從阿拉斯加外交會議睇中美關係 (Patreon)

一，見到好多人分享台灣嘅「鮭魚之亂」，我好主觀感覺得，香港人其實係好羨慕台灣人呢種小確幸。有件事我都要懺悔一下；幾年前，我都好睇唔起呢種對小確幸嘅追求，但今日睇返轉頭，其實係我唔識得欣賞當中嘅智慧。台灣人生活如常，世界各地嘅人見到，都應該會對呢個地方，另眼相看。

二，自疫症爆發以來，台灣，成個島，兩千幾萬人，確診個案加埋990宗；死亡人數，係十個。

三，數字信唔信得過？台灣話晒都有兩黨；假如民進黨政府出古惑做手腳，一定會畀對家踢爆，甚至對面岸踢爆。用返林肯嘅名言，你可以一時三刻呃全部人，又或者永遠呃少數人，但你無可能永遠呃晒所有人；民眾對疫症有幾嚴重，相信都有一定嘅感覺。

四，至於海峽另一邊，另一邊就大搞疫苗外交。好多第三世界國家，都得到國產科興疫苗；例如好多新聞媒體，都將智利講到係接種疫苗最成功嘅南美國家。睇返智利每日嘅確診個案，由2020年下半年平均每日唔夠2000宗，到2021年上升到每日3000幾、4000幾、甚至最近嘅 5000幾案。最陰公係智利嘅人口，其實得1800萬，仲少過台灣。不過，都係戴返個頭盔：我唔敢話疫苗無用，亦唔識建議大家究竟打唔打疫苗。呢啲決定，都係每個人自己判斷喇。

五，根據中國大陸官方公佈嘅數字，十三億人裡面，只係有90000幾個確診個案，死亡人數唔到5000。從走勢圖睇，中共其實舊年三月已經成功控制疫症嘅擴散；當時未有疫苗，究竟中國政府由中央到地方，究竟係用乜嘢具體嘅方法呢？人口只有中國 0.5% 嘅香港，又限聚又 WFH 又禁呢樣又禁個樣又人人都帶口罩，確診個案都過萬宗，死 200 幾人。其實香港嘅情況，以世界嘅標準來講，已經好成功。

六，又記得舊年二月，大外宣已經吹噓由一星期內起間醫院，嘅中國速度，到今時今日嘅疫苗外交。目前世界有 33% 嘅疫苗由中國生產，係世界第一。27%來自美國，排第二。歐盟就佔 19%；印度就 13%。直到目前，美國都無出口疫苗。歐盟就自己都唔夠分，所以就無乜出口；最近都話要再收緊歐洲大陸製造嘅出口；當然講緊係對英國喇。

七，其他國家又點呢？Biden 剛剛公佈，分別會向加拿大供應 150 萬劑 AstraZeneca 嘅疫苗，向墨西哥供應 250 萬劑。有幾點要留意：一來，呢啲疫苗係要還嘅，以物易物。二來，美國自己嘅 FDA 係未通過呢隻疫苗嘅使用，但加拿大、墨西哥就跟世衛 endorsement，所以肯去用。最緊要係，美國向兩個鄰國借出自己用唔到嘅疫苗，好 remote 咁講都可以減少因人口流動帶來嘅輸入個案；尤其係對墨西哥。所以，都唔可以話無功利主義嘅角度。人世間，最得人驚嘅事，往往都係由無事獻殷勤開始。

八，大陸同印度，就出口近六成嘅疫苗；兩個人口大國，反而最積極出口疫苗，可以點解釋呢？好 dark 咁講，雖然話生命無價，又有人話人多好辦事，但正如史太林話齋：死一百萬人？都係統計數字之嘛。

九，今次疫情，究竟係反映世界新秩序？定係改寫世界秩序呢？有預言家話，今年底，世界就會回復正常；但我就已經唔敢講，何謂正常。

十，今個星期，美國國務卿 Tony Blinken，白宮國家安全顧問 Jake Sullivan，約咗中共中央外事工作委員會辦公室主任楊潔篪，國務委員兼外交部長王毅，響阿拉斯加見面。開會前，有人吹風話，美國要扭轉 Donald Trump 任內嘅作風，又話如果傾得好好地，就盡快安排 Biden 同習近平嘅峰會。但去到開會之前，雙方而即刻起晒扛。

十一，今次阿拉斯加嘅會面，據說係美方提出（所以揀美國主場）。背景呢就係早兩個星期左右嘅四方會議。四方會議，就係日本、澳洲、印度同美國。其實拜登當選後但未坐正，就已經打開口牌話會重返多邊外交路線。有人以為多邊主義即係乜都有傾有講；不過我點睇，都似係食住個勢，以合縱抗連橫。

十二，講開合縱連橫，不妨講埋當年毛澤東同蘇聯反面之後，提出第三世界呢個概念。第一世界，就係美歐為首嘅資本主義、帝國主義餘孽。第二世界就，係蘇聯為首嘅白人修正共產主義、都仲係帝國主義。中國同其他歐亞非民族國家，就係第三世界。理想中嘅第三世界，每個民族國家，都咁高咁大，無人做大佬，亦無人要做契弟；所以亦有1974年鄧小平聯合國提出中國永不稱霸論。

十三，胡溫一朝，中共開始就講大國堀起。2006年， CCTV 拍咗套紀錄片，講西班牙、荷蘭、英、法、俄、美等大國嘅興衰。最後一個 episode 講到美國，然後便沒有然後。當然，心神領會就見到製作人暗示下一個大國堀起係自己喇。與此同時，又推動北京共識；即係話世界各國唔一定要跟足歐美嘅一套，唔同嘅民族國家，可以有自己嘅發展道徑、制度、文化。又借孔子學院，搞大外宣；到後來嘅一帶一路，建立亞非歐大陸嘅經濟貿易關係，其實以上種種，可以追溯返去毛澤東提出嘅第三世界論，只不過所謂嘅底氣，越來越充沛咁囉。

十三，現實中，亞洲嘅勢力平衡，其實好微妙。中國、印度、印尼，分別係世界第一、第二同係第四大人口嘅國家。呢區裡面，人種、宗教都極之咁複雜。經濟上呢，除咗日本呢個上世紀嘅經濟大國，中國、印度係兩個經濟絕對質量極大嘅力量，其他東南亞新興市場，亦唔失禮。如果用舊世界傳統嘅地緣政治觀點去分析亞洲，其實有好多 fault lines。

十四，但此一時，彼一時。過去因為宗教、種族甚至意識形態而引發嘅矛盾，又唔代表會永無止境咁輪迴落去。冷戰後相對和平嘅幾十年，似乎話畀我哋知：「搵食，唔一定要打打殺殺嘅。」國與國之間，可能仍然偶爾會有邊境衝突，但我哋距離以前嗰種舉國上下一齊參戰嘅瘋狂，似乎已經越來越遙遠。冷戰，其實都已經係一種相對上比較溫和嘅衝突；1960年代開始，就有所謂 Proxy War，即係兩大強國唔直接埋牙，但唔同地方就有啲零星嘅衝突。畢竟，當大家都諗到，一個陰差陽錯，兩個大國嘅衝突，結果可能會搞到人類滅亡，雙方自然會更加克制。好似愛因斯坦曾經講過，佢唔知第三次世界大戰會點樣打，但佢知道第四次世界大戰，一定係用木棍同石頭做武器。

十五，由冷戰再發展到今日，所謂嘅戰爭已經被極端主義份子發動嘅恐怖襲擊所取代，某程度，呢啲都可以算一種跨國嘅游擊戰。

十六，普魯士「兵聖」 Carl von Clausewitz 話齋：「戰爭只係政治嘅延伸。」所謂國際關係，亦係國內政治嘅延伸；美國重返亞洲，四方會議嘅陣勢，明顯以中國為假想敵。另一邊廂，中國就希望以一帶一路建立「亞非聯盟」，同時盡量令歐洲同拉美等地嘅國家，保持中立。美國係唔係要攻打中國？又或者係唔係中國要稱霸世界？

十七，中共其實一直都好明確咁表態，絕對唔容許任何超越佢安全系數嘅現象發生；那怕呢啲事件發生響中國境外，都一樣唔容許。乜嘢叫做超越安全系數？即係威脅到一黨專政囉。世界越來越多連繫，外面發生嘅事，點都會「出口轉內銷」。

十八，另一邊廂，有人認為，美國過去幾年嘅強硬態度，只係 Donald Trump 嘅個人因素。但細心觀察就會發現， 近年最易觸動美國人神經嘅事，其實係話神聖不可侵犯嘅總統選舉，受外國勢力干預操控；但到目前為止，大奸角都仲係俄羅斯。

十九，至於對華政策，美國民主共和兩黨，都明顯有共識，認為中共唔會因為經濟發展而帶來政治上嘅變革。但中國變定唔變，又關美國乜嘢事呢？實情唔止美國，其他地方都越來越多人認為，中共嘅影響力已經過咗火位；尤其係經過今次瘟疫，大家睇得更加清楚，中國嘅問題，已經影響到全地球人，一係就 engage，一係就 contain，但無論如何，都唔可以任由中共用佢嘅一套方法去處理問題。

十九，中美呢次外交會議之前，美國公佈新一輪制裁名單，雖然感覺已經有啲麻木，但姿態上似乎向全世界講：「拜登政府嘅對華政策，會繼續強硬。」美國嘅對華政策，唔係總統個人意願，亦唔係黨派之爭，短期睇唔似有緩和嘅可能。暫時從雙方嘅聲明來睇，呢次會面應該唔會有啲乜嘢實質嘅成果。

二十，按照目前軌跡，中國嘅未來究竟個會係點呢？史上，呢片土地上幅員最廣嘅帝國：唐、元兩個朝代，影響力最主要係向西延伸到中亞一帶，但維時都只不過係帝國全盛時代裡面幾十年。至於對東亞、南亞一帶，影響主要來自長期嘅人口流動以及經濟活動。明帝國初期，曾經有嘗試過擴張海洋影響力，但好快無疾而終；呢個題目一定會搵機會再探討。

廿一，中國會唔會稱霸？呢個問題，未來嘅歷史，自然有答案。但其實更應該問嘅問題係：「中共點解要稱霸？」

廿二，任何組織，都有共同嘅目標。小至一個家庭，大至一個帝國，都有最少一個共同嘅存在目的。其實由清末到第一次世界大戰後，即係「新中國 1.0」，知識份子嘅集體意識裡面，成日就諗住點樣去挽回民族尊嚴。1919年五四運動嘅時空背景，係Treaty of Versailles 將德國佔領嘅東三省，交畀日本。乜嘢德先生、賽先生，都只係手段，而唔係目的。

廿三，新中國 1.0 係個 false start；呢個時空裡面，呢片土地從來未出現過一個大一統政權。當新中國 1.0 差唔多可以清場，就爆發第二次世界大戰。

廿四，中共成功奪國，最主要原因係蘇聯放棄蔣介石，選擇咗毛澤東。有理由相信，史太林無諗過佢去見列寧之後，毛澤東會同赫魯曉夫反面。

廿五，由咸豐年到新中國 1.0 到新中國 2.0，「中國人站起來」呢個 promise，都係統治合理性嘅來源；係咪真係站起來，企得有幾直，唔係重點。呢片土地上嘅「被統治者」相信，只要佢哋嘅統治者得到其他人嘅認同，佢哋就站起來。

廿六，新中國 2.0 第二個心理關口，就係大一統。由於新中國 1.0 令好多人，尤其係知識份子，深信只要唔統一就企唔起身，所以佢哋會不惜一切代價，都要維繫大一統；就算經歷咗成個世紀，呢嗰諗法都繼續深植人心。

廿七，至於太平洋另一邊嘅美國，就算你用社會棟樑嘅講法，呢個國家嘅共同目標，其實都只不過係希望到處賣嘢。以前就賣薯片、汽水、洗頭水；後來就賣 Mulan、 iPhone 同 Tesla。美國除咗想賺錢，更加想借錢唔駛還；最緊張係大家會唔會繼續買佢嘅債券。其實，有個咁嘅霸權，都幾好吖，至少都有薯片、汽水、洗頭水、Mulan、 iPhone 同 Tesla 吖；最衰都只不過係令息口低無可低，death to the rentiers。

廿八，假如問我：「世上最可愛，最美好嘅共同目標係乜？」我一定會話：「小確幸。」無錯，呢個目標睇落好似好簡單，但其實佢係極少數可以完全無違和感，無矛盾咁貫穿晒個人到家庭到社會到國家到全世界嘅理想，人類文明嘅最大公因數。

最後，祝大家週末平安。