AI能取代命理師嗎？ (Patreon)

近呢幾個月，熱話都係離不開AＩ，或者係素海霖。

ＡＩ會取代人類，已經唔係咩新鮮事，就算唔係AＩ，淨係電腦呀，就已經能取代很多人類現有的工作。

我剛和一個會計師傾過，佢話而家稅局都用緊大數據，好快就唔駛會計師架喇。

超市而家都好多自助掃碼付款，唔駛再有收銀員，不過每間超市，仲係有收銀員的，因為要顧及長者及有需人士，但人手需求已大幅減少。

咁，術數師傅，又會否被取代呢？

曾經睇過一條片，係一個好出名的風水師，用AＩ去問佢關於一啲風水命理嘅問題，有啲係答啱，有啲係答錯。

咁ＡＩ其實需要啲時間去學習，即係要有人灌輸一啲相關知識俾佢，佢先會再有所謂人工智能的思考加輸出答案俾你。

即係話，如果要AＩ答出一啲精準的風水命理答案，係要人同佢互動，俾啲答案或智識佢，咁佢就會學識。

我見喺條片，個AＩ會答錯的。

點解會咁？

因為風水命理門派有太多，又有時你又話我係神棍，我又話返你唔是正宗，你有你說法，我有我嗰套，冇一套係只有一門獨家的正確法則，咁個AＩ呢派又聽啲，嗰派又學下，咁點樣會學得識先得架，好似人類咁之嘛，有啲人呢個老師又跟下，嗰樣又學下，到頭來搞到亂晒龍。

咁會唔會有有心人，好有心機咁再同佢由頭分析一 次佢已汲收的理論，同佢去蕪存菁，將啲唔啱的，去除。

可能有嘅，不過，首先，嗰個人，學嘅嘢真係要係正宗，如果係流嘢，咁就老點咗ＡＩ，咁佢所有嘅功夫都係流。

另外，假設呢個人，咁好心地肯教AＩ，但中國人文化，教徒弟，一向都係留幾手，一係唔教晒，一係教錯少少，令啲徒弟學唔識，呢啲係千年以來，偉大的中國文化遺留下來的，對人況且留一手，何況對住一個對自己冇乜利益冇乜利用價值的AＩ？教識個電腦，識自己失業嗎？

我估唔好話中國人丫，人類，都唔會咁蠢吧。

利申：個人對AＩ，唔係太BＵＹ，因為我一向鼓吹，自己有獨立思考，唔好人講自己又信，ＡＩ一樣，你唔用腦去作獨立思考，下下都AＩ，咁就真係會被電腦（或幕後有心人）所操控了。（呢個情節，ＩＴ狗呢套劇，有相同的見解在結局篇。）