日記~21/2/2021~獄中的明爭暗鬥 (Patreon)

星期日 晴 今日大衛Day，全日喺Pantry，都係如常咁過，只係有新人喺到，都喜歡跟住我，加上阿希同大陸人阿峰，一枱五個人坐！ 今次唔知點講，蘋果日報好搶手，個個爭住睇，尤其平叔對帶子洪郎，澳門人死亡特別感興趣，要剪報收藏。今期糧尚有$400，可以買到好多零食，我冇買煙，考慮

星期日  晴

今日大衛Day，全日喺Pantry，都係如常咁過，只係有新人喺到，都喜歡跟住我，加上阿希同大陸人阿峰，一枱五個人坐！

今次唔知點講，蘋果日報好搶手，個個爭住睇，尤其平叔對帶子洪郎，澳門人死亡特別感興趣，要剪報收藏。今期糧尚有$400，可以買到好多零食，我冇買煙，考慮下次買一包啦！今日出咗一條數學題，直角三角形底係2cm，高係3cm，咁最長係幾多cm？已經忘記了，星期二問下姐姐先，！

她當日會來探訪。

基哥做下午老細，下月調去荔枝角，每月見一次啦！唉，最好傾的一位職員要走！唔知新老細係點？全哥又就快退休，流倉會點？阿林又話過界，原來坐監同外邊生活不遑多讓，離離合合，明爭暗鬥！

晚上回倉，財叔明日出冊，除了昨日比我的東西外，還有大量零食、日用品、口罩都交咗俾我，大家唔熟，不過訓隔兩個倉位，平日晚上都係佢同肥良派包打水(每晚返倉都有提子包及可以有奶水)。雖然兩個月，見到嘅人事關係變動好大。Martin升做指模房，光頭佳爭做B仔做，阿林要申請過界，六叔想調期數，安爺做保馬(即係做二五仔，保安隻馬)，阿發爭取權益，子健最冇機心，強叔也是平常心做嘢，全部我都見到。

食夜藥前見到囚友林叔同職員基哥密密斟，我原本唔知咩事，我食完夜藥回倉時基哥同我傾話林叔被人投訴身上有臭味，於是調來我隔籬，因為他少沖涼、唔洗床單，基哥話佢間房的確有味，點都好，叫我盡量提佢沖涼洗衫，要勤力啲囉！坐監都好多是非！