Home Creators Posts Import Register Favorites Logout

Content

自己一個單人倉,的確比較好,就好像有一個私人空間一樣,自己有一間睡房。昨晚開始回信,石牆花及朋友的信件,十點前已經瞓,石壁比市區低一至兩度,好寒冷。

早上六點未夠,第一次比牛的叫聲吵醒,起身做吓運動拉筋暖吓身。今日新生組完成,正式派去工作期數,心情有點緊張,剛熟了一點又要走,七點半出倉,八點早飯加早藥,因為眼科有藥 keep住係醫院,所以每朝都要先去醫院再到飯堂。早飯後在活動室睇電視等(這四日都係冇工作,只係睇電視睇書回信......)到了十點半,終於有職員帶我去指模房!

由新生組沙展豪哥問了我幾句,有冇人威迫我及打我,我可算幸運,冇!於是豪哥話我知,我留低在General Duty 流倉(清潔雜務)即係新生組個四日嘅實習地點,實在太開心。返到活動室,見到流倉囚友大家都覺得唔錯,我未知實質要做什麼,但已經對咗四日,總比重新認識好。

下午食完包妹,就正式工作,“打啄”即係最低做起,就係拖大堂個地,相信有幾千呎,但原來監獄有特別方法去拖,左一個地拖,右一個地拖,兩個一齊推,快好多!原來做完自己個 part 就要跟大隊(共13人)由四樓清潔到地下,每層有四個掃地,四個拖地,其他抹窗掃塵,不足一小時完工,就係自由時間。

去到五點半,晚飯,六點半返倉,就係自己一個私人空間。

晚飯後,就通過五個閘口,返回自己倉,因為石壁係單人倉,有自己空間。睇吓書就訓!

原來監獄一年有三隻雞肶,12月24日聖誕節,農曆年初一,仲有中秋節。昨日已經有B仔問我賣唔賣隻雞肶,我只係10個月,人地坐十幾年,我出去食幾多都得,所以賣左,足足一包煙架。

Files

Comments

Wai Tong Tze

聖誕雞肶,寒冷中的一點暖💕