復活節隨筆 (Patreon)

一，復活節，究竟紀念啲乜嘢？「耶穌受難，第三日從死裡復活。」有宗教信仰嘅朋友應該，會咁樣答。

二，耶穌從死裡復活，大地從寒冬甦醒；北半球嘅春分，亦代表冬天正式過去。唔同嘅文明，都有傳統習俗去迎接呢個時節。猶太人未出埃及之前，就已經有逾越節。基督教信仰出現之前，歐陸早就有兔仔、蛋等嘅傳統符號去標誌冬去春來。甚至乎遙遠嘅東方，都有清明、寒食。

三，以前嘅社會，就算係自耕農，都唔會有太多嘅盈餘積蓄；經過一個冬天之後，可以食嘅就只有穀種。如果連穀種都食埋，明年就真係穀種都冇得食。所以，洋人嘅四旬期，要節食、齋戒。遠東嘅寒食節，雖然維時得三幾日，但意義都係一樣，都係節食、齋戒。

四，「生而勿殺，予而勿奪，賞而勿罰。」我好鍾意《黃帝內經．素問》呢十二隻字。狹義咁去睇，呢段講嘅係春天嘅養生之道。但廣義啲咁睇，其實都反映咗傳統農業社會對大自然嘅感悟。舊社會，就算有乜嘢肅殺嘢，都盡量唔會春天去做；就算當年猶太人要清算耶穌，都等逾越節過咗先出手。

五，先此聲明，我對基督教信仰，絕對無半點不敬之處；但有時我都會諗，假如用現代嘅價值觀去講耶穌受難，究竟仲可以有啲乜嘢角度？Pilate 算唔算 Hannah Arendt 講嘅平庸之惡？將 Pilate 同 Eichmann 對比，又得唔得？

六，又或者，真正嘅罪魁禍首，係群眾？Pilate 可以辯解，話自己只不過係順從民意。Judas 都可以話，出賣耶穌係被迫，自己亦都係受害者之一。Peter 更加可以求情，話雖然自己三次不認主，但最終都做返一件事，創立教會，將功補過。

七，群眾，就真係無任何開脫嘅理由。不過，只要當每個人嘅雙手都沾滿鮮血，就唔存在誰比誰更高尚嘅比較。群眾，最少有兩個原罪，一就係好自然咁對同自己唔同嘅人，滋生無緣無故嘅恨；其次就係有唔少人為融入群眾，埋歿自我。

八，不過，基督教信仰嘅核心，唔係追究責任，而係畀機會每個人去悔過，重新做人，追求真正嘅美善。換句話說，每個人都有救贖嘅機會。從呢個角度睇，基督教都幾個人主義。

九，宗教，雖然係舊社會嘅事物，但其實兩千幾年，人類嘅本性仍然都係無乜大轉變。現代社會，原則上畀每個人有更多人生嘅選擇，但我哋成長嘅經歷，由教育到大眾流行文化，其實好多時我哋都只係選擇加入唔同嘅群體，將自我寄託去各種唔同嘅身份上面。

十，我唔係話每個人、各方面都要與別不同。自由，亦唔係話做乜都得；不如我具體咁畀個例子：「人，有無自由去違反萬有引力吖？」答曰：「呢個唔係自由嘅問題，係能力嘅問題。」所以，如果你嚮往自由，首先你要盡量發揮自己嘅天賦；聖經福音故事，都係咁講。

十一，自由嘅真正意義，而係有能力嘅情況下，可以選擇唔去做一啲事。有選擇，就有代價；當每個人為自己嘅選擇付出代價，就係公義。當有人要為其他人嘅選擇而付出代價，就係唔公義。 

十二，「你上面所講嘅，好理想主義。」都係㗎，原則就係用來去追求嘅，係咪？沒有人是一個孤島，但如果可以嘅話，就算身處人群當中，我都會盡量保留一啲空間畀自己。

十三，無自我，就唔會有自由。相信呢度唔少朋友，都係好似我咁，就算同其他人追求同一個目標，但當成街人一齊叫口號、唱歌嘅時候，會感覺到好唔自在。

十四，曾幾何時，有啲題目，一睇就知要第一時間抽水，但漸漸我對呢種討好陌生人嘅行為，感到好矛盾。先唔好講到話要牽動群眾情緒咁厲害，就算令自己情緒起伏，我都好唔舒服。唔好誤會，我絕對唔係一個平靜溫良恭儉讓嘅君子。剛好相反，就係因為脾氣壞，芝麻綠豆嘅小事，都可以令我情緒爆發；亦因為呢個原因，先至咁在意 peace of mind。我就算唔識得點樣去對別人仁慈，至少都會善待自己。

十五，最後借耶穌嘅話作結：「他們不知道自己在做甚麼。」