【2021 07 08】是日新聞精選 ＋ 短評 (Patreon)

01，真係說時遲那時快，尋日先至話，如果滴滴管理層係一早收到通知叫佢哋唔好上市，咁美國嘅監管當局好難唔查【回帶】。民主共和兩黨都有人話一定要查：

The SEC should investigate the Didi IPO fiasco, Senator Van Hollen says | CNN 

Republican senator Marco Rubio lambasts ‘reckless and irresponsible’ Didi listing | FT 

02，如果大家睇漏眼，尋晚有一篇 Reuters 嘅報道，官方報料，講中央要打擊透過 VIE 規避監管嘅制度短版 【報道原文】【我嘅速評】。

03，好，一百萬嘅問題：「目前嘅現象，究竟係一時三刻嘅短暫情況，定係新常態呢？」如果係一時三刻嘅情況，咁，大家應該當無事，繼續跳舞。但如果係新常態嘅話，咁就大件事。

04，「唔通大陸唔要外國資金咩？」但你睇真正國家戰略級嘅科技企業，namely 華為、華大，一間無上市，另一間就深圳上；似乎真係唔志在喎。正如尋日講，唔係話搵個姓氏以 X、Y、Z 字頭嘅人去做，就等於可以攞正牌賺中國人嘅血汗錢。奇技淫巧嘅嘢，資金又紅彬又軟銀，點解要益你？

05，所以，就當呢個係新常態喇。咁，下一個問題，就係會唔會對香港有利呢？「唔去美國上，香港集資一樣得！嘩，港交所仲唔爆廠呢鋪？」當然，有國安法嘛，防火牆內一家，親。其實香港股市，一早就係大陸民企國企嘅 ATM，問題係外國資金會唔會落搭。如果係北水買返北貨，咁不如好似當年華大咁，返深圳上算喇。

06，「香港嘅市場制度，始終係唔一樣嘅。」即係咁，上世紀六十年代，香港都仲係做廠嘅年代，大家對呢個城市嘅記憶係咩？七十年代，開始有啲制度上嘅改革同進步，咁啱呢個城市又由製造業進化成金融服務業。兩者有冇關係呢？我梗係話有。

未來呢一個月，我會開個「比較政治 101 系列」，尋晚寫咗呢個 season 嘅第一個 episode，將會陸續有來。

07，轉變，往往唔會忽然間出現。當你以為過去兩年翻天覆地，但靜心去諗，其實一早就有端倪。話說海關關長、入境署署長，保安局副局長等，同恆大高層私聚；嗱，官都係人，都有朋友。但咁啱你又識埋全部都係紀律部隊同保安局嘅高層，咁啱嘅。唔知傾咩呢？大家又記唔記得，十年前，時任廉政專員嘅湯顯明，又用茅台招呼中聯辦同國內高官，又用幾百萬請大陸學者研究建立廉潔香港，最終湯生任滿就做人大。

08，香港嘅文化一早就變，只係大家見唔見到，同埋有幾咁埋身。又用尋日大圍站上蓋柏傲莊做例子，其實早在 2018 年就發覺地盤沉降，當時港鐵同發展商都不斷強調：「無事，無事。」技術嘅分析，我就唔班門弄斧，潘焯鴻嘅分析，大家參考吓囉。

09，但有一點我就可以評論嘅：「炒咗一百人，就當無事？」呢一點又真係可以畀十個趣。先唔講呢一百友係點解要問責，更重要嘅問題係，如果當中涉及有刻意隱瞞，就好似滴滴（以及一眾去美國上市嘅大陸企業一樣），已經唔係一般嘅失誤囉。道理好易明，道德嘅標準，亦好易滑波。

10，有朋友慨嘆，香港越來越似大陸，好多中層專業的，諗住賺一票大錢，然後就去外國過埋下半世。從前佢哋唔會咁做，因為一來想長做長有，二來曾幾何時嘅香港，講真話係唔會犯罪。依家你唔知自己會得罪邊個，而且要講都唔知去邊度講。好似柏傲莊事件，如果唔係 胡．說樓市 最先獨家披露，可能大家都唔會知。

11，轉個話題，講吓通脹、債息以及Tapering。但首先我想分享嘅通脹新聞，唔係關於銀紙，而係沙紙。

‘Financially Hobbled for Life’: The Elite Master’s Degrees That Don’t Pay Off | WSJ 

12，「文憑量化寬鬆」呢個詞語，係我十幾年前開始講，I take credit for it 。WSJ 呢篇文講嘅學位，唔係啲乜嘢三流文憑工廠，而係 Columbia 喎，Ivy League 喎。話說有學生欠落 30萬美金，但畢業嘅年薪就只有 3 萬。

13，我鍾意呢篇報道，因為夠坦白；作者之一，仲要係 Columbia 嘅 Adjunct Professor，死未。要記住，條數唔係話每年搵 3 萬，30 萬就十年回本，而係 3 萬年薪真係連一個 high school graduate 都不如。同埋理論上要計，都係計張沙紙嘅「增值能力」。依家似乎係負增長囉。

14，點解會咁呢？有人嫌自己張 first degree 唔夠照，畀多多錢買多張名牌，點知僱主一眼就睇穿晒喇。唔怕話畀大家知，我自己請人都有呢鋪習慣，越遲出來做嘢嘅人，越要小心。對唔住，你話我有偏見都係咁話。

15，咁同通脹又有乜關係？梗有。一來，大家知唔知美國學債幾厘？八厘。呢十幾年嘅 QEs 其中一個後遺症，就係金融機構好積極推學債，貪其回報率極高。另一邊廂，好多人因為科技嘅 displacement，搞到無咗份工，以為讀多張沙紙，可以保就業。如此這般，大學又適應市場，大量開呢啲 Data Science 呀、System Security 呀 、Public Health 呀嘅課程。

16，學 Charlie Munger 話齋，show me the incentive I will tell you the result。

17，量化寬鬆到文憑量化寬鬆，自然會令每張沙紙嘅回報率大跌。我好多年前都同後生身講，讀大學就好搵定一份工，返學係兼職。讀完個 first degree 應該有四年工作經驗，呢啲就贏在起跑線喇。如果讀完個 first degree 仲讀多個，咁你只可以當係一個消費而唔係投資；投資係有數得計，負回報，我唔識計。

18，「冇張沙紙，邊有人請呀？」當年我請咗個十七歲嘅妹妹做 programmer，當時佢都真係乜都唔識。家陣佢廿二、三？而且又畀人 headhunt 又盛；我點知？因為成日都要做 character reference，梗係知喇。我次次都同個 headhunt 講：「係我搞到佢無讀大學，okay 呀呵？」「其實做 programmer，都係睇口碑。」係，每個行頭都有聲譽呢回事，有能力嘅人，真係唔需要靠張沙紙。

19，我同啲富爸爸富媽媽講；「人人都行嘅路，就一定安心嘅，但你對自己嘅細路好無信心咩？」無信心，讀個乜嘢 degree 都嘥氣喇，不如買層樓收租得佢做啲自己鍾意嘅嘢，話唔定生活質素更加好呢？

20，擁有物業 Millennials ，真係人生勝利組。就連地多人少嘅紐西蘭都係咁，先至令人神傷。當然，其實紐西蘭嘅人口都好集中嘅，just saying。

21，資產價格以外，資源價格同消費價格，近來都明顯上升。墨西哥、巴西、俄羅斯都先後加息，加拿大都表示將會減少買資產。依家估美國年底都會開始 tapering；不過，呢啲估就無成本，聽吓就算。

22，Surprising levels of inflation are increasingly being driven by wages, not goods | The Economist  

呢篇報道有趣嘅係：「唔係啲嘢賣得貴，係人工貴。」亦都有好多報道話，Post-Covid 重啟經濟，其中一個大難題係請唔到人。但呢個似乎只係暫時嘅現象。畢竟，將工序 automate 乃大勢所趨，甚至有啲傳統以為電腦處理唔到嘅問題，似乎都漸漸有眉目。

23，以上張圖名曰 Beveridge Curve 。第一種解讀方法，就係個 data point 越近右下角，就對越有壓力要加人工，越係近左上角，就越多人寧願唔撈；downward rigidity of wage 嘛，as per Keynes。

24，另外一個民生相關嘅問題，就係油價，尤其係汽車用嘅燃油。相信大家都有留意到之前 OPEC+ 傾唔埋欄。實情係 OPEC 本身都係 Game Theory 嘅教科書例子，要傾得埋就首先要有一定嘅默契。OPEC 尚且唔係咁易有共識，OPEC + 又點會咁易呢？

25，不過，加息、Tapering，真係可以影響油價咩？從歷央數據去睇，關係並唔係咁明顯。

今日講住咁多先。大家如果對任何事有任何問題，歡近 inbox@leesimon.me 又或者同呢度個 chat 同我傾。

最後，有朋友推介呢本新書，好似幾得意：Enemy of All Mankind

【內容大網】有個叫 Henry Every 嘅人，偷咗當時世界上最快嘅船，仲走去攻擊當時印度最有權有勢嘅 Aurangzeb 嘅一艘船；Henry Every 呢班海盜，搶錢搶貨仲強姦船上女眷。Aurangzeb 大怒，以為係當時嘅 East India Company 嘅作為。據說呢個係 East India Company 嘅第一次存在危機，所以佢哋就發出全球通緝令。三百年後，終於有人搵到相信係 Henry Every 呢班人嘅下落⋯⋯ 

星期五，食個 long lunch 喇各位。