開放式廚房好大鑊？ (Patreon)

最近又有朋友問，開放式廚房是否不利風水架？

唉，個衰仔梗係又睇埋出面啲文啦。

實情係咁的，以前古代，廚房唔喺屋內的，係喺室外的，你哋睇大台啲劇，都係咁啦，啲古裝劇，個廚房唔係屋內架嘛，唔知大家記唔記得。

所以古代係冇開放式廚房呢樣嘢，咁古藉都唔會有記載，所以唔會有現代廚房規劃守則架噃。

按古代套風水理論，查實陽宅家居，根本廚房就唔應該喺室內出現添啦。

咁所以，開唔開放式廚房，首先就冇乜唔同，因為佢都係喺間屋入面之嘛。

澳洲啲新的大屋，十間有八間，都係開放式廚房嚟，咁佢哋好多都係富豪購入，我都唔知點對財運不利，可能佢啲錢十世都花唔晒，煩惱係來自點樣駛晒啲錢佢？

開放式廚房嚟講，我喺澳洲見唔少，喺香港都見得多，都好少話會爐頭對正大門或房門，因為多數都係村屋或大屋，如果係高樓，也多數是本來係廚房，只係拆咗幅牆而變咗開放式廚房，所以嗰個位，根本好難對到大門或房門的，除非係奇則啦。

另外，刀叉外露，又話會令身體健康出問題，喂呀，唔係個個都會將啲嘢放晒出嚟架，装房有櫃筒，枱面有刀架家嘛，邊有咁易外露呀，其實呀，而家啲人好小心架喇，將啲鋒利刀叉，收好，費事自己唔小心，或者俾小朋友咁容易掂到，易受傷。

爐頭同個水龍頭對住又話唔得，喂，唔係開放式廚房，都係有呢個問題架啦。喺我心目中最成功的蘇師傅，都喺節目中話過，呢樣係冇問題咯，仲講乜鬼啫？！

而家師傅喺澳洲，提都唔會提開放式廚房有問題，仲提真係大鄉里，喂呀間間大屋都係咁，咁講乜鬼嘢啫！佢只要唔係犯火燒天門，咁咪得囉。