日記/1月23日～二五仔/人生保貴一課 (Patreon)

星期六 18°C 陰 荔枝角早上六點半，就開大個'香港電'台嘈醒大家，而石壁就係錄音廣播叫犯人立即起床。天氣涼，昨晚沖涼時冷襯，今朝有點頭痛，也有點咳，要食感冒四寶。今早很快就可以由舊翼去新翼，當入到水房等候時，見到有幾位新人剛剛到，大家見仲有時間，於是入去沖返個涼先，沖涼時有個新來嘅囚友同我傾計，原來佢地都係由石壁出來睇醫生，星期六出來，星期一覆疹，原來星期日係唔會開囚車送犯出入。 來自石壁的新人阿翰，現時係石壁做㕑房期，另一個則係車衣B期。返到活動室，大家都好自然會坐埋一齊傾吓，原來阿翰之前也做過流倉（清潔期）即係我而家做緊嘅期數，所以對流倉啲人好熟，於是佢就講左好多流倉歷史比我知，又講而家係流倉嘅阿六大煙㽼，古惑騙徒，要小心，又講廿多歲嘅阿X 係保安隻狗（首先要解說懲教內分開職員同保安兩種不同剛位，職員負責看守，而保安就維持安靈，即係保安會搜查房間/搜身等，即係監獄內警察。做保安隻狗，即係幫保安做內應，收風，做二五仔），阿翰講左好多人嘅性格比我知，包括我地流倉個班主任（老闆）點解升唔到職，強叔原來係製毒師夫，可樂係強叔拍檔，揸的士去散貨等等，阿翰自己係石壁七年，連一半都未到，佢今年三十幾，出獄時已經四十幾，運毒係香港係好大罪，已經七年，社會變化已經好多，到佢出獄時，已經相隔廿年，到時點樣去適應社會？ 真係好難想像！晚飯後，又要返回舊翼單人倉，昨晚阿榮雞啄唔斷比佢煩死，今晚有新人來左同佢吹水，我可以休息吓！聽到佢地三個人傾計，知道阿榮想移民，心想，佢衰毒品，判入戎毒所，衰藏毒，有案底，唔使諗啦！一定批唔到移民，除非用其他手段啦！ PS: 今日係水房沖涼時，同大家傾計中，都知道在囚中就好像野外求生一樣，在資源短缺的環境下，大家為了生存，就用盡各種方法，你爭我奪，爾虞我詐，我上了一堂人生保貴的一課！