【平凡人的哲學】善護念 (Patreon)

01，上個月，本來想放空一個月，放個暑假。點知，未有真正享受休息，轉眼假期就完結。與此同時，一個月內，又發生許多令人神傷的事，彷如隔世。

02，假期快要結束時，有朋友將舊年的一段訪問再放上網：「嘩，乜你仲咁勇？」若然講出個人心中所想都為之勇，社會確係悲傷。又話說回頭，有一點我必須堅持：「愛，無得強求；但若係真愛，要阻止亦阻止不了。」有人愛X國，有人愛香港；大家可唔可以並存？係咪一定有你就無我？

03，一個地方，一個城市，一個國家，任何共同身份，背後都有一套由共同經歷所構成嘅價值、信念。三、四十年前問以上嘅問題，相信多數人都會反問：「點解唔可以同時係香港人又係中國人？」

04，事過境遷，尤其係經歷過去幾年，以上嘅問題，相信大家心目中都會有個答案。究竟係因為香港人嘅身份、信念同價值變咗？定係北京嘅態度變咗？定係，一直以來大家嘅認知都有嚴重嘅落差？

【延伸閱讀】如何由三權分立走到黨政軍三權合作

05，依家個狀況係，所謂嘅二次回歸，其實就係有啲人嘅眼中，你只要唔係完全服從，更加要日日咁愛國愛到出面，否則就係叛國，呢啲人根本唔會畀其他人有第三個選擇；我話呢種心變，唔正常又有乜嘢錯呢？

06，「你既然做得 X 國人，你就有責任去愛國，全心全意咁侍奉你嘅我 X 國。」做 X 國人，假如係出於個人選擇，咁應該係要尊重嘅。不過，好多人係被歸化，咁又點計呢？如果唔係出於選擇嘅結果，只係自然嘅隨機事件，關人撚事？

07，「你有得揀邊個做你老竇老母㗎？你就可以唔去孝順佢哋？你都幾忤逆囉！投胎有得揀㗎？唔好做人吖笨。」我知一定會有人咁回應，但諗深一層，呢種

08，愛，係雙向互動，係出於選擇。我哋孝順父母，因為由我哋來到呢個世界個一秒開始，佢哋選擇咗無條件咁愛我哋；實情當時佢哋唔知我大個之後，會唔會係一個忤逆仔。至於我哋做人，最重要係選擇自愛；呢個係對自己，亦對別人最基本嘅尊重。

09，選擇，乃道德之本；自由，係最尚高嘅政治價值，沒有之一。但任何愛，首先必須係出於自愛；目標係其他人都能夠自愛。選擇、自由、愛，其實都係同一件事，但從唔同角度去睇。有啲人以為犧牲係尚高嘅情操，其實真正嘅偉大，係唔需要其他人去犧牲。

【延伸閱讀】命中註定一定要愛嘅人 

10，所以，我堅持自己宣揚嘅係自由同愛。當然，有時我都會對世事感到悲傷、憤怒。但好 Stoic 咁去講，世事往往唔難夠盡如人意，我哋可以做嘅事，就係盡量唔好畀外界我哋不能控制嘅事，影響到我哋自己。甚至乎，我哋唔應該畀自己內心不能夠控制嘅情緒影響自己嘅理智。

11，如果我寫嘅嘢，唔覺意令人對其他人有恨意，我覺得都係一種作孽。最近發生嘅事，令我反省一個問題。行為同動機，兩者唔應該有矛盾。真正善良嘅行為，動機都應該係善良。我哋呢班自稱自由主義者嘅人，成日話政府好心做壤事；所以我哋自己都唔好咁做。

12，另外，冷靜不等於冷漠；calm 同 indifferent 係兩回事，雖然從外面睇係一樣。Acedia 呢個古字，唔單止解作冷漠，更加係怠惰，係道德過失。

13，人性基本原則係「有選擇好過冇選擇」，「有自由好過無自由」。「唔係喎！我有選擇困難症㗎，最好有人幫我揀埋。」經常聽人講呢句，但背後其實有幾個可能，一係就唔願意思考，一係就唔識得去思考，一係就唔想承擔因為選擇而來嘅責任。

14，亦有人話，「自由唔係絕對㗎。」呢句之後嘅背後，係一種命定論，就好似上面描述嘅 Nancies 咁。有呢種人生觀嘅人，好多時嘅口頭禪就係：「無辦法㗎喇。」「唔係咁點呀？」呢種就係冷漠，而呢種講法嘅背後，住往意味不懂自愛，所以亦唔識得去愛身邊嘅人、事物。呢種人會追求享受，但又唔識得真正享受生命。

15，將「世上無真正自由」呢個前設推到最盡，宇宙一切發生嘅現象都睇成因果宿命，個人，自由意志統統都係假象，亦都係哲學裡面嘅「虛無主義」（nihilism）；十九世紀俄國好流行嘅哲學思想。呢種思想有時可以令解脫，但最大嘅弊處係當人人都接受咗「係咁㗎喇」嘅時候，善惡嘅分界好易變得模糊，人不但容易做出受情緒主導嘅決定，社會整體對道德嘅約束亦都會受到削弱。

16，以上所講嘅冷漠，甚至虛無厭世，其實就係放棄自由，逃避責任。雖然都可以話，放棄同逃避都係一種選擇，但既然做出呢個選擇，就要承受失去自由嘅代價。千祈唔好以為承擔嘅責任好沉重，當人失去自由，先至會明白，膊頭上嘅重量，原來一直畀我哋充實嘅生存。

17，人唔單係愛自己，亦都會愛自己嘅家人，身邊嘅人，甚至大愛到天下眾生，但大前提係要自愛；知道點樣保持冷靜。有個講法話，因為我哋係血肉之軀，有七情六慾，所以先至要用理智，去將呢啲天性嘅力量，導向為善。自愛嘅前提，係自知。

18，人出於天然嘅力量，可以好大，但無分善惡。真正嘅善，來自於理智嘅思考。當諗唔到點樣為善嘅時候，首先就用排除嘅方法，do no evil。佛家有善護念嘅講法，亦應作如是觀。

19，善與惡，雖然話係主觀嘅對立；為何至善，甚至超越任何人一生一世嘅修為，而係整個人類文明，甚至宇宙不斷尋找嘅答案。最終亦好可能搵唔到答案。但搵唔到，唔代表唔存在，absence of  evidence is not the evidence of absence。

20，以上，亦都係早兩日講《道德經》最後幾個章節，一啲個人體會同補充。

【延伸閱讀】民不畏死

21，躁動嘅感覺，會蔓延；當人受情緒影響作出決定，往往會缺乏理智。所以，我唔係太過享受 social media 個種純粹追求大家一時間畀個 like，然後 share 扮睇咗嘅衝動。Email newsletter 呢個有少少距離嘅模式，剛剛好，寫嘅人有時空去思考，讀嘅人，亦如是。

最後，再次感謝各位嘅支持；好人一生平安。