【會訊】 20240903 (Patreon)

又係時候預告吓嚟緊有啲乜嘢題目。01. 剛剛錄完今個星期嘅 #財經自由講 ；今次唔講咁宏觀，特登搵咗幾個同香港地產以及政府財政關係密切嘅公營機構去拆解佢哋條數。話說當政府財政儲備跌到六千億唔夠，但係除咗政府莫財，好多「核心內圍嘅外圍」嘅「窮親戚」條數都見紅。先講剛剛發 120 億債嘅市建局。你以為佢條數好差？未算。佢最大問題係未來兩年都無樓賣，2027 年嘅盤，好多都係九龍城。啟德係點唔需要我多講，市建局嘅項目最終可以回籠幾多呢？仲有就係裕民坊；以前就話香港拆晒啲公園起樓，依家就拆樓去變成公園。另外一條數，就係房委會；話說 22/23 年，房委會落成嘅單位數目入面，得九百幾係出租，九千幾係出售，完全顛覆晒我哋一直以來對房委會角色嘅認知。以前我哋以為「免補地價」做地產實賺，但你睇呢兩家？當然，唔可以唔講香港暗瓦底最大嘅發展商港鐵；條數本身無問題，只不過係香港本地載客唔知點解都只有 2019 年之前嘅七成；可能啲人去晒 call Uber 啩。再強調多一次，港鐵營運數字仍然健康，只不過係未來物業發展收入唔明朗，想發展新路線就一定要政府注資，而留意返，政府嘅盈餘就只係得返六千億唔夠，一條新線燒你一千幾百，睇你點頂？但講到「窮親戚」，最離譜就梗係西九同海洋公園。唐英年講西九明年資金斷裂，但其實又有少少危言聳聽。如果按目前嘅燒錢速度，其實都可以燒多幾年。我諗亦係因為呢個唔燒得幾耐，所以打晒開口牌想用啲地去做發展。不過，咁又捱得幾耐呢？睇西九條數，舊年輸六億，而出糧就出咗 4.8 億。拍檔 Joseph 話以前好鍾意去西九放狗，鍾意個大草地。其實，西九如果只係一大塊草地，我諗兩、三千萬夠喇，唔駛用成十四億一年。西九，我稱為「文化界嘅海洋公園」。當我睇海洋公園嘅年報，第一個感覺係：「乜又係呢幾條友？」係，有個別人士又係西九董事。其實香港權貴圈嘅近親相交問題都幾嚴重。眾所週知，海洋公園仲欠緊政府 54 億，而手頭現金入面嘅 16.8 億，其實有 14.1 億係政府嘅貸款。有啲人話舊年海洋公園條數靚仔咗，但我見佢收入由 5.4 億升到 8.3 億，但成本一樣係增加咗 3.17 億。即係，無賺多到。甚至乎，從經營所得現金流仲由 5.8 億減到 3.8 億。雖然話政府個 54 億分 25 年還，大家覺得 25 年後仲有冇人鍾意去海洋公園睇熊貓呢？咁，我知道海洋公園係好多香港人幾代人嘅回憶，依家都仲有好多小朋友鍾意去睇吓水族館，但用上面嘅講法，咁咪留返個水族館囉，畀人免費去睇熊貓囉，國家任務嘛。我細個海洋公園都係免費入場嘅，玩一樣收一樣錢。咁樣定位，納稅人畀錢都畀得順氣啲。機動遊戲反正 fully depreciated 喇，拆晒佢喇。但最衰都係啲地依家起樓都唔知點賣。只可以話，錯過咗轉營嘅時機，錯過咗十年左右喇。最後都講埋馬會。我叫馬會做「智商稅代理人」；唔係咩？舊年賭注金額過 3000 億，馬會收入 436 億。馬會成日話 3/4 嘅收入交稅同捐畀慈善，但唔好忘記佢哋都淨袋 98 億。唔細㗎條數。馬會又話，啲錢都係用來創造就業，請咗近 20000 人（連 part-time），但出糧最多係邊啲人？大家心照。馬會係最虛偽嘅機構，我話嘅。如果大家鍾意呢一集嘅模式，我哋會拆埋各大學、醫管局、科學園、貿發局⋯⋯ 三中全會改革精神？等我話畀你知北京想睇唔過眼就係呢種巧取豪奪。02. 神奇國度三隻灰犀牛系列，出咗街有兩集半。點解係兩集半？因為第三集好多內容，要分上下集。三隻灰犀牛分別係：人口、經濟同政治權力繼承。今日我會錄埋第三集嘅 Part II。三集出晒之後，搵過另一啲題目。03. 其中一個我想講嘅大題目，係經濟嘅轉型，尤其係之前有一個單元我講到，未來嘅世界，可能只會剩底啲好大嘅科技巨企，同埋其他個體戶，我哋一直以來所認識嘅中小企將會買少見少。呢個真係實用經濟學。可能有啲人會覺得悲觀，其實唔係；只係轉變就一定會令人有少少無所適從。但事過境遷咁睇，又唔一定係。04. 另一個關於轉營嘅題目，係 AI 之下嘅教育同社會常態。其實我有一個大膽嘅預測，就係未來嘅人會對於自己嘅社會身份地位，有好唔同嘅標準。嗯，賣個關子。早幾日響會員 Group 分享咗一篇好粗糙嘅初稿，仲修訂緊。今個禮拜尾下個禮拜初會出呢個題目（希望）。05. 仲有就係「地產黨末路」；嗯，有啲標題黨嘅意味，但如果睇完神奇國度灰犀牛系列，又唔會覺得呢個預言太過離地。一直以來，特區政府都係靠地產黨去收取地稅，但好明顯呢條路遇著好大阻滯，亦有理由相信北京都唔想咁受制於地產黨。地產黨一直以為自己係北京嘅代理人，真係不知那裡來的自信。曾鈺成同梁振英早幾個星期講啲唔講啲咁，其實都係講緊呢件事。另個角度去睇，地產黨末路呢個題目，其實係上面題見 01 嘅延伸。問題係，地產黨會點樣反應（抗）呢？潤？十年前神奇國度官方喉舌就已經話「別讓李嘉誠跑了」，記唔記得？06. 仲有壓係倉底嘅題目有：Boeing 嘅危機處理。一間美國最重要嘅航天軍工企業，點解會出咁多問題？當然除咗主流話管理層好廢呢個一定啱嘅原因，我更加想探討下假如一間公司做開 hardware 但如果要整合埋好多 software 嘅時候，點解會咁難？其實好有趣嘅一點係，如果睇低軌宇航，Boeing 嘅其中一個最大對手係 SpaceX ，而 SpaceX 嘅老闆 Elon Musk 嘅 Tesla 又咁啱係一間將 software 同 hardware 整合嘅公司（其實都經常出問題）。呢個題目遲遲出唔到，係因為我個 focus 成日轉。最初想講一個 complex system 有幾難搞，但寫寫吓越來越多枝節。嗯，畀我再思考吓。07. 由以上衍生出嘅題目就係芯片；其實好多人覺得 Nvidia 好勁，但勁在邊呢？明明都係由人哋代工生產之嘛。其實 Nvidia 嘅護城河係 CUDA ，一個平行運算嘅開發平台。咁，其他做芯片嘅唔係唔想做，AMD 都有個 OpenCL 。Reddit 有人叫 OpenCL 做 abandonware ，即係被遺棄嘅軟件。點解其他人做唔出 CUDA ，呢個題目都可以講吓。另外，有消息話 Intel 可能會將生產同設計嘅業務分拆，有道理㗎，但救唔救到 Intel 就另一回事。其實 Intel 嘅業績係咪咁差？定係 Nvidia 真係太勁？仲有就係有啲 startup 想推出啲專為 AI 運算而設計嘅芯片，又有冇機呢？08. 另一個壓係倉底嘅題目係：能源嘅政治經濟學。本來只係想講 The Prize 呢本書，但配合返目前嘅地緣政治局勢，呢個題目又係一個「系列級」嘅規模。又好似上面個題目咁，越做資料搜集越多枝節。09. 連諗都未諗嘅題目包括：泰國嘅政治、日本岸田唔冧庄、印尼嘅經濟、印度⋯⋯好多都係講國家。記得年幾兩年前有讀者想我講 Lichenstein 添。其實有啲我都唔熟，但政治同經濟嘅嘢，一樣可以從基本面去了解。但由於呢啲問題無乜時限，我會拖得就拖。10. 最後，欠 HKCC Mall 好多嘢；#港聲你聽 @voxhk 又欠劇本一個；仲有若干英文，同埋 #黎智英 #事實與偏見 都好耐無 update 。仲有未報稅。真係想搵個窿深潛。每個星期有個咁嘅 recap 都幾好，至少畀我自己知道下個 priority 。其實我最想做嘅，已經唔係寫文（同埋製作成聲音專欄），而係整啲更互動嘅嘢。但一日未有 MVP ，都係自主研發吓先；但可以話畀大家知，唔係文字，唔係聲音，唔係歌，唔係訪問，唔係搵 AI 扮我。