【比較政治學101】經濟模式決定政治模式 (Patreon)

01，「我哋中國，以農立國。」呢句說話就無錯嘅，但好易畀人有個錯覺，以為只有中國係以農立國。其實所有文明，都係以農立國。唔係以農立國嘅，都有，例如斯基泰、匈奴、鮮卑、蒙古、突厥、女真等，大把。

02，之前都有寫過，「以農立國」嘅文明，幾乎無例外咁將呢啲主要靠遊牧同貿易為主嘅人，貶低成野蠻人。

03，亦有遊牧民族最終落地生根，成為新嘅文明。大唐李氏皇室，本來係鮮卑血統；就算執政之後，都仍然崇尚胡風，所以唐三彩嘅工藝品，好多都係馬、彈琴嘅女人等。一直到唐代中葉，封建農家儒家嘅價值觀先至「文藝復興」，亦即係所謂嘅古文運動。代表人物係「文起八代之衰」嘅韓愈。

【延伸閱讀】盛唐帝國以外被遺忘的人和事

04，做乜又再炒冷飯？食得唔好嘥嘛，反正多咗啲新嘅會員。不過，今日想講嘅題目係：「點解英國有君主立憲、法國又可以行共和政制、但俄國革命之後就搞出一個蘇維埃？」

05，馬克斯理論嘅核心，就係社會有 Base Structure （同生產有關嘅經濟因素）以及 Super Structure （同生產無直接關係嘅社會政治因素），兩套因素係互相對應，影響。

Illustration Credit: https://commons.wikimedia.org/wiki/File:Base-superstructure_Dialectic.png 

06，最簡單咁講，以農立國嘅封建制度，如果只係睇好概括嘅權力結構，就到處都係差唔多。非農業嘅社會，又有另一套嘅社會文化政治關係。當然，每個地方，不同年代，都有其他因素，衍生出好  grainular 嘅分別。

07，主流嘅歷史觀裡面，蒙古帝國係導致歐亞大陸由古代走向現代嘅關鍵。點解？蒙古帝國全方位咁挑戰當時歐亞大陸上面，所有嘅封建權力架構，包括歐洲嘅羅馬天主教廷，華夏嘅儒家文化，但與此同時蒙古帝國又建立出一個橫跨歐亞嘅商業、貿易同國際秩序。

08，咁又關英、法、俄嘅現代化過程咩事呢？因為，講以下嘅問題之前，應該首先為現代同古代落個定義。

09，用馬克斯嘅睇法，古代嘅社會，主要嘅經濟生產元素，係人同土地；土地係泛指一切天然資源。產物就不外乎農作物同手作物。

10，工業嘅出現，重點係 Adam Smith 所講嘅分工；分工嘅前提，係交易。歡迎大家來到資本主義。

11，英國係最早出現工業革命嘅地方；十八世紀嘅工業革命，就好似第一代嘅互聯網革命咁，地理上其實好集中。當年嘅英國點解係世界最強國，唔駛多解釋喇。但有一點要補充嘅係，十七、八世紀嘅貿易網絡，係工業革命出現 necessary but not sufficient 嘅前提。

12，當時歐洲大陸亦有少數地方，例如 Dutch Republic、Hanseatic League，又或者 Republic of Genoa 等，好早已經唔再係完全依賴農業，亦係呢個原因，呢啲地方由十五世紀開始有城邦自治、聯盟同共和等政治改革。

13，反而當時嘅君主大國，House of 乜乜、House of 物物，即係今日我哋好通俗咁叫法國、德國、西班牙、意大利等，當時相對依賴農業。俄國就更加係去到十七世紀先至開始 House of Romanov 嘅傳統。

14，對呢個題目有興趣嘅，我搵日寫 Barrington Moore Jr 嘅經典 The Social Origins of Dictatorship and Democracy 喇；呢本書可以話係比較歷史開宗立派之作。

15，Barrington Moore Jr 嘅理論一言以蔽之：No bourgeois, no democracy.

16，英國嘅小資階級出現得早，由手作業到貿易到後來嘅工業，呢啲不受土地限制嘅自由經濟階層，一直都係政治上同以土地經濟利益嘅貴族抗衡。好多政策，例如貿易，小資階級支持開放市場，做大個餅，因為佢哋嘅 model 相對上係 scalable。相反，土地經濟嘅一班人，就相對上支持保護主義。

17，法國呢，就算去到法國大革命嘅一刻，其實都未係好多工業同貿易。Tocqueville 寫嘅 The Old Regime and the Revolution （1856年出版）都講，根本法國大革命唔係一場民主推翻暴政嘅政治運動，而係一班同樣咁信集權主義嘅人，推翻 House of Bourbon 嘅統治。事實上，法國大革命十五年後，拿破崙就稱帝。

18，俄國呢，arguably 真係去到冷戰後期先至有 bourgeois class 囉，但此一時也彼一時，可以解釋得到由古代演進到現代嘅 hypothesis，又唔一定解釋得到現代嘅專政點樣變化。呢個亦係點解 Francis Fukuyama 嘅 The End of History 理論咁多爭議。

19，講到呢度，大家好自然會問：「咁，中國呢？」

20，好，賣個關子先。家陣我想執埋個是日新聞精選，畀大家食晏時睇。The Social Origins of Dictatorship and Democracy 嘅 TL；DR（睇吓 weekend 寫唔寫得起），其實討論晒英、法、德、意、日、美、俄、中嘅現代化過程；好ambitious，但又好抵睇嘅一本經典之作。