婚姻出問題？邊度出問題？ (Patreon)

一對夫婦感情或婚姻出現問題，有玄學術數幫唔幫到手？師傅唔係什麼夫人信箱，不過以術數角度去分析究竟邊度出問題，係可以的。

咁用什麼方法？

識幾多樣就用幾多樣，有時未必單一個方法可以分析到。

我有一個朋友，認識咗有八年咁上下，我識佢嗰陣係一個青春少艾，而家已經係兩子之母。最近佢搵我睇風水，原因係公司唔做，佢被遣散了。

咁我幫佢睇既時候，問下佢有啲咩想催旺或加強，又或者有邊方面想改善？

其實佢係乜都唔識，佢只係想好啲。

咁我話公司遣散，係不幸事件，唔關你事。

而呢間屋，其實都好好架喎，間主人房係旺工作的，我問佢老公搬咗入嚟幾年，有冇升職先？

佢話有，仲好受老細重用。

我當然會再幫佢催旺事業位，希望佢可以盡快搵到新工。

然後佢話，仲有呀，佢同老公成日嗌交，佢以經唔係一次話想同佢離婚。

咁大鑊？

我再重申，你間屋啱晒格局，房啲位置又入晒財位，冇打交位，有啲唔關事的位，我都幫佢化埋啦。

其實我已經排除咗間屋既問題，因為佢同佢老公，喺舊屋都係咁。

於是乎，我同佢講，與其係話你哋嗌交，不如話係你單向地閙你老公。

佢先生係好就得佢，聽晒佢話，罵不還口。

我話，其實你喺屋企，你係話事嗰個，你係食住你老公，喺屋企好似個政霸咁。

佢遮住半邊咀笑，佢話係。

我之前未睇過佢個八字，我識佢其實成日笑，冇乜閙人，不過原來佢個八字，喺屋企就十分威武。

我話，你老公都係好好喇，就晒你，我唔知你為咩嗌交丫，但你鏟佢時佢都冇還你拖，就晒你，都係好男人嚟啦。

佢話都係既，不過真係忍唔住。

我話如果你係因為嗰啲牙膏要喺後面擠，又或者係痾完尿廁所板點樣放呢啲問題而嘈交，咁其實好唔值得。

佢笑而不語。

我話呢個係睇你兩個個命盤先睇到。

一個霸道，一係聽話，本來應該係幾夾的一對。

大家會問喇，師傅，咁聽話嗰個好唔公平喎，咪好慘，日日俾人閙，冇得還口。

呢個係佢個個性嚟，你想改變都改變唔到，佢知太太脾氣唔好，就晒佢，咁唔係好事咩？除非佢會去到一啲會發脾氣，或者會衝到夫妻宮的大運流年。

你又諗下，如果兩個都係霸道之人，惡霸對惡霸，如一早發現還好，是但一方扮忍讓，到結婚是變返霸道，互不相讓，日閙夜閙，結果就好快會分手。

咁你話，唓，分手咪分手囉，師傅你咁老土守舊架，而家咩年代呀。

呢個就係問題所在，要解決問題，從根本著手，如果你知道自己係咁，想有好姻緣，咁要點呀？

如果知道自己脾氣差，問題出喺自己度，如自己不去改，不去面對，同邊個一齊，最後都係離婚收場，擺咩風水都冇用。

其實唔只係女，其實男同女都係一樣。

如果唔想改變自己去遷就他人，都可以的，其實自己一個更開心。

互相體諒，互相忍讓，就係維持一段關係的金科玉律，命理如是，現實如是。