鞋櫃風水學？ (Patreon)

今次要講下鞋櫃呀

係呀，我見人哋大師都係咁，鞋櫃要寫一個ＴＯＰＩＣ，咁我梗係都可以咁寫下啦。

鞋櫃要放喺門口係最好？

以東方人的習慣，咁呢個係必然的，因為我哋係一入門口，就要除咗對鞋先，除埋對祙，穿返對拖鞋，咁先行入屋架嘛。

並唔係因為對鞋踩過什麼不同的五行氣，帶晒呢啲雜氣入屋呀！

而係東方人，例如我哋香港人，好怕踩到間屋污糟晒，所以細個阿媽已經教落，入屋除鞋呀！

又或唔可以放個鞋櫃對住正門位置。

真係呀，大佬呀，香港地大部屋都係吋金呎土，你話唔擺就擺呀？位就得一個，咁放入装房裡面好唔好？

風水師係要幫人解決問題，而唔係加強客人的煩惱。

盡量揀有櫃門的鞋櫃係好的，因為鞋多細菌，要放喺密封式的鞋櫃會較好。

拿，咁鞋櫃係咪唔可以咁高，古藉又係冇記載，古代係咪有鞋櫃我都仲考究當中。咁鞋櫃太高，又點影响健康呢？其實只可以聯想到，鞋櫃太高，咁啲污糟氣就會越接近人的頭部，咁啲鞋滲出嚟的污糟氣同細菌，會很容易令人生病。

咁鞋尖係咪要對入，唔好向出呢？

呢樣又係惡搞，喂呀，冇嘢寫就算啦，我都唔明點解要寫咁多嘢出嚟嚇人。

你對鞋都放咗入鞋櫃，仲閂埋門，咁個鞋頭向出向入，又點會形成一個煞，影响人的健康呢？眼見的才算是風水，閂埋櫃門，見唔到的，就唔算係風水啦，又冇水同火的影响，點樣會睇到佢會對健康有害呀大佬啊。

揀風水文章嚟睇，真係要好小心，否則，就係會自己嚇死自己架喇。

另外，外國人的習慣，係完全不一樣的，佢哋慣咗係著住對鞋，喺間屋度週圍走，喂喂，按嗰位大師所講，帶晒啲五行雜氣入屋喇，咁佢哋瓜咗未丫？咪傻啦，佢哋好弓都好有錢，只係由細到大，習慣問題，連下雨天踩到成鞋都係泥，返到屋企都係唔除，但咪又係一個好有錢的白人，身體又係好過我的白人嚟？

當你做呢行，見唔同的CＡＳＥ，你就會明白，好多所謂大師，都係靠嚇你而搵兩餐的呢。