日記~14/5/2021 ~ 蒸爐監房 (Patreon)

5月14日 星期五 晴（熱） 到了赤柱第三日了，房間真係比石壁細一半，而且通風差，夏天真係好熱，晚上訓教真係會熱醒。一道鐵門得一個窗口仔，仲有對面高高的細窗仔，根本無通風位。可能只係5月，未到最熱的7,8,9月，夜晚都總算可以接受，但去到個三個月唔知會點？可能係一個蒸爐... 原

5月14日 星期五 晴（熱）

到了赤柱第三日了，房間真係比石壁細一半，而且通風差，夏天真係好熱，晚上訓教真係會熱醒。一道鐵門得一個窗口仔，仲有對面高高的細窗仔，根本無通風位。可能只係5月，未到最熱的7,8,9月，夜晚都總算可以接受，但去到個三個月唔知會點？可能係一個蒸爐... 原來監獄係有睡衣睡褲，我來到一個新監獄，再重新比三套囚衣給我，舊的就交返比佢地作交換，今次係第一次見到囚犯的睡衣睡褲，原來真係藍白色直條。昨晚第一次穿睡衣睡褲訓，起身再換衫，原來穿睡衣訓都唔錯。

剛巧我的3A電用晒，所以無收音機聽，聽唔到收音機就唔知幾點鐘，因為無鐘比我地睇，要去到工場才有大鐘。晚上都唔知幾點，眼訓就訓，可能早訓也會早起身，我估大約五點幾。因為係赤柱係無Morning Call 嘅廣播，而係職員會行到房間幫你開燈，就知道已經係六點半。每個監獄都會有小許不同的規矩，但監獄生活係十分有規律，幾點起身，幾點食飯，幾點工作，幾點打波，幾點冲涼，幾點訓教……

起身，出倉點人數，早飯，工作，球場，冲涼，午餐，再工作，放工，晚飯，返倉，訓教，又一日。由於係初到車衣期，所以要由低做起，即係我的工作係洗厠所清潔拖地掃地。不過今朝早飯時，跟那位疑似舊相識的朋友，終於相認也確定了大家是相識，這位在監獄的名字叫“天賜”的朋友，已經超過十年無聯絡了，一講起，大家就認得對方了。原來佢衰毒品，年期十幾年，而這位“天賜”在車衣期係Checker 即係職員最高，心情即使有種安全感，有個有背景的朋友睇住，總算暫時係車衣期無人蝦我！

赤柱的確係咁多監獄中最大而且最多不同期數的監獄，一個期數有自己專用飯堂食飯，而飯堂有無門locker 可以用，擺放冲涼液第都好方便，因為每位飯堂都有冲涼房，所以可以食飽飯就去冲涼，冲完就返倉訓。而赤柱職員比石壁的友善好多，返到倉自己洗吓衫褲，寫吓日記，暫時未知怎樣比衫去洗衣期，等熟悉後再攞比人地洗。