【TL；DR】Why We Sleep (Patreon)

01，「人點解瞓覺？」其實呢個問題都幾奇怪。「眼瞓，咪瞓囉。」實情係，好多人有失眠問題。眼瞓，但瞓得唔好；瞓得唔好，個人就好攰，ad infinitum。

02，所以，Why We Sleep 呢本書，唔止係講人點解瞓覺，亦都有講點解會覺得眼瞓（sleep pressure），同埋點解瞓覺咁重要。一般來說，呢類講健康嘅書，大家睇完就算，但點解呢本書可以成為一時嘅話題呢？當然，名人如 Bill Gates 嘅推介有好大影響。Gates 話，曾經佢以為瞓得多嘅人係懶。但睇完呢本書之後，佢改變咗睇法，每日無論幾忙都要瞓最少七個鐘。

03，Matthew Walker 寫呢本書，背後都有個幾大嘅目標：「喚醒公眾對睡眠不足嘅關注。」可以咁講，從佢嘅角度睇，社會公眾除咗低估睡眠有幾咁重要，亦都真係有部份人因為各種原因而睡眠不足，構成公眾健康嘅問題。

04，有 mission ，有冇 agenda 呢？多少都有。呢本書唔少篇幅講青少年嘅生理時鐘同成年人有乜嘢唔同，唔夠瞓點樣影響學習同成長。當中又有講到睡眠不足點樣影響效率，甚至構成危險，例如眼瞓揸車等同醉駕。另一個 myth 就係年紀大可以瞓少啲；Walker 就話年紀大係容易失眠，但唔代表唔需要瞓咁多。唔夠瞓，唔單止影響生活質素，亦會影響健康。老年人有健康嘅睡眠習慣，一樣咁重要。呢啲陳述其實意味各種社會制度嘅調整，例如學校嘅時間表、返工嘅時間表（係唔係要有午睡時間呢）、以及對長者嘅醫療保健服務嘅 priority。

05，如果我無睇錯，Walker 未來會繼續 advocate 同睡眠有關嘅 agenda；而當然，同睡眠有關嘅產品，亦都會有唔少商機（其實已經有，例如 Apple Watch 都有 sleep tracking）。

06，Why We Sleep 令我最有大啟發，就係 why we sleep 呢個問題。記得細個好鍾意睇一套叢書《十萬個為甚麼》；好嘅問題，一定係不斷咁問點解。「點解人會覺得眼瞓？」「所有動物都會覺得眼瞓，魚都會，雀仔都會；候鳥遷徙，連續咁飛，都一樣會瞓，左腦右腦輪流咁瞓。」「點解一定要瞓？」「瞓有好多好處；從演進嘅角度，瞓，好處，大過代價。」

07，作者好隱晦咁提出一個都幾創新嘅想法：「點解唔諗吓，其實動植物嘅常態係瞓著；會行會走會搵食搵配偶，係出於生存嘅需要。但真正嘅生存，就係瞓著嘅時候？」呢個就係問「為甚麼」問到底得到最好嘅問題；係一啲唔係咁易有答案嘅問題。

08，簡單歸納一下，Why We Sleep 呢本書，我認為重要係明白以下呢幾個概念：（1）Biological clock（2）Sleep pressure（3）Biphasic sleep pattern（4）Sleep deprivation

09，除咗人，其實動植物一日廿四小時，都有一定嘅規律、周期。而人嘅生理時鐘，亦即係 circadian rhythm，原來比廿四小時長少少（大概廿六至廿八小時）。換句話說，其實我哋會因應環境去調整自己嘅生理時鐘，尤其係日照、溫度等。簡單講，天黑、氣溫下降等，都係叫我哋要瞓覺嘅訊號。人瞓覺嘅時候，體溫亦會比平時低少少。

10，又，有啲人比較傾向早睡早起，又有啲人比較傾向鍾意夜啲先瞓，晏啲起身；作者話呢個傾向係遺傳，但係朝九晚五呢個設定呢，就對 Night Owls 好唔著數；影響佢哋嘅工作之餘，亦都令佢哋嘅健康受損。Walker 都講得好白：「社會係時候意識到唔同嘅人有唔同嘅需要。」此外，有人早睡早起，有人日上三竿先起身，可能都係進化嘅需要同結果；咁樣一族人裡面，先至日頭夜晚都有看更。

11，另外一個關於 circadian rhythm 嘅小知識，就係 melatonin。有好多人瞓得唔好，就會去買 melatonin 去食。作者就認為，坊間呢啲 melatonin supplement 嘅質素好參差，好無保證，但更重要係 melatonin 嘅功能只係令身體意識到差唔多時間要瞓，但對於令人入睡嘅功用不大。所以佢認為唯一有用嘅時候，就係搭完長途機有 jet lag，要校返啱個時區，就可以試下食啲 melatonin。

12，另一個好重要嘅概念，就係 Sleep pressure ，亦即係「點解覺得眼瞓」。知道點樣令自己覺得眼瞓，其實就等於令自己更易入睡。我哋清醒嘅時間，身體都會不斷咁製造 adenosine，當 adenosine 水平高過某一定水平，我哋就會覺得眼瞓，好難抗拒。但係，咖啡因又可以暫時抑制 adenosine 嘅影響，所以當你真係想頂多一陣，咖啡都真係可以幫得一時。但係當咖啡因被肝酵素分解，作用消散，你會覺得更加攰，腦海更一片空白，亦即係所謂嘅 coffee crash。Walker 甚至引用 1980年代 NASA 一個對咖啡、LSD、大麻嘅比較研究（不過對象係蜘蛛），指咖啡作為興奮劑，影響唔低過以上嘅幾種化學物質。嗱，人唔係蜘蛛，同埋 NASA 呢個研究真係有好多問題。我亦都係睇到呢本書嘅呢度，開始感覺到作者嘅 agenda setting（page 30）。

13，咖啡以外，另一個影響睡眠質素嘅飲品就係酒。研究顯示，酒會影響 REM（rapid eye movement）Sleep，即係瞓著之後會發夢嘅階段。好多人瞓唔著會飲兩杯，但瞓醒之後，都好似略有所失，原因就係缺乏 REM Sleep 嘅階段。

14，REM 嘅相對就係 NREM （non-rapid eye movement）。兩個睡眠嘅狀態、階段，各有佢嘅功能。講真，其實暫時 neuroscience 雖然對睡眠知多咗，但仍然有好多嘢係唔知。例如 REM 嘅時候，我哋嘅腦會 shutdown 對身體絕大多數肌肉嘅控制，就唯獨係對眼可以郁。Walker 話從演進角度，如果發夢嘅時候又會郁手郁腳，咁好危險。所以，夢遊（somnambulism）嘅人，你叫醒佢嘅話，佢會唔知乜嘢事（唔係發緊夢）。

15，作者都用咗唔少篇幅去解釋，人生唔同階段嘅睡眼需要；例如成長中嘅小朋友，瞓覺嘅時候，尤其 REM，係腦部發展嘅關鍵（講到呢度，我諗好多家長即刻會叫啲仔女去發夢）。青少年人都仲發展緊，所以都要瞓得夠；而且佢哋嘅時鐘傾向夜啲瞓，又晏啲起身，返上晝班真係違反天性。其實美國都開始有啲校區研究緊，中學、高中係唔係要推遲個時間表。

16，講成年人嘅部分，最主要都係針對唔夠瞓對健康嘅各種影響，除咗對腦神經，反應、工作效率、創作力⋯⋯仲有可能導致癌、抑鬱、失智、高血壓⋯⋯作者認為，如果有啲人係因為社會經濟因素而唔夠瞓，呢個就一定要變。如果有啲人係因為自己唔識得去做好個人生活習慣、衛生而令自己睡眠質素差，咁就要教育。剩低嘅因為其他生理、心理原因而睡眠不足嘅人，就要及時治療。正如之前所講，長者都一樣要夠瞓，唔係話年紀大就唔駛瞓咁多。

17，呢本書嘅 Part III，講夢。人有時會記得發夢嘅內容，有時會知道自己發緊夢，亦即係所謂嘅 lucid dream；但夢，本身係一個有少少 mystic 嘅題目，所以講呢個題目嘅科學家，都會好小心，免得畀人話裝神弄鬼。但 Walker 都好大膽咁話：it is possible that lucid dreamers represent the next iteration in Homo sapiens’ evolution。

18，【延伸閱讀】呢本書令我對 lucid dream 好感興趣，走咗去睇 Stephen LaBerge 嘅 Exploring the World of Lucid Dream。其實呢個題目好科學，但又好 new age。畢竟，Freud 同 Jung 嘅 psychoanalysis ，好長嘅一段時間被視為偽科學，被 neuroscience 睇唔起。直到近年先開始有人嘗試將兩路學問匯流。話說回頭，廿世紀初，好多技術都未存在，Freud、Jung 無 MRI、CT ，又點睇人個腦係點運作呢又？衡量唔同時代嘅學說，只可以用當時嘅條件限制去做標準。科學嘅精神，理論被事實否定，係進步。唔能夠被否定嘅偽科學，你唯有視為另一個維度嘅 inspiration，只有信，與唔信。

19，發夢，留返大家自己去探索。呢本書最實際嘅問題係：「點先可以瞓得著，瞓得好？」日日都差唔多時間上床，唔好飲酒，唔好飲咖啡，臨瞓前唔好做運動，唔好食太飽，唔好玩電話、iPad，間房燈光較暗少少，唔好擺會發光嘅電子鬧鐘等。

20，另外，臨瞓前沖個暖水浴，將房間溫度降低一、兩度（開冷氣好瞓啲）。比較唔係咁常講嘅係：「如果真係失眠，就唔好磨爛蓆；去搵啲嘢做吓，輕鬆吓。」

21，Walker 亦提出，現代人嘅 monophasic sleep pattern，即係一晚瞓晒成日嘅需要，其實未必係最好嘅。佢話自然嘅環境下，人傾向 biphasic sleep pattern，即係會午睡片刻。佢甚至主張社會有呢個改革，等大家晏晝都眠一眠；但下晝三點後就唔好瞓㗎，如果唔係入夜又唔夠 sleep pressure。

最後　祝大家有覺好瞓　發個好夢

「昔者莊周夢為胡蝶，栩栩然胡蝶也，自喻適志與！不知周也。俄然覺，則蘧蘧然周也。不知周之夢為胡蝶與，胡蝶之夢為周與？周與胡蝶，則必有分矣。此之謂物化。」   《莊子．內篇．齊物論》