習近平否定鄧小平？ (Patreon)

一，每年三月，北京都會有兩會。呢個傳統由1985年開始；舊年就算疫症爆到九彩，最多都係推遲兩個月，一樣都要照開。

二，「其實，明知人大政協係橡皮圖章，中共點解仍然堅持年年召開兩會呢？」其實，兩會呢場戲，究竟係做畀邊個睇呢？

三，「中共會唔會以為其他人唔知乜嘢係假民主呢？不過，睇返中共初年，尤其係延安時期嘅論述，中共自己肯定最清楚乜嘢係假民主。」以上呢句評語，出自一位研究中共黨史嘅朋友。

四，1985年之前，全國人大、全國政協開會嘅時間，好飄忽。1978年之前，就更加十幾年無開過會。究竟 1985年前後，究竟發生乜嘢事呢？話說，當時嘅中共總書記，係胡耀邦；國務院總理，就係趙子陽，國家主席就係楊尚昆。你可能會問：「鄧小平呢？佢當時係乜嘢位呀？」同學，記住喇，黨、政、軍，以軍最大；中共歷史裡面，曾經做過中央軍委主席嘅人，就只有以下嘅六個：毛澤東（1945-1949｜1954-1976）、華國鋒（1976-1981）、鄧小平（1981-1989）、江澤民（1989-2004）、胡錦濤（2004-2012）、習近平（2012-？）

五，中共成日話黨指揮軍，但實情調返轉；如果唔係，又點解釋胡耀邦同趙子陽嘅結局？

六，另外，啲人成日話習近平係毛澤東之後，唯一集所有大權於一身嘅中共話事人。呢個講法，真係當華國鋒無到喎。1976年到1981年，華國鋒嘅 portfolio 包括：中共中央委員會主席、國務院總理、軍委主席，仲有幾個月嘅時間，佢兼埋公安部部長。

七，主流歷史論述，講到華國鋒好似好廢，好似除咗「你辦事我放心」呢六隻字，不斷消費老毛嘅 endorsement，就好似無乜嘢建豎。不過，實情係呢條友，未繼位，未得勢之前，就一直畀人覺得係個騎牆派，大家都唔覺佢有乜嘢威脅性。但老毛屍骨未寒，華國鋒就搵埋兩個仍然有啲勢力嘅元老，李先念同葉劍英，快快手手捉咗四人幫，史稱懷仁堂事變。即係話，其實，華國鋒都係透過奪權坐正。

八，肅清四人幫之後，中南海班元老醞釀集體統治；即係唔再由一個人講過算數。由1980年起，呢個願望就更加明顯。而一直消費老毛嘅華國鋒，亦因為被邊緣化。其實，代入中共元老嘅思維就唔難明白，經歷過文革嘅呢班人，為自己又好，為後人又好，都唔希望宮廷政治會搞到有殺身之禍；一切有規有矩，最好。

九，1982年，中共廢除黨主席、副主席嘅職位，意味中共中央正式進入 Oligarchy 嘅時代。中共歷上，就只有三個中央委員會主席：毛澤東、華國鋒、胡耀邦；胡耀邦嘅歷史身位，就係中共最後一個中央委員會主席（1981-1982）。

十，至於我哋成日話鄧小平係改革開放「總工程師」，實情當時佢另一個正式身份，係中央顧問委員會主任，即係退休幹部之首。話說，文革令中共嘅管理出現斷層；七、八十年代，呢個情況未算明顯，但當時如果元老嘅唔退休，再過十年八戴，就一定青黃不接。所以，中南海當時嘅另一個共識，就係元老點都要退休，亦即係所謂嘅「廢除幹部終身制」。

十一，不過，元老退休，又唔可以完全無晒身份，所以就出現中央顧問委員會呢個建構；畀中南海嘅居民，繼續享有個 honorary 嘅殊榮。點解要畀呢班人特殊身份？話說老毛晚年，中共元老其實已經討論過點樣處理權力交接嘅問題；中央顧問委員會嘅構想，最初其實係老毛提出。成語「騎虎難下」大家都聽過；權力其實同老虎一樣，當你透過奪權而上位，失去權力嘅時候，你都會驚會畀人尋仇。所以，1982年華國鋒全身而退，其實都係中共嘅成功轉型。要知道中國幾千年歷史裡面，權力和平交接，非常罕見。

十二，由1982年到1992年，中央顧問委員會影響力分分鐘大過中共中央委員會。當年班元老，唔係個個都甘心退居二線；所以有時都借故搵位宣示自己嘅地位。1983年廖承志去見列寧，辦白事嘅過程，就有元老向胡耀邦發爛渣。

十三，今時今日睇返，改革開放好似一切都順理成章。不過，任何改革，都一定有利益嘅重新分配。八、九十年代，改革國企、公營部門，鄧小平、胡耀邦，一樣都面對內部矛盾；當時中共裡面，一樣有人反對改革開放。八十年代另一個好重要嘅議題，就係裁軍。1978年軍費佔中國政府總開支嘅 17.37%，到1984年就減到 10.63% 。我認為呢個亦都係胡耀邦其中一個得罪黨內勢力好嘅原因。

十四，據說，鄧小平本來計劃自己同李先念、陳雲等元老，1987年全退；胡耀邦，就升上神枱（但唔知點擺位）。1986年中爆發丙寅學運，中共裡面嘅死硬派，借勢倒胡耀邦；就連鄧小平、趙紫楊，都企埋對面。結果，都未等到中共十三大，1987年1月胡耀邦就劈炮唔做中共總書記。但比起從前嘅中共內鬥，呢次都只係一班中南海長者疲勞轟炸七日七夜，無人死，無人坐監，算係斯文。

十五，另一邊廂，八十年代中，世界進入後冷戰嘅 beginning of the end。蘇聯危危乎，中共亦面對存在危機。中共裡面嘅強硬路線，真心相信「資產階級自由化」嘅結果就係結束一黨專政。呢件事上面，鄧小平嘅立場一直都好清晰：改革只係手段，目的係要確保中共嘅統治不受威脅。

十六，由1986年到1989年，中共無理唔知到蘇聯有幾咁失控。With perfect hindsight，1989年嘅學運，中共一定會鎮壓。無論係當時抑或今日，從中共領導人嘅立場去睇，鎮壓學運係正確嘅，否則就好似蘇聯咁瓦解。

十七，由胡耀邦落台到1989年，強硬路線勢力好似佔上風。但從大圍環境去睇，開明派嘅觀點，似乎先係當時大多數人嘅願望。所以1987年十三大，胡耀邦雖然已經失去實權，仍然高票當選中央政治局委員；反而最積極攻擊佢嘅保守勢力，得票反而最低。

十八，蘇聯解體，中共嘅另一個結論就係：「改革開放都係正確嘅。」蘇聯就係因為太遲經濟改革，所以最終失救。所以，1989年之後，中共嘅首要任務，就係proritize 發展 ；「發展是硬道理」呢句說話，就係鄧小平 1992年南巡嘅時候講嘅。與此同時，之前所講嘅中央顧問委員會，亦係1992年結束。

廿一，江澤民，可以話個意外上位嘅人物；發生1989年學運之前，江澤民本來計劃退休做個全國政協副主席。點知一年內佢由接任趙紫楊做中共中央總書記，年底接埋鄧小平畀佢嘅軍委主席。但似乎當時如果唔係江澤民冷手執個熱煎堆，上位嘅就會係班 hardliners。某程度上，江澤民將中國大陸八十年代嘅開放氣氛，延續多十幾年。

廿二，不過，記得當時都有人質疑，江澤民從來都係經濟技術官僚，佢點樣可以令解放軍服從？實情係，唔需要係軍人出身，都可以令軍隊服從。組織權力，一曰資源嘅分配，即係財政預算案，二曰人事任命。之前講八十年代中國軍費停止增長，你估下幾時又加返？Bingo，就係由 1992年開始。至於中共政治裡面所謂嘅江派，其實呢個時代上位嘅官員，尤其係解放軍將領。

廿三，由1985年起兩會恆常化，到江澤民時代，兩會就更鋪張。但返去最初嘅問題，明明知道假民主，點解仍然要搞咁大場龍鳳？

廿四，第一個解釋：中共呢場戲係做畀十幾億中國人睇。第二個解釋：中共呢場戲係做畀全世界人睇。

廿五，1990年3月，兩會如期三月底舉行。全國人大會議期間，江澤民正式獲提名中央軍委主席，接替請辭嘅鄧小平。兩會前，有北大學生寫信畀江澤民，希望佢指導人生；江澤民接見大學生，勸勉佢哋要努力讀書，好好服務人民。即係，呢啲公關橋段，真係做畀邊個睇呢？

廿六，我主觀咁認為，兩會，最主要都係做畀全世界人睇。所謂大外宣，其實就係因為中共好著緊人哋點睇自己。更正確咁講，由帝國時代開始，呢個地方嘅政權，最頭痛嘅問題，就係唔知點樣以平等尊重嘅態度，去對待其他政權。一時，就以天朝自居，一時，又話列強欺凌。尤其係自從廿世紀開始，國際地位係政治認受性其中一個非常關鍵嘅因素；只要話你為民族爭光，就係英雄；話你喪權辱國，就乜嘢光環都無晒。。

廿七，自從七十年代中共重返國際舞台；就一直好積極咁去搵自我定位。1974年鄧小平聯合國嘅發言，相信大家都好熟悉。如果從抽離、宏觀嘅角度去睇，由中共同蘇聯 decoupled（1960） 到Nixon 訪華、中共重返國際舞台（1972-1974），中共嘗試投射嘅形象，係第三世界嘅領袖。而所謂第三世界，其實係相對於「第一世界」（歐美），「第二世界」（蘇聯及衛星國）；毛澤東提出第三世界呢個講法，其實都係要同蘇聯劃清界線。

廿八，但係改革開放之後，第三世界嘅領袖呢個定位，有少少不切實際；尤其係呢十幾年好多國家都重新工業化，成為新興市場。所以，中共又要投射另一個形象；一個有經濟發展潛力但又不失社會主義制度嘅組合。咁點樣去將呢個矛盾 reconcile 呢？兩會嘅符號意義，就係話畀人知，民主唔一定係全民普選嘅，協商一樣可以好 inclusive。亦即係話，兩會其實先係真正嘅「大外宣」。

【題外話】時至今日，中共外宣都，仍然堅持中國係協商政治。十三．五嘅時候，佢哋放咗條 Youtube 片，如果唔怕煩膠可以睇睇（雖然睇完都唔會知十三．五其實重點係乜）。

廿九，兩會作為大外宣，香港肯定係重要議題。過去兩年，舊年就國安法，今年改選舉制度。唔好忘記，由2007至2012年，習近平係中央港澳工作領導小組組長；佢嘅 portfolio 裡面，香港其實係好重要嘅一個項目。

三十，2018年修憲，人大取消國家主席任期限制，有人話習近平為永續權力鋪路。但正如上面所講，可以一直做國家主席又點？當年劉少奇咪一樣係國家主席？中共權力真正核心，其實係解放軍；而中央軍委主席一職，其實本來就無任期限制。

三十一，中國政治離唔開宮廷政治。毛澤東、鄧小平，就話真係上咗神枱，但江、胡兩代話事人，其實都仲在生。佢哋呢兩位話事人嘅權力交接，就算有暗湧，亦未至於刀光劍影。

三十二，相反，習近平上位嘅過程，不但多咗一份懸疑；佢上位之後，亦第一時間肅清對手；包括薄熙來、周永康、徐才厚、郭伯雄、令計劃等。當只有攬權，先可以保命，爭奪權力嘅手段亦更易見血。當權力交接失序，最不安嘅就係掌握權力但又怕失去權力嘅人。

三十三，中南海班人，雖然點都唔會改變「太祖」毛澤東嘅歷史地位，但佢哋都唔會想返去五、六十年代嘅日子。好封建咁諗，任何人想安心上神枱，最穩陣就係可以同「共太祖」齊名。江、胡退休前，都將自己冠名嘅理論，寫入憲法。江，就係「三個代表」。胡，就係「科學發展觀」。不過，前人都要等退休先至將思想寫入憲法，習近平就心急到2018年就將新時代中國特色社會主義思想據為己有。

三十四，畢竟，中共嘅意識形態裡面，無人可以超越毛澤東；正如唔會有美國總統，夠膽話自己偉大過華盛頓。不過，我聽過另一個講法：「習近平要超越前人地位，就只有否定江澤民、鄧小平。」

三十五，否定江澤民，就話可以清除佢嘅黨羽。否定鄧小平，具體要做啲乜嘢呢？話說，鄧小平最少有三個 signature。外交，鄧小平最深入民心莫過於 1974年聯合國嘅發言。習近平，放戰狼，講人類命運共同體。香港一國兩制，鄧小平話五十年不變，習近平就索性徹底改造香港。改革開放，好叻咩？習近平連民企都變成黨委指揮。

三十六，習近平改變鄧小平定落嘅方針，可以係刻意嘅部署。

三十七，按正常規律， 2022年係中共換屆之年。當然，好多人都假設，習近平將會冧庄。但冧邊個庄？中央軍委？總書記？歸納以上嘅中共簡史，其實可以見到權力交接，始終都係最核心嘅矛盾。未來十幾個月，真係會風平浪靜？