2023年癸卯流年風水催財篇 (Patreon)

2023年流年風水催財篇登場!

同上年一樣, 首先要戴定個頭盔先, 作返個免責聲明: 因為流年飛星係按照天上的星星, 喺天上流轉時, 不同的星氣, 對在陽宅上的人和事產的的吉凶, 不過, 因為呢個飛星方法, 佢係未同你屋企個原局的星盤產生化學作用, 所以都只係一個比較簡易的一個方法.

咁記得, 要搵返自己屋企的中心點, 再去找出屋企的八個方位, 因為我只能提供方法, 如果你因為度錯而最終放錯位置, 咁就變成冇用架喇.

唔再重覆上年講過嘅嘢喇, 因為催旺都係追住個財星去做架啫, 即係呢一年嘅財位.

首先, 你去找出你家中的西南方, 放一個我地慣常用的流水擺設. 屋企或者舖頭都可以的.

不過又係嗰句, 香港地, 或者係我住緊嘅雪梨, 寸金呎土, 又係土地問題丫, 如果真係冇位放流水擺設, 咁就放一杯水吧.

流水擺設是動水, 動水力量大, 所以催財放這是主力.

然後, 常聽說, 八運要看八仔, 因為佢當旺, 而家係八運尾, 就嚟入九運喇, 咁下年係咪退運呢? 賣個關子先.

咁我哋找出家中南方, 放乜呢? 用一個陶瓷造的白色碗或碟, 最好正方型, 然後將你全屋的硬幣散銀, 放晒落去.

最後, 你找出家中的西方, 放一個招財進寶元寶擺設.

喂唔一定同款架, 大概係咁就得架喇....

但前提係, 西方, 不能是廚房, 如果咁啱係, 你就放棄呢個方位的佈局, 只放上面兩個便可. 點解? 如果咁佈, 反而對自身有損, 所以不能也.

幾時放得? 隨時都可以架喇, 你買到嘢就放啦.

為期一年.

北半球同南半球, 佈局相同, 即係香港同澳洲同英國同全世界, 都是一樣.

如果你已是我風水上的長期客戶, 咁你可以唔駛理喇, 因為我已度身為你訂做一個風水局, 唔好意思嘥咗你幾分鐘睇呢篇文.

咁patreon原先客戶呢? 每月之流月風水佈局, 係可以同時佈的, 不過, 如果你流月放了一個流水佈局, 咁你流年就放杯水就可以了. 即係我會以流月為先.

今次找數的分享係咁多, 有緣就再分享吧.

祝各位新一年, 疫情過去後, 財源滾滾.