風水小智識（２） (Patreon)

又再次係風水小智識嘅時間。

今次又係講解下，坊間又有另一啲關於風水嘅說法，我又講下我嘅睇法先。

有ＰＯ話，睡高架床，易成月光族喎。

床要坐實朝空，貼地而睡，先至好咁話。

第一，個調查喺邊度嚟架先？

古代應該未流行碌架床，睇咁多古書都冇寫嘅。

現代調查呢？

其實唔駛調查，如果一家人，地方唔夠，要兩三兄弟姐妹，迫埋一間房，其中要瞓碌架床，咁呢間屋的人，幾可肯定不是大富大貴，可能連小康都未達到。

咁人生係會經歷好多階段的，好多人細個時，家境都係麻麻，要捱。

捱到出頭了，咪搬囉，搬去個大啲嘅單位囉。

呢個只係一個過程，因為以前六七十年代，個個都係窮，要捱，咁大部人都要住碌架床，咁唔駛統計，都知啦。

而家有不少小康或小康以上的人，因為仲同緊屋企住，所以都會買啲傢私係張床升咗上去，下層係書枱及衣櫃咁樣，但亦不代表佢哋搵得少錢。

張床高低，同你係咪會變成月光族，係冇關連架。

但如果床頭空呢，咁就會喇。

即係文中提及的，床要坐實朝滿。

呢樣係關乎一陰一陽，一動一靜的問題。

如果床頭是空或對窗，即係動靜出錯，一則健康出問題，二則有財都不能流，咁推理佢會成為月光族，都好似合理啲。

總結，張床，床頭必須要貼牆，唔好靠窗，也唔好空蕩蕩乜都冇，而床腳最好有啲空間，最好唔好有嘢頂到實一實，或貼晒牆。但也很明白，香港地，土地問題嚴重，都係盡量啦。

至於高架床或碌架床，呢樣我反而認為影响不大，因為我哋細個都係咁長大，也有好多人成為成功人士，最重要係睇房間的理氣，能否善用，咁先係主要要知道嘅事情。