就算唔識佛利民．都一定識 Elon Musk (Patreon)

01，早兩日，狼耳街華人李聲揚 whatsapp 篇文畀我，題為：「而我不知佛利民是誰」。原來係曾國平教授信報嘅專欄文章。簡單講，篇文話今時今日嘅經濟系學生，都唔識邊個係佛利民，真係代溝。

02，曾教授就畀咗幾個理由：一，學校唔再教科學方法；二，全球量寬之下，貨幣供應學派不合時宜；三，後冷戰之後，唔再講意識形態；而且個世界主流價值觀都講再分配，自由市場又不合時宜；四，更重要係學術工作嘅分工越來越仔細，好難再有啲家傳戶曉嘅學者。

03，除咗經濟學，其他學科都又係一樣。物理學家，試問有幾多個入到屋？「唔係喎，曾教授講嘅係經濟系學生唔識佛利民喎。」八零年代之後，Stephen Hawking 都真係算家傳戶曉；至少連電視劇 Big Bang Theory 久不久都會搵佢客串下先喇。

04，早幾日寫咗篇 Amusing Ourselves to Death 嘅讀書報告；一句講晒：「就係宗教、政治都娛樂化，社會自然有明星級嘅神職人員、政工作者，社會氣氛亦因此轉變。」咁，學術有冇娛樂化呢？有，梗有。佛利民嘅專欄，當然都好多讀者，但我都幾肯定佢入到屋，係因為佢久不久就上電視。當年，佢甚至拍咗一套紀錄片 Free to Choose 添。

05，Stephen Hawking，無錯佢係好出名，但大多數人對佢嘅認識係⋯⋯咪係佢把合成聲囉。當年除咗本 A Brief History of Time，佢亦都有機會上電視。No offense，Hawking 其實係有濫用自己嘅名聲；好似佢好肯定咁講話永遠都唔會搵到 Higg boson 存在嘅證據。結果，2012年 CERN 嘅 LHC 證實 Higg boson 嘅存在；之後 Hawking 亦都好有風度咁認輸。

06，學者，有人好出名，幾乎係大眾崇拜嘅偶像。另一種，就得罪人多，甚至乎畀人排擠到身敗名裂（例如 Ignaz Semmelweis）。當然，亦有好多，其實都係打份工。雖則職業無份貴賤，但人工有高低，有穩定同唔穩定之別。當你係已經攞咗 tenure ，都咪話唔爽。要行到呢一步，最理性嘅做法，係跟個好老細，做個聽教聽話嘅門生。即係點？你老細嘅文，嘅立論，你唔係唔畀面吓話。就係咁，門派、馬房就漸漸出現。

07，上世紀七、八十年代，經濟學係咪芝加哥學派大晒呢？咁，佢哋呢班人又真係幾有影響力。最重要係成個廿世紀，經濟學者同政工作者嘅關係非常之咁密切。由當年嘅凱恩斯，到後來嘅芝加哥學派，個個都又係學者又係政策 KOL，咁成日上電視、寫專欄，都好合理。

08，咁，物理學家呢？上世紀仲係冷戰後期，兩大陣營都要講到自己科技幾咁厲害，對太空幾咁有認識。所以，美國都出咗 Carl Sagan 、Neil Degrasse Tyson。

09，咁點解呢一代人，唔再認識學者嘅？我嘅睇法同曾教授都有啲近似，一來就係學術圈子越走越窄，同外面嘅世界越走越遠。但正如上面所講，亦都唔可以否認，有啲地方，學術馬房文化嘅情況非常嚴重；徒弟為份工，師傅就踩著啲徒弟上位；真係有少少似武俠小說裡面嘅情節。又或者，小說都只不過係取材現實，再套落一個虛擬嘅世界。

10，其實，呢代人都有佢哋 aspire 嘅對象嘅；與其去崇拜學者，點解唔直接去崇拜「社會運動家」同新一代嘅資本家？你睇當年 Steve Jobs？嘩，呢啲咪 rock star 囉。你睇 Bill Gates，二合為一，又得咗。Elon Musk 就後勁凌厲，唔知結局會點。

11，所以，唔可以話自由市場無咗把聲。呢一代嘅資本家，自己以身作則，話畀全世界知自己嘅價值觀，點樣用行動去改變世界。

12，學者，真正工作，其實有兩個。一係發現知識，二係普及知識。其實兩者就無抵觸嘅，但有先後之別。如果無發現知識嘅真功夫，淨係不斷重複又重複，咁其實好易跌入去「教育娛樂化」呢個圈套。唔好誤會，我唔係話普及知識唔重要，但重複又重複咁去宣揚同一套思想，咁究竟係普及教育，定係洗腦？

13，發現知識，一係就針對啲大家都未搵到嘅答案。一係，就搵出前人睇漏眼、一廂情願嘅觀點。前者，機會可遇不可求；人類幾千年歷史，有乜嘢問題無人諗過？後者，兩千幾年來，提出新觀點嘅人，好多都要冒險；唔駛死都已經執返身彩。

14，真正嘅科學精神，其實唔單止係人人都有自由同權利去提出相反意見，更重要係是非對錯唔係對人而係對事。可惜係，好多所謂學術，都係偽科學，又或者好多明明係科學嘅範疇，因為象牙塔嘅文化，淪為偽科學。

15，呻多句：「真正嘅科學精神，就係唔應該有權威。」偏偏呢個庸俗嘅社會，大眾媒體放棄獨立思考，將呢個責任交畀權威。我大膽講句：「要由權威代表嘅科學，就唔係真正嘅科學。」

【延伸閱讀】偽科學與假平等