當今黃店背後的黑暗面 ?放學手足如何是好? (Patreon)
Content
身為放學手足,最近同另一放學手足傾計,互相關心一吓!本人十分明白及諒解,因為親身經歷過。在囚時無論工作/食宿/囚友相處等,可以講無壓力,我只係十個月的監禁,但放學之後,始終有好大的情緒困擾問題。自問自己經濟較好,無須急於揾工;放學後也用了兩個多月時間調整心態,當時家人見到我,就好像一個自閉症病人,每日一個人在家,什麼都唔想理唔想做,只係發呆睇電視訓教。放學後要揾一份好工,又有案底在身,談何容易呢?一個做開文職或大學生的斯文人,放學後,為了生活,面對衣食住行種種壓力,情緒又處於低潮,被迫立即面對揾工壓力,即使願意放下身段,願意出賣勞力,又有幾多人願意付出真心去理解體諒一個從未做過勞動力工種(例如:運輸/地盤/倉務/裝修/等等)嘅斯文人呢?在囚時,我可以去見心理組接受輔導,解決在囚情緒問題,但放學後又如何處理情緒問題?今次這位放學手足,面對兩年監禁(堅把),一放學就要面對種種問題,需要立即揾工作,我面對十個月刑期都有咁嘅問題,何況兩年。我由朋友介紹下,我去了一間黃店幫手,出賣自己勞力,自問如果我唔係放學手足,相信人地未必請我,斯文人冇勞動力工作經驗,多謝他們的體諒,我經常犯錯但得到諒解,雖然間中會比人責罵幾句,但也屬正常,每種行業都有其專業技術的工作方法,邊做邊學!在那裡,我認識了這位放學手足,今次文章的主角,C先生。C先生原來由另一間大形黃店過來,在傾談中得知他是不愉快地離開,一放學就由其他手足介紹入去。大家都明白,我們是冇經驗的白紙,須要由頭開始學;C 一放學就要面對工作,做了兩個月未夠就決定離開,為什麼?這間所謂大形黃店,原來唔係全部只請手足,也有請了職業人員,大大隻隻,滿身公仔,粗口橫飛,相信大家都知道及了解。唔會有人一出世就識,唔識唔重要,但去到“屌老母“式去教,對於斯文人來講,這是職場欺凌。唔止一次,而係每日發生多次,工作上係唔會重覆同樣嘅嘢,每日每單都有不同的東西需要處理,所以每日每單對我們來說都係新事物,但對於一些職業人員,做了十年八年又怎能比較?做錯就“屌“,甚至在群組上出言侮辱 “唔打佢對唔住自己“!每日,C先生都要面對呢班公仔佬工作,情緒已經有好大綑繞,仲要日日比人問候老母;於是他便天真地同老闆反影前綫情況,希望可以在一群新人手足,同職業公仔佬之間得到平衡及互相體諒,解決相方磨擦問題。但是老闆只安撫他幾句便算,當然事情並不是想像中那樣,結果無須多講,大家都知道,件事一定會全公司都知道,情況就只會變本加厲,最後決定自己辭職,我們才有緣再這相遇。及後,再從其他手足口中得知,另有兩位放學手足,在同一間大刑黃店公司有同樣遭遇,甚至有人裝凶作勢想打人,職場加埋群組欺凌,語言加上暴力同時進行,放學手足要面對心理問題,又要面對職場上被人凌辱,如何是好?其實大家有冇想過,要一個斯文人放下身段,決定投身勞動力市場,都須要下定好大嘅決心同勇氣;身為放學手足的我,同樣經歷,同樣鼓起勇氣去做勞動力工作,所以我覺得必定要為他發聲,免得大家以為黃店一定係幫手足。我知的只是冰山一角,有三位放學手足有同樣經歷,但背後到底有幾多放學手足經歷過?講出來又比人話鬥黃,唔講又唔會有人知,咁就等我做一個衰人!我相信那間公司老闆們應該知道,但知又唔改善,咁到底呢間係為手足開嘅黃店定係為了生意而做嘅公司?甚至有旁聽師在某聚會上,向大家提及這間所謂黃店,掛住請手足為名,攞光環騙生意為實。我也相信,人為了錢係會變,正如共產黨的手法,“黃黑金“ (色情/捉住你痛脚/金錢)去利誘成為自己傀儡,金錢之下利慾薰心,在大時代之下,表露無遺。留在香港的放學手足,唔係唔想走,只係能力問題。現今香港又有幾多間黃店係真心為手足為正義為堅持?又有幾多表面係黃店,背後又有幾多黑暗面?手足們入獄時要面對新挑戰,放學後又面對新衝擊,每個人必須要學習堅強忍耐,誰是誰非只有留待歷史可以作証!