日記~13/2/2021~ 懲教"狗"的名字典故 (Patreon)

晴 星期六 年初二今日大衛Day，輪到坐飯堂，一切如常，出倉早飯（正常），轉場執枱再返飯堂。今日年初二，電視冇嘢睇，當然照舊會播DVD電影。我太多信要回了，一枝筆9號到手，今日13號已經用咗半枝筆，真係未試過咁誇張。阿希(盧俊希)全日陪伴左右，佢有佢做自己嘢，我有我睇報紙、寫信、寫日記等等。今日過飯堂忘記帶皂液啦！筆用得太快，下次出糧買一枝比較好。食完包同粥就要出操場，正如上體育堂一樣。全班要出去，不可以有人留在課室一樣。我和阿希照常兜圈散步傾下小心六叔呢個人，又傾下佢自己的事情 (自制煙霧炸彈，原來用不同化學物品預先分隔開，當打破玻璃瓶後，兩種化學劑慁混合產生煙霧)。沖完涼就好快食晚飯，今日食早，4:30有臘腸食 (我賣左比B仔，十飛煙，我刑期短，賣比佢地出於他們的刑期長達十幾廿年)，食完返到活動室有一小時左右才回倉，有人彈結他，我地一齊Jam歌，阿希又一齊唱，如果嘉豪係到應該更開心。夜藥時，保安洗樓踢竇，跳制的人又跳了！睇住佢又被保安拉入保安室，睇來又鎖水記又調期數。這位囚友係黑社會，每次見到保安(懲教人員分兩組，一係普通昨職員負責看守，另一組係保安，負責監獄內的安全，即係監獄內的警察) 都叩佢地做”死狗”……問返老屎忽，原來在很久之前，叫保安做”狗”係因為佢地好似隻狗咁，四圍聞有無毒品，四圍搵嘢搜查，同狗無分別。原來”狗”係咁樣來源!