在家中放聖誕樹都有風水禁忌？ (Patreon)

看呢篇文嘅主題，係咪覺得熟口熟面呢？

其實師傅我都唔想寫呢個主題，因為見到有出名師傅都出咗篇文講聖誕樹，咁冇法子，為咗唔好令大家都驚咗，或者大家真係關心，咁師傅都發表下自己嘅睇法。

一般嚟講，樹木都唔好放喺室內嘅，特別係泥種，因為如果搵開師傅的客人或者學生都知道，樹木喺五行裡面係屬木，而室內的五行氣裡面，有很多宮位和星氣係屬土的，五行裡面，木係尅土嘅，所以你冇理由整支木去，搞到尅晒你屋企咁多組五行架？

喂，我棵嘢，膠造架喎，唔係木嚟架喎。

有外國的朋友，係真係會搞棵木造的聖誕樹放屋裡面架。

其實，就算你嗰棵係膠造，因為你形意已是一棵樹，象意已成，所以以五行嚟講，點都會有其影响的。

所以唔關放喺屋企嘅邊個位置，一放入屋裡面，佢就有機會有木尅土的問題，因為土嘅宮位及星氣特別多，六合彩就好難中，地雷就成日會中。

喺澳洲呢邊，聖誕樹係買佢個主身架啫，啲裝飾係要己買嘅，好多時都係嗢啲金屬造呀金色紅色圓形嗰個掛件，查實，圓形係屬金，金屬又係屬金，咁金係尅木架嘛，五行上又係會搞到金木交戰。

即係你自己整咗一舊嘢出嚟，搞到啲五行氣打晒交。

所以，如果你住喺獨立屋，好大嘅，咁你放喺某啲宮位，可能會影响唔到佢，因為屋太大，你都唔係成日去嗰個了無人煙嘅角落，如果你放喺屋中心，客廳飯廳，玄關位，咁就要留意下了。

樹木梗係最好放室外啦，但唔係人人屋企都有咁大地方嘛，始終都係，土地問題。

師傅嘅評語就係，冇乜特別嘢，都唔好放棵樹喺屋企，就算想放，都唔好咁大棵，細細棵算啦，同埋，唔好放咁耐呀，因為你一放超過九日，就一定會同家中五行氣結合，是好是壞，要到時才知道呢。