【2021 07 06】是日新聞精選 ＋ 短評 (Patreon)

01，今日頭炮係白宮印太事務協調官 Kurt Campbell 響 Asia Society 嘅發言。重點係：Biden 呢任政府，亞太地區嘅首要任務，就係令中共領導人，尤其係習近平，明白美國並唔係佢哋想像中咁弱勢（hurtling decline）。

02，究竟點說服中南海班人呢？做好份內事囉。呢個觀點，同之前分享過 Rand Corporation 嘅報告 China's Quest for Global Dominance 嘅睇法好接近。

03，早兩日 Rand Corporation 又有另一份報告，討論中共點樣影響其他國家；過幾日我會寫 TL；DR。有興趣新睹為快嘅朋友，可以去呢度 download 原文 ：

Understanding Influence in the Strategic Competition with China 

04，美國朝野雖然都唔認為中共夠膽發動戰爭，但經濟同文化上嘅擴張，都唔可以視為絕對友好嘅行為，所以多方面都要同中共競爭。另外，台灣都講到明係熱點，但唔排除中印邊境，南中國海都可以有衝突。其實鄰近中國嘅國家，近年對中國嘅印象急速轉差，以印度同越南對中國最不友善。所以習近平先至話要中國要有「可信、可愛、可敬」嘅外交型象。

05，另外，Bloomberg 有篇分析 When Will China's Economy Beat the U.S. to Become No. 1? Why It May Never Happen 都值得參考； 作者之一嘅 Tom Orlik ，係 Bloomberg 嘅首席經濟師，佢舊年先出版咗本書 China: The Bubble that Never Pops 

06，「呢頭又話中國嘅經濟泡沫永遠唔爆，轉身又射個三分波，話中國 *可能* 永遠都追唔過美國做世界第一；喂，唔通又係你成日講嘅 Fitzgerald moment 呀？」

07，先講最新嘅分析，佢話有三個理由：（一）Demographics（二）Productivity（三）Institution。中國 demographics 嘅問題，我都唔雖要多講；咩三孩政策，有冇用，亦大家心照。畢竟，呢代人自己都講緊躺平，又點會諗多子多福呢？唔好忘記，當年日本嘅人均收入高，財富分配亦更平均，面對人口老化尚且有咁多社會問題；如果中國未來十年內走上日本之路，要處理嘅社會問題，又豈止人口老化咁簡單？

08，Productivity ：其實好原則咁去講，就係各種生產資源，包括人力、資本等嘅配置，係唔係有效率。大陸嘅資本，長期處於一種扭曲嘅分配，亦係所謂嘅不平衡，不平衡，其實意味浪費。當然，由十四億人去承擔呢種浪費，有時可能唔係好覺。但正如之前國務院總理李克強話齋，呢個國家仲有有六億人，平均每個月收入唔到一千人民幣。Just saying，如果 productivity 可以有所提升，對呢班人可以有幾大幫助。

09，Institution：承上。點解資本嘅配置失效失衡？制度問題。當然，北京就梗係話「中國模式」優勝過西方嘅自由民主資本主義。但實情係唔係咁理想呢？咁就要買作者嘅半新書喇。

10，當然，留意佢條題入面，唔係 why it will never happen，而係 why it may never happen。May 嗟。

11，今日最後一篇分享嘅評論係 Bloomberg BusinessWeek 講大企業興衰，雖然主題唔係講中國，但亦都唔可以唔講到中國：

World-Dominating Superstar Firms Get Bigger, Techier, and More Chinese 

12，重點一：世界頭五十大企業，總市值等於地球 GDP 嘅 28%；30年前，只有 5%。

13，其他人嘅讀者，可能就會：「嘩，嘩，嘩。」但呢度嘅朋友，相信都好清楚兩件事：（一）既然股票嘅購買力，唔等於真正嘅鈔票，所以市值不代表甚麼；套咗現先同我講喇。（二）用公司市值去同 GDP 比較，甚至唔係用橙同蘋果比較，而係用橙同蚱蜢比較，真係唔知比喲乜。

14，儘其量都只可以話，三十年來地球嘅經濟，越來越多資本市場活動；我諗呢一點都唔需要多補充。你淨係睇香港，三十年前做咩金融好威好叻仔，三十年後就一街都係金融才俊喇。更重要係，過去呢幾十年嘅資本泛濫己經成為常態，股票市場就成為其中一個吸納資本嘅地方，呢個亦係金融行業增長得咁快嘅原因之一。

15，呢篇報道嘅中段，當講企業 profit margin 不斷提升，但稅率又不斷下降。結論都好明顯，就係要加稅先至公平，而且係全球咁加。最近邊個講過呢個論點？財長耶倫囉。

16，篇報最後三點就係：（一）新嘅巨企主要係科技公司；（二）多咗大陸公司；（三）呢啲公司唔需要借錢。

17，要補充嘅係，企業唔止唔需要借錢，直頭係多錢到要周圍搵嘢買；無嘢買，就買返自己嘅股票。當然，上市公司用股票買嘅，通常都係股票；公仔紙換公仔紙，好合理吖。用錢買自己股票，回饋股東，直頭係良心發現，好人一生平安。

17，最後，大家對今日呢個新嘗試，有冇乜嘢意見？有冇啲乜嘢地方我可以改進吓呢？