。

我：喂，你好，邊位？

對方：你好，係咪師傅呀，我係黃生介紹嚟的，想搵你睇下條命架。

她的聲音很斯文很正常，完全不似有很嚴重問題需要幫忙的。

我：批八字嘛？好的，約個時間丫。你叫什麼名字?

對方：叫我Kimi就可以。

我：好的，出生年月日時丫。

＊＊＊＊＊＊＊＊＊＊＊＊＊＊＊＊＊＊＊＊＊＊

還記得出來當日，都是在星巴克，但已忘了在哪一間。

我：哈佬，Kimi，你好，係呢，之前你試過搵人批命未架？［通常師傅都係同第一次見的新客戶咁樣打開話題］

Ｋ：都有聽過，不過想聽多幾個，知多啲，因唔同師傅講啲嘢可能唔同。

我：好的，了解，有咩特別問題想問？咁我重點講嗰啲，如果唔係我就咁由頭講起。

Ｋ：呀係，我想問下姻緣，同埋我係咪行緊衰運？

我：姻緣嚟講，可能遲婚較有利［因為佢當年都只是廿十中的年紀］，桃花較弱，不過你個夫宮兩邊都有合，咁睇又可能會有啲桃花劫都唔定，而且暗藏你男友的桃花，似乎係你男友的桃花較旺啊。而且你的競爭對手較多，或者會多角戀都唔定。

Ｋ：吓咩係桃花劫呀。

我：其實範圍都好廣下，即係佢鍾意你你唔鍾意佢，成日煩住你又有；話鍾意你其實又唔係真係鍾意你又有，即玩弄感情又有，即總之係因感情事而令到你受傷害的啦。

Ｋ：唉。

我：咁你做乜職業架？［淨係睇個八字係唔會知對方做乜職業架，好似中醫咁，要望聞問切］

Ｋ：吾。。。。

我：好，唔緊要。咁至於你係咪運滯呢，而家啲運麻麻地，要去到你走火運時先會有改善。火運即係２０２４後啦。咁而家雖然木運，但被你原局既金沖尅，所以雖然火有木所生，但因為咁，財會被劫走，你搵幾多，可能都袋唔穩架。 

Ｋ：２０２４咁耐？！［按：當年是２００９／１０咁上下］咁男友呢？ 

我：男友咩先？ 

Ｋ：我同佢會唔會有結果？

我：如果而家呢，佢既桃花好旺，你多競爭對手，而佢桃花星呢個大運不斷會有來來去去，所以你都要注意，睇實佢。不過八字嚟講，喺你八字睇到既對方，係弱既，咁即係佢而家發展都麻麻地，都係要遲啲先會好。

Ｋ：唉，明白。我唔想同佢分手，但而家真係好辛苦。

我：你現在感情事真係麻煩啲架，如果佢真係好似命盤咁講咁花弗，咁你要考慮下要唔要改變一下現狀。［唔通感情事一律建議分手係千古不變既定劣嚟？］

Ｋ：知道了，遲婚丫嘛。

。

。

。

批完命之後，Kimi好似死狗咁慢慢離開，睇得出佢好唔開心。

＊＊＊＊＊＊＊＊＊＊＊＊＊＊＊＊＊＊＊＊＊＊

過了幾個星期，阿黃搵我食飯。

阿黃：喂，唔該晒你呀師傅，幫咗Kimi批命。

我：做嘢啫，我都有收錢架喎。

阿黃：佢最後同佢男友分咗手。

我：啊，咁快，我都係建議，佢自己最後決定。

阿黃：其實佢係出嚟做援交的，佢男友欠落人週身債，迫佢出嚟做還債。

我：吓？！乜話？咁既賤男都有？我同佢見面時，又睇唔出喎，佢咁斯文。識著個咁既賤男又係好慘。

阿黃：係呀，因為佢都知唔掂，但又唔想分手，又話唔捨得，咁咪叫佢搵人幫手囉。

我：估唔到係咁。。。。。

阿黃：係呀，咁都叫做幫佢解脫咗丫。

我：喂，咪住先，你同佢咩關係？

阿黃：噓，細路仔，唔好理咁多，食嘢啦你。

我：喂，咪郁手郁腳好喎。

＊按：星期六命案，是指師傅會在某一些星期六，會分享一些命例個案的故事給大家，並不是一件星期六會發生的命案。記著，只是故事，請勿對號入座。

—完—