分享兩個關於爺爺嘅簡單靈異經歷 (Patreon)

第一個經歷應該係1990年左右，爺爺是`心臟病發過身，當時係元朗博愛醫院後面一個簡陋地方，四條柱加一個頂，就係咁作一個靈堂用道教儀式出殯。由於爺爺係文革走難來到香港，而爺爺又係獨仔，爸爸又係獨仔，所以冇咩親戚係香港，儀式簡單/親友都比較小。爺爺個官木都好簡單，係個頭部位置有個洞，用一塊玻璃蓋住比人瞻仰，只係睇到個樣。

由於遺體係雪櫃攞出來，而當時係夏天，爺爺成塊面都有水點，由於係郊外，我突然見到有隻蟻係爺爺塊面行來行去，冇問任何人，自己就好快咁攞開塊玻璃，幫爺爺趕走隻蟻，作者清楚見到，爺爺好似流出眼淚咁，可能係錯覺，當自己想望清楚時，家人好驚咁問我咩事，點解搞住爺爺，只有如實陳述，想趕走隻蟻，最後只有放返好塊玻璃，繼續法事！ 去得咁突然，基本上好難一吓子接受，爺爺應該有好多嘢要交代。之後，爺爺的夾萬鎖匙一直都搵唔到，而小弟就搬左入爺爺間房住，遺物都清理好。有一個早上，一落床就踏到一條鎖匙，奇怪又不是自己，爺爺遺物已清理半年有多，結果就真是夾萬鎖匙!到底發生了什麼事?

第二件事約2020年，事隔三十年，爺爺土葬後七年起骨再火化，骨灰同嫲嫲合放在和合石，平時拜祭都係由哥哥同爸爸去化寶，而作者通常係點香燭放祭品，今次爸爸叫我同哥哥一齊去化寶啦！作者一邊化寶，一邊細細聲叫爺爺收嘢啦！嫲嫲收嘢啦！突然即時兩行眼淚不停咁流出來，當時心境係非常平靜，冇任何觸感，但兩行眼淚不停咁流，自己都唔知咩原因，直到化完寶之後，返到靈位前，家人見到自己眼淚不停咁流都問咩事，都係答唔知道，家人只有不停比紙巾作者，直到大家離開，眼淚先開始慢慢停落來，到底發生咩事，會有咁嘅情況，到底係出殯時嘅延續，定係知道作者將要入學（入獄）而借眼睛流淚，真係無從稽考。