【道德經】民不畏死 (Patreon)

01，本來寫咗另外一啲嘢，但之前晚上發生嘅事，實在令人難以釋懷。無人真正知道整件事嘅來龍去脈，亦相信永遠都搵唔到真相；但《道德經》有幾句說話，一直響我腦海揮之不去。

02，「民不畏威，則大威至。無狎其所居，無厭其所生。夫唯不厭，是以不厭。是以聖人自知不自見；自愛不自貴。故去彼取此。」《道德經．第七十二章》

03，「勇於敢則殺，勇於不敢則活。此兩者，或利或害。天之所惡，孰知其故？是以聖人猶難之。天之道，不爭而善勝，不言而善應，不召而自來，繟然而善謀。天網恢恢，疏而不失。」《道德經．第七十三章》

04，「民不畏死，奈何以死懼之？若使民常畏死，而為奇者，吾得執而殺之，孰敢？常有司殺者殺，夫代司殺者殺，是謂代大匠斲。夫代大匠斲者，希有不傷其手矣。」《道德經．第七十四章》

05，「民之饑，以其上食稅之多，是以饑。民之難治，以其上之有爲，是以難治。民之輕死，以其求生之厚，是以輕死。夫唯無以生爲者，是賢於貴生。」《道德經．第七十五章》

06，以上呢幾段文言，究竟點翻譯好呢？等我又試下用今日嘅語言解一次：

07，《道德經．第七十二章》：一個國度，點先為之最威？當人人都不畏強權（民不畏威），咁就威到喇（則大威至）。所以呢，唔好破壞地方社區（無狎其所居），亦唔好睇唔起撐起生計嘅被統治者（無厭其所生）。只有你唔去欺壓百姓（夫唯不厭），佢哋先至唔會厭棄你（是以不厭）。聖人有自知之明，所以唔會眼中只見到自己（是以聖人自知不自見），識得自愛，但又唔會將自己睇到與別不同（自愛不自貴）。咁樣做，人民先會睇你頭，唔跟其他大佬（故去彼取此）。

08，《道德經．第七十三章》：有膽搏，咁死得快啲囉（勇於敢則殺）。有膽去唔搏，咪玩耐啲囉（勇於不敢則活）。咁搏定唔搏，都係睇利害計算（此兩者，或利或害**）**；但天意嘅嘢，又有邊個講得埋原因係乜嘢（天之所惡，孰知其故）？就算聖人都唔係好識點處理（是以聖人猶難之）。大自然嘅法則（天之道），唔需要同人鬥都會贏（不爭而善勝），唔需要講咁多道理都會見到結果（不言而善應），唔需要特登去搵都會送上門（不召而自來），每件好似嘅關係好似鬆散，但又有好似有智慧咁（繟然而善謀）。大自然法則嘅脈絡似有還無咁，但就係唔會有例外（天網恢恢，疏而不失）。

09，《道德經．第七十四章》：被統治嘅百姓，本性其實唔係咁怕死（民不畏死），你用死去恐嚇佢哋，又有乜嘢用呢（奈何以死懼之）？你如果有方法令被統治嘅人，成日都好驚死（若使民常畏死）；當有人做啲唔見得光嘅事（而為奇者），捉幾個去就地正法示眾（吾得執而殺之），咁你睇下有冇人夠膽（孰敢）。但又之不過咁講，世間本來就有一套常規，無死錯人（常有司殺者殺），自以為替天行道嘅人（夫代司殺者殺），就好似一個唔識斬樹嘅人，攞住把大斧頭（是謂代大匠斲）； 呢啲攞住把大斧頭嘅人（夫代大匠斲者），結果大多數都整傷自己（希有不傷其手矣）。

10，《道德經．第七十五章》：百姓點解窮困饑餓？畀上面食晒囉（民之饑，以其上食稅之多，是以饑）。百姓點解咁難管治？係你上面班人多多主意，無是生非之嘛（民之難治，以其上之有爲，是以難治）。百姓點解唔怕死？係你上面班權貴貪生怕死，搞到百姓要搵命搏之嘛（民之輕死，以其求生之厚，是以輕死。夫唯無以生爲者，是賢於貴生。）。

11，《道德經》有人覺得好神奇，好似句句都好中；但其實諗深一層，真正嘅道理，唔應該難明。但簡單嘅自然觀念，人之常情，用文言文講，又即刻唔同晒。

12，最後同場加映《道德經》嘅終極理想社會：「小國寡民。使有什伯之器而不用，使民重死而不遠徙。雖有舟輿，無所乘之，雖有甲兵，無所陳之。使人復結繩而用之，甘其食，美其服，安其居，樂其俗。鄰國相望，雞犬之聲相聞，民至老死，不相往來。」《道德經．第八十章》