日記~12/5/2021 ~ 過界去赤柱 (Patreon)

5月12日 星期三 晴（熱） 一早起身梳洗好，因為醫院有冷氣及軟墊，應該係舒服，但心情緊張，心知今日必定有事發生。因為每次出入監獄都有一個新牌仔比我地（類似監獄身份証，上面有囚犯罪行紀錄、放學日期、所屬期數等等資料），昨日攞到的牌仔，上面的期數寫了C1 (Cutting，切書）心

5月12日 星期三 晴（熱）

一早起身梳洗好，因為醫院有冷氣及軟墊，應該係舒服，但心情緊張，心知今日必定有事發生。因為每次出入監獄都有一個新牌仔比我地（類似監獄身份証，上面有囚犯罪行紀錄、放學日期、所屬期數等等資料），昨日攞到的牌仔，上面的期數寫了C1 (Cutting，切書）心想今日應該返回這個期數。昨日見鮑 Sir(心理組醫生），他答應會幫我返回流倉，理據是我去到任何一個期數，都會有人要求我介紹筆友。

食完送過來的早飯後，突然保安組要見我，什麼事？去到保安組見到最大粒嘅花膠偉，早前去小欖時收起我本日記那一位，現在交返比我。他說現在我有咁多問題，所以石壁再沒有期數適合我，原來孭了一本黃簿（情緒問題）係唔可以手持工具工作，怕你會情緒問題用來攻擊其他人，就係咁就叫我返去，無交待如何處理。

返到醫院一陣，今次就輪到指模房call 我去見佢地，問我知唔知發生了什麼事？原來我今日要過界去赤柱，現在係五月，原來今次去小欖係排期，兩個月後再去小欖正式見醫生。石壁係細監獄，只有三佰幾人，而赤柱係大監獄，有一仟五佰幾人，心想自己已經過了一半，到九月尾便放學，轉換一吓地方也是一件好事。我一直有跟(慢必）陳志全通信，他在赤柱還柙，聽他講，赤柱職員很好，而且又有無煙期，期數種類又多，其實都可以放心過去，擴闊自己視野（反正當日選擇唔上訴，決定入監獄見識，今次都係一個機會，見識多啲）睇吓唔同嘅監獄有什麼分別，於是就成為了十個月刑期，游走四個監獄（荔枝角、石壁、小欖、赤柱）。

返到醫院收拾好東西，去到指模房食午餐，因自己太多東西，四個大垃圾膠袋加一個結他。當時係由赤柱職員過來接我，職員的確有點不同，願意幫我攞嘢上車，又有禮貌。去到赤柱，職員又會幫我攞嘢去指模房，赤柱比石壁舊，話晒都有接近一百年歷史，好有英式建築特色，有點去到外國的感覺。去到指模房，當然有好多手續要辦，職員係好有禮貌，港島人的確係比較有教養。石壁啲職員，一開口就係粗口，見到職員問我坐幾耐，我話坐十隻，佢就話個“碌”字都唔好講（一碌即係一年）。又要見很多職員訓示，例如新生組阿頭，問我點解會過來，我都照直講，係石壁比人玩，佢答：我相信有職員喜歡玩人，但赤柱唔會有咁嘅情況。

搞完一大輪，終於可以入倉執嘢，過界時，石壁職員收晒我啲剪報，真有點傷心。睇左一陣報紙就訓，難為家人由元朗來赤柱探訪。