初到"石壁"被手足古惑了一個包頭袋 (Patreon)

2020年12月1日第一日去到“荔枝角“，而12月17日是我第一日去到“石壁“，一個人生路不熟，去到一個高設防的監獄，面對眾多殺人放火、黃賭毒等甲級重犯，那種恐懼感必定是有，但只好平常心去面對！經過新生組四日後，終於安排我去“流倉“即General Duty （清潔期）。由於我依然要覆疹食藥，而一日兩次，所以早上同晚上都要去醫院食藥（每個監獄內都有內部醫院醫官），就在食夜藥時認識了一位手足(化名豪仔～縱火暴動罪），當然也認識了其他手足。過了個多月，工作尚算順利，雖然要洗厠所，人際關係也唔錯；我申請購買兩個“包頭袋“終於到了，每個只係9.9元，由糧單扣除，由於質地係塑膠，所以好多囚友都交比車衣期的囚友，私下加工令包頭袋耐用啲（這是違犯監獄條例，但懲教人員都會隻眼開隻眼閉）。豪仔當時正正係車衣期A ，所以當食夜藥時希望他幫忙車一車個包頭袋，做小小保護令包頭袋耐用一啲，如果唔相識的囚友相車袋，你要收取十非煙作為人工費，監獄就係咁。於是我偷偷把兩個包頭袋，在食夜藥時交托比佢，而我當時有訂閱蘋果，所以我比報紙佢作為酬勞。過了一星期左右，終於第一個包頭袋已經車好了，每個包頭袋都寫住自己終身囚號，所以別人拿走也難以使用，但車衣期就可以把那塊報換成自布，自己點寫都可以。收了一個包頭袋之後，我每晚依然有比報紙佢，但過了兩星期，另一袋仲未比我。有一晚開始，他再沒有出現食夜藥，原來得知他只係食精神科嘅藥，自己申請停藥！我即時怒上心頭，頂你個肺，我一個新人來到，唔止唔照顧，仲要唔比返個包頭袋我，明知自己停藥就早啲比返我啦，係監獄除了同倉外，根本好難可以見到面，即係有意攞走我個包頭袋啦！手足點解要咁對我？只係$9.9 可以自己買呀！一個新仔乜都唔識，多謝你教識我監獄原來係咁。過了三個月左右，得知他要過界去“壁屋“，所以個包頭袋就石沉大海，我唔係覺得個$9.9好重要，而氣奮的是兄弟手足的一份信任被出賣了。之後過多唔夠一個月，我也要過界去赤柱，我個包頭袋已經爛到不可再用，始終係膠，氧化易脆。於是去到赤柱即刻申請再買兩個，五月尾申請，去到八月先派到比我，我九月放學啦！係呢四個月冇包頭袋用的唔方便，我就想起如果另一個比返我，自己就唔使咁狼狽，用透明膠袋代替。豪仔，希望你古惑人地都唔好對自己手足古惑！也希望你出到社會唔好咁無誠信！監獄就係一個物資短缺的地方，要小心保管好自己財物，即使一個郵票都可以收買人心！