美版邵音音與暴龍哥 (Patreon)

一，狼耳街華人李聲揚 叫Janet Yellen 做「阿美利堅邵音音」  ，笑死。

二，拜登又係唔係美派暴龍哥？唔係講笑，拜登委任 Yellen 做財長，我覺得真係一個心結。首先，大家要明白，美國政府嘅運作，以及財長嘅職責。

三，好多人都以為，財長好似 CFO 咁，負責批唔同政府部門嘅預算，然後就代表政府，去國會攞 approval。實情唔係咁。

四，以上所講聯邦政府嘅開支，係由 Office of Management and Budget （OMB）負責；OMB 直接向總統辦公室（Executive Office of the President）問責，對口單位係服務國會嘅  Congressional Budget Office。

五，基本上，美國聯邦政府各大小行政部門，包括海陸空三軍等武裝部隊嘅開支，即係我哋所講嘅 establishment，財政就係由呢一千幾百人控制。

六，咁，財政部同財長做乜嘢？財政部同財長，主要負責各種再分配政策，例如社保、醫保，又或者近期嘅派錢，以及稅收。

七，OMB 同 財政部互不從屬；點解有呢個制度設計呢？官僚設計得呢個制度，就梗係以服務佢哋自己為最大利益喇。呢個設計之下，政府開支分就開兩部分，OMB 睇嘅官僚自身嘅利益；財政部同財長，嚴格來說，係為政治服務。

八，好多人話，Washington DC 真正話事嘅，係一班面目模糊技術官僚，佢哋以海量嘅資訊同繁複嘅程序，挾天子以令諸侯嘅。

九，總統、國會議員等政工作者，其實早就已經處理唔到政策嘅細節。一條法案，閒閒地幾百頁；早幾年我同美國 Think Tank 嘅朋友傾開，大家都已經研究緊點樣用 machine learning 去監察政府開支帳目同法案。

十，拜登一就任，第一件事就係派錢，其次就係美債息急升。兩件事，當然有一定嘅關係，更重要係兩件事都關 Yellen 事。

十一，點解任命 Yellen 呢？話說財長一職，都係好重要嘅任命，可以話係副總統、國務卿之後，就係財長。年初，好多社會棟樑知道 Yellen 做財長，鬼死咁開心。開心乜嘢呢？因為係第一個出任財長嘅女性喎。

十二，如果係因為 Yellen 係女性而為佢嘅任命而打鑼打鼓，我又覺得有少少膚淺。當年佢夠係第一個女性嘅聯儲局主席喇，咁又點？如果佢唯一值得比人講嘅，就只有性別，你話拜登呢個決定，係唔係好暴龍哥？有個社會棟樑 Dessa 寫咗首歌賀 Yellen 出任財長；講真，我個人覺得首歌少少 over 咗。 

十三，Yellen 發圍，最主要靠上世紀九零年代接替Joseph Stiglitz 做 Bill Clinton 嘅 Council of Economic Advisors 嘅 Chair。

十四，其實 CEA 有乜嘢做嘅呢？好 cynical 咁睇，學者借個自己嘅名聲畀政工作者，政工作者，又畀個平台學者去跳出象牙塔。

十五，Yellen 係史上任期最短嘅聯儲局主席；據聞 Trump 本來有意畀佢繼續，但最終由 Powell 接手。

十六，Bernanke、Yellen、Powell 究竟立場有乜嘢分別？我真係唔識分喎。鷹派？鴿派？我諗大家都真係唔好過份解讀。聯儲局目前最主要嘅工作，就係用神奇嘅 balance sheet 去吸納聯邦政府嘅債務，但同時又唔會令人對美元失去信心。

十七，咁，何謂對美元失去信心呢？美元購買力明顯下降，咪就係對美元失去信心囉。美元購買力，又分對國內同國外。依家反正世界各國都係咁寬鬆，美元兌其他貨幣嘅購買力，就唔會有太明顯嘅削弱。

十八，至於美元對其他一籃子嘅貨物、資產嘅購買力，好教科書嘅講法，咪就係通脹囉。理論上，所謂嘅 inflation targeting 應該係零，係零呀。由 Bernanke 開始所講嘅 2% inflation targeting，真係唔知邊度鳩 up 出來。

十九，當年由 Milton Friedman 等主張嘅 Modern Monetary Theory，都只係舉例話「假如 GDP 平均每年增長 2%，monetary base 就可以 long term 平均每年增長 2%」；真係讀過 Econ 102 都知，以上所講嘅 inflation targeting，係零呀！

十七，至於美國財長，最最最最重要嘅工作，就係令人對美債繼續不失信心。咁，點知市場對美債嘅信心呢？睇債息囉。如果美債最終只係得返一個買家，而呢個買家係聯儲局，咁就仆街喇。

十八，另一個做法，就係夾埋「市場參與者」，一齊做起美債個價。「嘩，做市喎，得㗎咩？」國家叫你做，就一定得；掉轉頭做，就少少都唔定。

十九，但錢從何來？唔緊要，國債係最安全嘅資產，銀行買咗就可以當做儲備，然後槓桿借返出去，賺大錢，發大財。

二十，假如咁簡單，好似童話故事嘅皇子公主，永遠開心快樂咁生活落去，幾好？但如果無人借錢呢？「咁低息，點會無人借？」「借來做咩？」「買樓、買股，乜都好喇。」「成手都係貨喇，仲買？」「買喇，唔買又貴啲㗎喇。」

廿一，如是者，漸漸銀行坐到一屁股貨，啲客又係一屁股貨；依家嘅情況係，資產供不應求，垃圾都係資產。

廿二，咁又點？當垃圾都係資產，最大嘅問題唔單止係資產價格有泡沫，資產嘅回報率，一樣都有嚴重嘅扭曲。成個市場嘅回報率，一樣係趨向零。

廿三，「唔係喎，你睇債息係咁升，啲人似乎寧願買垃圾，都唔買理論上零風險嘅美國聯邦政府國債喎，仲唔係 risk-on？」嗯，又或者，你逆向思維咁諗，啲人視美國聯邦政府嘅債券，連垃圾都不如，要畀 discount 先肯要？

廿四，假如係咁睇，就解釋得到 Yellen 點解話要加稅。當然，加稅，就一定得罪人。但你最唔想得罪嘅，就一定係自己嘅選民；對家嘅支持者，就唔得罪都一早得罪咗，唔怕得罪。大財團，金主，其實唔怕你加稅，反正稅務法規咁複雜，佢哋有一大班律師會計師搞，有一百萬個方法去避稅。就算全球有最低消費都唔驚，一樣都係兵來將擋。反正，呢招變相令中小企更難生存，對大財團，除笨有精。

廿五，另外，以上所講嘅，泡沫越吹越大情況  ，其實都發生咗好多年，但呢個泡沫一直都唔爆。但一直唔爆，又唔代表永遠都唔爆。音樂椅嘅遊戲，大家都知音樂會停，但你唔可以一早就坐停，咁樣唔好玩嘛。所以，投機，都係一場講究嘅係反應嘅遊戲。

廿六，Yellen 話加稅，仲要全球咁加，依書直說咁講，出現嘅可能性好低。以前細個讀 Game Theory，講到 OPEC 夾份合謀定價，結論係最終一定有二五仔 undercut 盟友，最終令呢個 cartel 瓦解。但如果由 big brother 出手去維持呢個 cartel 又有冇可能呢？都唔係唔可能，但要知道最終嘅 enforcement 一定好粗暴下；輕則貿易金融制裁同罰款，重則又係火箭大炮。

廿七，即係話，由概念到落實，你估真係好似當年 Bretton Woods 咁，開下會就傾得埋咩。

廿八，再講，當年 Bretton Woods System 以外，有第二世界（蘇維埃）同第三世界（連蘇維埃都不如）嘅秩序。今時今日美國如果整啲所謂國際經濟新秩序，真係同鬆章畀對家無分別。

廿九，前車可鑑。國際政治經濟，從來都係睇邊個首先穿煲；政工作者，只要一日未爆煲，好自然都會擺出一個「睇吓邊個死先？」嘅姿態。

三十，都幾肯定，以目前嘅情況，所謂嘅全球企業利得稅最低消費，都係一個得個吹字嘅概念。不過，睇美債息走勢，十年期國債嘅息，呢個月都仲係升緊；難怪 Yellen 得個吹字，都要吹住先。