命中註定一定要愛嘅人 (Patreon)

一，「點解你唔愛我？你講！」點解愛一個人，無得解釋；點解唔愛一個，就更難解釋。

二，所以，有啲人索性唔問點解，直接跳入結論：「既然任何人，都會去愛別人；你嘅對象，就係我。我哋係命中註定，係宿世姻緣，係天意。」

三，一段咁樣開始嘅愛情故事，究竟會有個點嘅結局？會唔會有腳踏七色彩雲嘅英雄從天而降，打敗牛魔王？抑或斯德哥爾摩症候群發作，主角悟到可憐之人必有可惡之處嘅道理，由憐生愛，好似美女與野獸嘅故事咁？

四，又有說，現代社會太多愛愛愛愛愛，去到泛濫嘅地步。學社會棟樑話齋：「愛，已經被商品化。」越係鋪天蓋地，大家就越唔會去諗，究竟愛係乜嘢一回事。

五 ，「感覺囉。啱 feel 咪愛囉。Uncle ，愛咪愛囉，駛唔駛咁多理論呀？」唔好意思，我份人就係咁乞人憎，但你知喇，呢個世界有好多壞人，佢哋把口話愛你，騙色唔緊要呀，畀人騙財就唔抵喇；「我，都係為你好咋。」

六，有年我去峇里退修，認識一位 guru，佢講話要愛人愛物愛自然上天下地呢樣個樣，我就帶少少玩嘢嘅心態問大師：「乜嘢係愛呀大師。」佢話：「感覺相連，就係愛。」

七，個一刻，你估我點諗？係咪「蔑」呢位大師呢？唔係。相反，個一刻我忽然間明白咗一個道理：「愛，原來就係一種好極端嘅 empathy。」

八，Empathy，同理心，其實即係咩？我哋成日話依家啲人無同理心，即係咩意思？同理心，意思就係「好似好真實咁感覺到人哋真實嘅感覺」。

九，話說，有啲人話 empath，係做人處世嘅策略。但我嫌呢個諗法，太過工具化，甚至有少少 self defeating，尤其係真實呢一點。不過，感覺呢回事，確係可以透過修為去增進。點修為？任何修為嘅第一步，就係察覺到自己嘅感覺；無錯，好多人其實都唔係好清晰咁知道自己嘅感覺係乜。簡單嘅痕、痛、冷、熱、饑餓、疲倦，尚且都可以係錯覺，更複雜嘅情緒，細心去察覺，其實更混亂，更無章法。

十，當一個人對自己嘅感覺、思想、情緒等越來越了解，漸漸佢亦都會對其他人嘅感覺、思想、情緒等有更多了解。有啲人，好似成日都可以睇穿其他人個心，但其實係佢首先要明白自己。調返轉頭咁講，一個連自己都唔了解嘅人，係唔可能明白其他人。換言之，愛人，首先要愛自己。一個唔自愛嘅人，係連愛嘅條件都無。

十一，婚禮場合，假如新人係耶教徒，好多時都會聽到台上嘅分享講到聖經哥林多前書第十三章：「愛是恆久忍耐、又有恩慈。愛是不嫉妒。愛是不自誇。不張狂。不作害羞的事。不求自己的益處。不輕易發怒。不計算人的惡。不喜歡不義，只喜歡真理。凡事包容，凡事相信，凡事盼望，凡事忍耐。愛是永不止息。」

十二，「愛嘅標準，唔通真係要定到咁高？」所以，先唔好講對其他人；假如對愛嘅對象定做自己，都做唔到，一個人又憑乜嘢去愛其他人？聖經，都唔係講到無條件嘅愛，而係叫人「愛人如己」。相信唔少人可以包容自己嘅缺失，但有幾多人可以真正相信自己？要做到對自己有盼望，就更加罕有。

【延伸閱讀】當希望被禁錮樽底

十三，「愛自己，先至有條件去愛其他人，聽落又好似有啲矛盾囉。」呢個諗法，都好常見，而我認為最主要嘅原因，係撈亂咗「愛」與「慾」：「當你愛一個人，又或者一件事，你一定係想擁有佢，獨佔佢。唔通你會將所愛，分享畀其他人咩？所以，愛，一定係自私。」

十四，一個人嘅世界，已經好難容得下其他人。兩個人嘅世界，可想而知有幾咁擠迫。人嘅本性，無疑係自私；亦因為呢個原因，正常人嘅愛，都應該係自私嘅。不過，人唔係因愛而變得自私；反之，真正相愛嘅人，願意同對象分享一切；呢種突破自私本性嘅奇特現象，先至係難能可貴。

十五，極端嘅 empathy，究竟可以極端到一個點嘅地步呢？可唔可能真係極端到完全無我？但化境到無我，連個主體都無埋，又點樣去愛呢？人，點樣同另一半心靈相通，可以同時有你又有我？當愛一個人，都已經咁大學問；愛舉國上下十幾億人，恐怕聖人咁嘅段數，先做得到。

十六，由鍾意、欣賞到傾慕，到愛，呢個過程，其實又唔係啲咩咁稀罕。首先，啱 feel，然後就係發現對方嘅各種優點，之後再將對象昇華到一種理想，最後，就係對象融化入自己，舉手投足，思維心態都變得一模一樣，無分彼此。

十七，所以話，愛X，其實就係慢慢變成 X 嘅過程。例如，愛運動，就會做運動，日日做；然後開始有要求，期望精進，最終運動會係你嘅身份一部分，係生活習慣，甚至生計。

十八，「假如愛X，就要變成X人；咁如果你一生出來就係X人，點解愛X又唔係天經地義嘅事？」實情係，我哋生出來，咪就係自己囉；各種思想行為習慣等，多數都係受後生環境因素影響。

十九，我哋由一出生，從好笨拙咁學用手手腳腳，到漸漸認識自己唔同嘅感觀，到發展出更複雜嘅行為同語言，到成長時期塑造自己，到再大個啲了解到自己嘅極限，到慢慢接受自己嘅缺點，以上所講嘅個人意識嘅形成，過程係有意識嘅選擇。每個人，雖然都會受先天因素影響，但都唔可以抹煞後天嘅努力付出。話一個人生出來就注定係乜乜物物，其實亦都係貶低呢個人嘅努力。

二十，所以，做乜嘢人，絕對唔係一個與生俱來嘅身份。否則，亦唔會有人成日話：「你唔配做XX人！」既然我哋嘅身份認同某程度上都係出於選擇，呢種愛，亦係選擇之下嘅結果。所以，唔係話你生出來係乜，所以就愛乜；當一個人講命中注定嘅愛，其實佢就係唔相信愛係出於自由意志。

廿一，「咁你講，點解你唔愛我？」請恕我直言，呢句說話係 loser 嘅讀白。那怕任何人一生之中都會最少愛一個人，但對象首先一定係自己；我哋命中注定要面對嘅，就係自己。如果有一個對象我哋真係要被迫去愛，我會話：「我一定最愛我自己。」

廿二，電視劇 House 入面，有句好有哲理嘅對白：Everybody lies。人最叻唔係去欺騙別人，而係欺騙自己。好多人，為咗逃避自己嘅不堪不濟，就隨便搵啲身份去掩蓋自己嘅空虛。當一個人長期處於呢種心理狀態之下，真係連獨處都有困難；當對一個人連對自己坦白都有困難，佢對其他人、事、物嘅所謂愛，亦都係自欺欺人。

廿三，假如今日 uncle 令大家對愛嘅幻想破滅，對唔住。其實， uncle 都好希望人世間充滿愛；不過，首先我哋要識得點去自知自在自愛。