【2021 07 07】是日新聞精選 ＋ 短評 (Patreon)

01，本來都唔想再講咁多滴滴出事，但都係覺得成件事唔係咩國家資料外洩嘅問題。點解會有人信呢個理由㗎？真係好似我公海 email newsletter 所講，世事越荒謬，就越要有獨立思考。

02，China Targets Firms Listed Overseas After Launching Didi Probe - WSJ 呢篇算係我見到比較詳盡嘅報道；簡單講重點，就係滴滴管理層上市前好一段日子已經收到通知，叫佢哋唔好上市住。好，邊個放嘅風呢？一定唔係滴滴嘅管理層喇，如果係，咪自己捉蟲？

03，我淨係諗到，如果有人證據確鑿管理層知情但又唔如實咁公開，會唔會有可能連美國監管當局都會介入。呵，滴滴到時真係兩面不是人。

04，當然，點睇都唔會係北京向 WSJ 放風；雖然十零年前，偶爾都會有呢種消息出口轉內銷嘅情況；尤其是周小川，就最經常咁做。

05，剩底，我諗到最有可能，就係見血腥動殺機。滴滴，就一滴血嗟；假如火燒連環船咁，將成抽美國上市嘅中概股股價做底，呢個 trade 又有冇得諗？

06，但就算以上成立，都解釋唔到，點解中央嘅監管機構，會到連呢啲從美國集資嘅「民族企業」都 throw under the bus。

07，螞蟻又好、滴滴又好、其他無咁知名響美國上市 cap 水嘅企業都好，得到嘅資金對中共及其利益相關人士，又有咩好處先？睇返最簡單嘅資料，滴滴嘅大股東，分別係 Softbank 同 Uber。外國資金中國搵食，邊忽係民族企業呢？

08，某程度上，我覺得以上呢啲企業，同香港，香港人嘅處境一樣。上咗市，咁點呀？大家都套現囉。依家唔套現，唔通等到唔值錢嘅時候先至賤賣咩。

09，所以，唔可以話北京唔理智；只不過係睇你點樣代入佢哋嘅角色。北京要科技興國，但又唔要啲奇技淫巧，尤其係擺明打個 top line 然後上市 cap 水個隻。

10，北京眼中嘅戰略意義，好似華為，華大，商湯。咁。Bytedance 可能都有，大外宣嘛。

11，今日精選另一條新聞係 Reuters 嘅 China’s gene giant harvests data from millions of women 。

12，不如先講最大嘅 put off 喇：

Reuters found no evidence BGI violated patient privacy agreements or regulations. However, the privacy policy on the NIFTY test’s website says data collected can be shared when it is “directly relevant to national security or national defense security” in China.

13，840萬個孕婦做過呢個驗測，好多數據，咁又點？如果話華大基因用軍方嘅電腦分析呢啲大數據，最終係用來研究治療疾病嘅方法，有乜嘢唔好？其實自從今次瘟疫，都幾肯定醫藥生物科技，其中一個大方向就係大量應用基因資料，大數據同好大規模嘅運算，去加快研發治療嘅方法，有乜唔妥先？

14，呢篇報道，有好幾個地方提到華大收集新疆回族嘅基因資料；其實講到尾，作者無講出口，但大家心底最驚，係啲研究結果用來做優生學，designer babies，又或者針對某啲種族嘅政策。

15，講開又講，今日另一單新聞 Dozens of Chinese phone games now require facial scans to play at night 講大陸嘅手遊將會用人面辨識，去保護的細路，確保佢哋唔會打機打通宵。其實呢啲 parental lock，screen time 等，唔係一早就有咩？使唔使用到人面辨識咁高段數呀大哥。

16，啲人成日聽話 data is the new oil；但今時今日地球上真係有能力處理咁多數據，仲要真係有實際用途，又有幾多間公司？從呢個角度睇，又真係解釋到點解幾間科技巨企「形勢比人強」。

17，請容許我好 contrarian 咁淋一盤冷水；預測未來，係唔係有 data 就得呢？從 complex system 嘅角度睇，LaPlace's Demon 只可能理論上存在。現實世界兩大難題，一係你永遠都唔可能掌握所有嘅資訊，二係如果係有無限咁多資訊，你就無一部咁勁嘅電腦去處理咁多嘅資訊。

18，所以，一個好哲學嘅原則，所有關於因果嘅 hypothesis，都一定係錯嘅，問題係有啲 hypothesis 比其他嘅更有用。所謂嘅 big data 同 machine learning，無錯係可以 by leaps and bounds 咁提高市場效率，但絕對唔係市場演進嘅全部。

19，正如之前所講，市場嘅演進，唔單止係多快好省；唔單止係絕對嘅質量嘅增加，唔單止係絕對速度嘅增加，而係市場結構變得更複雜，分佈更 non-homogenized 。偏偏北京認為係奇技淫巧嘅科網企業，好可能就係令市場結構出現質變嘅催化劑。

20，今日嘅科技興國，正如一百幾十年前嘅洋務運動一樣；只係見到表象。當年見人哋船堅炮利，就諗住開多啲工廠。見人地起鐵路，又要起鐵路。見人哋發債券，自己又發債券。結果工廠做出來嘅船炮，證明唔打得，最終都係要同人買。發債券集資起鐵路，結果因為債券違約，引發四川保路運動，亦成為大清帝國最後一口棺材釘。

21，歷史，最大教訓就係啲人從來都唔會汲取教訓。一百年前話中國積弱，因為無建立出科學同民主精神，我會加多一點，就係資本主義市場秩序嘅發展，一直受到嚴重扭曲。其實科學精神，民主自由社會，資本主義市場，本來就係同一件事嘅三個面向。呢個亦都係成個廿世紀歷史嘅結論。

【延伸閱讀】偽科學與假平等 

今日講住咁多先。大家食住晏睇喇。

最後，如果你見到值得討論嘅新聞，可以 share 畀我 （patreon@leesimon.me）；等我又試吓可唔可以寫幾段延伸閱讀。