莫天真．勿糊塗 (Patreon)

呢一篇，懶得錄，就係咁意寫幾筆。首先，唔尋常又點？點解唔尋常？中共對付有錢佬，有幾唔尋常？關於地產黨同共產黨嘅矛盾，就算唔係會員都應該聽我講過（好多次添）。「咱們一家人。」成日講住就「見外」喇。今時今日香港地產黨，無道理唔知自己係外人啩？根本問題不在於佢哋係香港人，一啲都無種族嘅問題，而係階級嘅問題。人哋既得利益圈子，又有世襲又有制度利益，真係從來都唔會同圈外交接，真係自古以來都係呢個傳統。政協做到常委主席列，就已經係香港人嘅權力天花板；而呢個天花板其實都真係好低下。你估以前咩，仲有乜統戰價值呢？憑我近距離觀察，地產黨係驚北京，真心驚，從來都驚，冇一刻係唔驚。所以反廿三條背後發功，你估冇地產黨份？就算反送中初期，都見到有地產黨嘅指紋嘅。你又估，北京知唔知？梗知。所以之後吹大雞要「愛國愛黨」出晒面咁撐修例運動撐政府，除咗例行公事，亦都令地產黨同一大部分香港人有一度永遠都跨越唔到嘅洪溝。呢個就叫分而治之。你又又估，地產黨知唔知？梗知。所以之後唔只做到十足，仲要擺出一個誠惶誠恐嘅表情，你話點就點嘅態度；真係驚到走開都唔敢。北京知道呢班人只有驚就可以控制得到；控制得到就已經足夠，而地產黨亦知道自己嘅位置，就係繼續搵錢，搵到錢就可以幫忙「有需要嘅人」。有需要嘅人如果知恩圖報，咪就係傳統美德囉。地產黨亦只係輸送養份嘅其中一個渠道，過去厲害了的國，覺得自己就算餅碎都大過你成個餅，咁又有冇必要睇你台戲？所以，地產黨不但無權無勢無地位，恐怕連幫忙有需要嘅人都唔知邊個企錯邊，成件事就變得非常之咁糾結。好，既然係一個咁公開嘅秘密，點解誠哥咁勇？仲要九十幾歲人都親自去傾 deal 。最初，我都好好奇點解誠哥會親自去傾；唔需要㗎，仲係幾十年前嘅世界咩，大家有默契，陸法蘭搵個律師加會計去傾就夠，真係唔需要一個退咗休公司又無身份嘅人親自傾。唯一解釋，誠哥知後果，知到後面會有啲乜嘢跟手，所以用行動親身引箭。用行為親身引箭咁勇？如果「好大盤棋式」嘅思維，會唔會誠哥知道呢個「中共唔妥我㗎」嘅身份，先至最常價值？但係誠哥唔係肥佬黎，亦唔會想做肥佬黎啩？又或者，反而係誠哥同北京有啲乜嘢默契？默契咋，即係好似打橋牌，你點開叫就等於話畀個拍檔知，手上有乜牌會點打。橋牌最有趣嘅地方係，全程打開口牌，但聽唔明嘅人就點都唔識解讀。條題「莫天真」會唔會係寫啲讀者？可能仲有人會唔服，追問：「如果好似你講咁，係有『默契』嘅話，咁點解係擺誠哥上台，唔係擺澤鉅上台？」好問題；而我會話：「一，鬼識澤鉅咩？二，正正係唔合理，所以更似有默契。」詳細啲咁講，默契嘅嘢永遠都只有默認同否認，點到你唔多少有啲提心吊膽？一個唔覺意搞錯咪好大鑊？誠哥可能持住自己年紀大；而且佢老人家，中國同香港又咁多人咁多對眼睇住，有乜依郁你個場仲邊有人嚟玩呀？但咁講都唔代表無默契喎；呢單「賣港之亂」有好多人另一個疑惑，就係點解唔賣中國同香港嘅碼頭。唔通賣埋畀美國佬咩，咁就真係出事。所以，最低限度都一定可以話，誠哥父子知道後果，只係唔知結果。仲有一連串矛盾。你諗吓，如果誠哥唔賣就附合民族利益，即係話誠哥其實係會用佢嘅擁有權，去為國家服務喇，咁又點會係「外人」呢？ 如果一早就有咁密切嘅關係，誠哥父子又點會唔知規矩分寸？明知會有手尾都咁搏？一係就好恨錢（睇怕誠哥已經過咗「好恨錢」嘅階段），一係就完全唔知頭知路（機會唔大），除此之外，仲有乜嘢原因？最後就係，其實我覺得一男子本身就無乜嘩憎唔憎啲有錢人，更正確啲咁講，呢個因素無關宏旨，因為中南海對中環財閥地產黨嘅方針，只係體制利益係不同環境、時代背景之下，必須要做嘅事。事過境遷，方針亦自然有變。由以前要借佢哋去輸送，到目前要佢哋都係繼續輸送，只不過待遇太不如前；待遇不如前，就要防你班人想多啲話語權，更唔可以畀你又以為無咗你唔得。不過，就係有啲人好似誠哥；甚至馬雲嘅情況都好類似，表面上係得罪咗朝廷，但話唔定呢個先至係超級聯絡人嘅身份證明呢？你又睇吓誠哥同馬雲，同佢哋同一個 cohort 嘅大粒佬，真係屬唔同級數。我好少講呢啲嘢，但呢個情況真係好難唔令人咁諗。