風水小智識（１） (Patreon)

最近喺社交媒體，見到唔同嘅師傅，分享風水心得，百花齊放，本來是好事，不過如果見到一啲，百思不得其解的，咁我就要拎出嚟研究一下，又或者分享一下我嘅心得喇。

之前最熱話就係，用長型銀包有助財運啦，呢個真係經典嚟，古時候啲銀票，睇電視劇時，啲達官貴人，都係放喺啲衫入面，喺個身度抽出嚟，都唔見佢哋用銀包，就算佢咁有錢。

如果佢哋要用長型銀包，唔整巢啲銀票，咁個銀包咪成個喼咁大個先得？

好喇，言歸正傳，我最近又見到一個PＯ，係講龍形風水嘢，放的話，要留意啲乜？

PO度話，擺錯咗就會HＩＨＩ了。

其實坊間都唔會太多師傅，叫人放隻龍喺屋企，因為未必識用。

咁佢繼續話喇，龍喜水，所以要放近水嘅地方，或者放喺北面，因為北面屬水。

龍係咪喜水我就唔知，因為我就未見過一條真嘅龍，不過說卦傳有咁講的：

［震為雷、為龍、為玄黃、為敷、為大塗、為長子、為決躁、為蒼筤竹、為萑葦。其於馬也，為善鳴、為馵足，為的顙。其於稼也，為反生。其究為健，為蕃鮮。］

即係龍呢樣嘢，係屬震卦，即係五行屬木，咁水生木，所以龍喜水，又可以說是合理。

但放喺北邊，咁我就唔係覺得好啱，因為龍嘅然屬木，雖然北方係屬水，咁假若宮位理氣為土旺，再放隻龍（木）去尅佢，似乎唔太好噃，呢樣只係假設，最好自己搵個答案出嚟，睇下你家中坎方理氣是否土旺，如果係，咁咪試下放下，睇下頂唔頂得住。

至於佢話，咩群龍無首，或者龍虎之爭嗰啲，就算吧，因為都係想搵多啲嘢寫下。

佢最後有一張圖，係話，如果係龍的掛畫，要用金色畫框嚟配合喎。

咁就大問題了，呢樣係基本五行的生尅嚟，龍既然屬木，最忌係金去尅佢啦，咁點解仲要用金色畫框呢？金只係生水，但金係尅木，你幅畫又冇水，咁用個金色金屬畫框去困住隻龍，咁係咪想尅死佢先？

成個PＯ係冇講到，放條龍或龍嘅掛畫，係可以催旺啲乜或者幫到啲乜？

咁睇完佢個PO，都唔擺啦，又唔講放咗有乜效，仲又要注意咁多嘢。

我之前都有啲佈局，係叫大家放龍的，註明係，催旺異路功名，又時用另一方法，又可以催旺工作上之名氣，只要催得其法，便會有效。

至於呢位大師的PＯ，大家可以自行研究及理解，佢最好多啲呢啲出文，咁我可以多啲嘢同大家分享下。