伴侶話查過同你八字唔夾，所以要分手！ (Patreon)

因為見到網上一篇短文，作為一個命理師的我，有必要為呢件事發下聲，因為我都算係業界一份子。

咁究竟，呢一件事，係邊個唔啱呢？

好似facebook呢篇短文咁，成件事就有問題啦。

八字係要相信，但唔可以過份迷信，以及有違道德。

首先，要認清呢個男／女朋友，係咪假借呢個大話，想用藉口撇你。

你搵個師傅夾，咁我又搵我個師傅夾囉，喂你嗰個話唔夾，我嗰個話夾喎，請問你用緊嗰個係邊位師傅，你可以又去夾一夾，睇下邊個講大話，又或者有冇出入。

另外，結婚拍拖，係兩個人的事，阿媽咁同你講，又唔係阿媽要結，如果你真係鍾意佢，你就算真係唔夾，都會同佢一齊啦。

師傅，你咁講，咪即係倒自己米，咁夾八字愛嚟又有乜用啫？

如果以古代嚟講，係有用的，因為古代係農村社會，人民要大量人口，落田耕種，所以，如果你娶老婆，或娶妾侍，你必定需要傳宗接代，所以如果娶到一個尅夫，或不能為丈夫的家族傳宗接代，無後，尅子女的話，咁的確對於男方一家嚟講，係一個問題嚟的。

現代女性如大家般，聽到後必然未能接受，不過師傅只係講出古代的情況，唔代表呢方面要一樣咁應用，因為而家好多家庭，都唔生小朋友，咁夾你把咩，係咪先喇。

但其實，現代夾八字，我嚟講，係首先有一個守則，要唔影响到呢一對準新人的心態。

即係話，如果你哋已拍了拖九年，來夾八字，跟住個師傅話你兩唔夾，收皮，可以分手了。咁呢個行為，其實係犯了業障。

點為之夾？點為之唔夾？喂唔係一個沖下個生肖，咁就話唔夾架，人哋辛辛苦苦維持了九年的感情，俾你一句就插了條刺落去。

咁點丫，你講呢啲嘢，要有解決方案架。

首先，作為一個命理師，要搵出個問題所在，即係唔係話呀生肖相沖冇得搞。喺我眼中，生肖相沖其實並沒有問題，咁唔通你同個仔生肖相沖你就唔要佢？唔會架嘛。

假設，喺八字之中，如果某方是尅夫，或尅妻，即係一方有尅住另一方之問題，最佳方法，係少見面，即一方做一啲經常出差的工作，一來命理上，咁尅對方的力量會減半，小別又勝新婚，係好事喎。

我也見過，一個返早班，一個返夜班，淨係星期六日先見到咁滯。

喂，唔係咁美滿喎，盡量就啦，我都知幸福唔係必然，你話咁就咁咩，唔通我而家辭職呀？咁一係辭職跳糟，一係分手／離婚／或被尅死。你自己都有權選既。

另一啲就係火爆脾氣，如果一個凹，一個凸，咁就冇嘢啦，一個要話晒事，一個冇主見，咁就完美配搭。如果兩個都冇主見，咁人生都幾悶。如果兩個都火爆性格，火星撞地球，咁就大鑊了。

兩個都要話晒事，兩個都燥底，兩個都唔會讓對方，兼且火爆個性，咁就死的，唔駛嚟夾八字，遲早都離婚。咁命理師喺呢一個環節，可以做的，就係叫大家婚後忍讓，一係就早啲諗清楚係咪一齊，因為結果亦是得一個，如果兩方唔互相讓步，日嘈夜嘈，與其之後離婚，不如結婚前分手。

反而呢樣嘢，我哋有責任話俾佢哋知， 因為有啲拖友，拍拖時係咁，以為嘈下嘈下，嗌交是情趣，以為咁可以一世。但結婚後完全兩會事，由其係生埋小朋友，嗰啲拗撬多得你無法相信，所以結婚前，絕對要諗一諗，如果結婚，其中一方，必定要忍讓，或者要好似用之前小別勝新婚嗰種，少見面的策略，減少嘈交。

如果自己有術數底子的，喺識男女朋友時，對某個男仔或女仔有好感，想追求佢既時候，如果可以有佢出生年月日，甚至時間，睇下呢個男仔／女仔，八字上有冇好大問題，又或者同自己性格好唔夾，咁喺感情未發生前就停止，好過追到手，拍了拖一段長時間，先至發現問題，到時已經浪費咗大家好多的青春了。