【暑期作業】由人腦到電腦 (Patreon)

01，放緊暑，聽住窗外十七年一遇嘅蟬爆（Brood X），唔想周圍去，又寫幾行字喇。

02，呢排睇咗一本叫《草與禾》嘅書，主軸係講中華文明4000年嘅融合；作者波音，蒙古人。《草與禾》比之前我介紹過嘅《文明的遊牧史觀》，溫和啲；但都好，睇多幾個唔同嘅觀點，無壞。但我發現過去一年睇太多關於遊民嘅歷史，好多資訊開始重複，係時候轉下題材。

03，最初對遊民文明同歷史感到興趣，係因為 James Scott 寫嘅 Against the Grain 。其實我睇書有個（壞）習慣，就係一個題目，又或者一個作者，會令我跳入個 rabbit hole，所以要摧毀我嘅人生，消耗我啲精力，最簡單直接嘅方法莫過於介紹一個有趣嘅題材、作者畀我。

04，【延伸閱讀】現代桃花源記 （呢篇文介紹 James Scott 另外兩本書，Seeing Like a State 同埋 The Art of NOT being Governed）

05，早兩日，其中一個會員 message 我，問其他會員鍾唔鍾意 LT；DR 系列。其實我唔知，但我自己就好 enjoy。然後我問佢，你有咩書上榜吖。佢話：「GEB。」

06，其實我同呢位仁兄，都識咗好多年；亦都係好多年前講過 GEB，但係大家都係無個份能耐去將呢本書 KO；結果大家走咗去讀 Douglas Hofstadter 所寫嘅簡化版 I am a strange loop。

07，Challenge Accepted，但真係要的時間；GEB，都可以算係奇書。但我哋又講開，近來另一個我搵書睇嘅課題，就係 Consciousness。

08，話說，有個編輯 John Brockman ，自從 2005 年佢每年出一個題，搵全世界最頂尖嘅思想家寫一篇短文。直到兩年前，佢終於投降，話諗唔到有乜幾好問，最後一年嘅題係 What is the last question？ 然後佢就結束呢個廿年嘅 tradition（我估呢度應該唔少朋友都有睇過呢個系列？）我記得有好多人都係講有關 Consciousness 。

09，早個月，Guardian 有篇 Longread 講 free will ，亦都引起唔少朋友嘅討論。

10，【延伸閱讀】 由 The Better Angels 到 性本空

11，點解咁多人講 Consciousness 呢個問題？我嘅 hypothesis 就係因為好多人都思考緊 Singularity 嘅問題。「好多人？」係，it is an overstatement ；多過以前咁喇。

12，何謂 Singularity？粗粗地咁解，當科技可以自己去令自己進步，就係 Singularity 囉？即係點？即係電腦識 program 自己？可以咁理解嘅，但其實又唔係。Singularity 嘅真正意義，在於人唔想係已知嘅宇宙裡面，唯一有智慧嘅「嘢」，甚至無生命嘅機器，都可以有智慧，究竟個世界會點？

13，或者，退一步咁諗，乜嘢係智慧呢？有另一本奇書，叫做 The Society of Mind，我諗都算係其中一本比較早提出，所謂嘅「智能」，其實可以由一啲無生命，好簡單嘅 module，好似砌積木咁，堆建而成。慧，就太過禪喇；能，functional ，易嘅去理解。

14，換句話說，當一個結構複雜到某程度，就會 emerging 出「智能」「智慧」呢個嘅現象；生物，唔係生物，亦應作如是觀。

15，我估大家應該唔記得，其實《執書》清單上，有 Kevin Kelly 嘅 What Technology Wants；之前我就咁介紹嘅：

//【中央欽點 #16 ｜Kevin Kelly, What Technology Wants 】Kevin Kelly 我嘅形容係「奇男子」「先知」；先知，其實都係早過你知，但佢就早過我哋知一啲好重要嘅嘢。例如早在 2008 年佢就提出，話有 1000 個真正 fans 就可以做一個專業嘅 creator；呢個講法，比起依家大行其道嘅 passion economy，早咗十年。但我認為 Kevin Kelly 嘅真正代表作，係呢本 What Technology Wants。Kevin Kelly 對科技嘅發展，好樂觀；就算終有一日，機器嘅智能，將會做到甚至超越人類，但咁又點？汽車快過人類，咁你係咪打跛雙腳吖？工具嘅存在，被動咁睇係解決問題，但主動咁睇係去增加我哋嘅可能性。Kevin Kelly 用嘅例子係：如果莫扎特出生早一百年，當時冇鋼琴，咁佢仲係唔係咁偉大？雖然呢本書係十年前嘅作品，但先知嘅預言，就梗係要攤一陣先至可以公道咁評論，係咪？//

16，其實書名都 imply 咗，作者認為 technology，好似有存在目的，有 want；亦即係話，唔一定係 sentient beings ，都可以表現出好似有所求。

17，另外，Garry Kasparov 嘅 Deep Thinking: Where Machine Intelligence Ends and Human Creativity Begins，都係一本探討人腦對機器嘅作品。佢寧願做史上第一個被電腦擊敗嘅人類世界冠軍，都唔想莫視呢個 inevitable。當然，佢亦都係樂觀嘅，但樂觀啲乜嘢呢？

18，我同大家申請放假嘅時候，話想開始寫書，題目係 The 8th Cognitive Revolution 。簡單講吓個思路。最初構思嘅時候，係因為寫咗篇講 digital artifacts，令我諗起資訊嘅本質，其實不在載體。但究竟 information 係乜？

19，冬天嘅時候，讀咗 James Gleick 寫嘅 The Information: A History, A Theory, A Flood ；我無推介呢本書嘅原因，係我覺得呢本書主要嘅述事都係圍繞近代；由 Charles Babbage 到 Shannon 到之後嘅發展，亦唔多講概念。

20，有人話 information 係主觀嘅；萬物本無任何秩序可言，係我哋主觀嘅感覺，賦予世間各種事情意思。呢個咁 metaphysically nihilist 嘅睇法，可能要少少時間消化，但諗深一層，又唔係無道理。

21。又有啲講法，係從進化過程去推理出人類觀感嘅起源、功能。

22，綜合以上，就令我諗到，不如由人類意識出現嘅最初，一直寫到連機器都有一種近乎意識嘅現象。係，我嘅草稿係咁講嘅：「歷史，不斷改寫；唔單止因為我哋發現新嘅證據，更重要嘅係我哋用唔同時代嘅觀點，去解釋過去嘅世界。所以，歷史一定要有個主軸。歷史嘅分野，亦唔係一定用朝代，地域。呢本書，係用人類意識嘅幾次大躍進，去睇科技、文化、經濟，點樣互為因果，構建成我哋今日所認知嘅世界。」

23，八次革命，分別又係乜？第一個革命，係由無語言到有語言。第二個革命，係出現文字，語言唔再係完全依付人嘅肉體。第三個革命，係印刷術；嚴格來講，呢個文明嘅係 2.5 G，唔係三。第四個革命，係出現電報，文字可以無形咁傳到世界每個角落。第五個革命，係影像、聲音可以就咁直接由無生命嘅載體傳遞。第六個革命，係出現可以處理資訊嘅機器。第七個革命，係呢啲機器透過網絡連接埋。第八個革命，係呢啲機器，有類似意識嘅表現。

24，呢本書嘅另一個更主要目的，除咗好哲學咁探討何謂 information，更重要係「人是如何學習」、「機器又如何學習」。

25，自從出現咗電腦，我哋對人類意識嘅 metaphor 都有好大嘅改變，但其實電腦嘅設計，會唔會係有意無意間 model 咗我哋嘅意識過程呢？例如電腦有 ram 同 storage，人就有 long term 同 short term memory ；其實好似。有啲人嘅 short term memory 弱，我哋就話佢哋 executive functioning 有問題；我嘅形容係：「佢唔夠 ram。」

26，所以，呢本書嘅另一個目的，係每個人，就算你唔係 programmer，唔駛諗點樣去用 AI、machine learning 等，都可以從中得到一啲方法，去令自己更聰明。記住，假如大前提係，智，係可以堆砌，咁即係呢個因素唔全係先天。

27，最後，都要係返到去哲學嘅討論。我思考呢本書嘅時候，問自己：「智，同真、善、美，有乜嘢關係呢？」唔可以話完全無，但又真係唔完全係。即係話，Singularity 唔等於人類搵到真理、至善、至美。假如你係樂觀嘅人，呢個係好消息；係悲觀嘅，呢個就係壞消息。

【待續．未完】

【晒冷！】GEB 以外，呢個假期最少仲有呢堆。